近年咁多次跌市，如去年幾次侵侵發tweet，再數遠啲係前年的XIV爆煲，或是2016年的A股熔斷事件，都係在短時間內急瀉，之後都可收復大部分失地的，恆指在幾次都係跌約三千點就找到支持。

先講侵侵，去年5月及8月發tweet話大加中國關稅，由5月初跌至6月初，約3400點，8月發tweet前一日起計，半個月就瀉2855點；XIV爆煲大家可能已遺忘了，但當時5日內就跌了3265點，係近年最急的跌市；2016年1月A股熔斷機制第一日推出就急跌，半個月後累跌3436點。雖然唔同時段恆指基數不同，但幾次急瀉，似乎都在3000點左右就到位，而今次武漢肺炎事件，恆指由1月20日高位29174點計，至本星期一疑似見底，跌了3029點，又係差唔多水平喎。

別人貪婪時我恐懼，別人恐懼時我貪婪，這個股神箴言相信大部分人都聽過，並奉之為金科玉律，但實際上你又是否做到呢，坦白講青冰都認為自己唔得，始終大家都是凡人嘛，而那些錢都係自己錢，去到極恐慌之時，難免會猶豫，不如跌定啲先撈啦，跌市只是開始，仲有排跌，結果撈底的機會一閃即逝。

青冰自己的經驗係，通常有膽去撈，先決條件都是早前有搶先沽貨，在急挫市況中損傷較細，就更有本錢去撈返心水股，反之，如果被個市扑到應，走唔甩第一下急跌，通常會亂了步伐，諗住反彈先減倉，結果一跌再跌，去到低位時，通常只會係斬頭而不是撈底。

咁究竟今次見底未呀，恕青冰答你唔到，但以一個三千點的跌浪，現在反彈已近半，實在有抖一抖氣的可能。疫情的發展是會牽動大市走向，但又要謹記，市場總會比消息行得快，例如早幾日最恐慌之時，怎覺得會有利好消息，依家升咗千幾點之後，就開始話研究到疫苗，中國減低早前加徵美國的部分關稅，又話全球準備放水抵抗經濟下滑。如果睇唔清現時市況，青冰會先減低大股的倉位，謀定而後動，如果手痕的話，可以玩住抗疫股份先囉。

-- Fb個人專頁 http://www.fb.com/chingbing888