Q43611：
老師，我暫時仲要返工同凑住個女，所以無時間上堂住，如果第時無工返就嚟上堂🙏🏽🙏🏽
我個倉有一隻東方甄選，我均價係16.3，有4000股，呢排升咗好多，你覺得我好唔好賣晒佢？
龔成老師︰
- 無問題，但唔好因為上唔到堂，就停左學習。
你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。
我Youtube Channel都會不時分享一些投資技巧和知識，你都可以睇下。
(當中不少影片，係用來幫讀者提升投資和財務知識，所以無時間性，幾年後再睇依然有用。如果你係想提升自己投資知識，建議你抽時間，睇翻舊影片去為自己增值。)
https://www.youtube.com/@%E9%BE%94%E6%88%90%E8%80%81%E5%B8%AB%E8%87%B4%E5%AF%8C%E5%B9%B3%E5%8F%B0
- 東方甄選（1797）近年完全轉型，現時的業務已經與過往不同，投資者要以最新的業務情況作分析。
這企業過往名稱為「新東方在綫」，於中國從事教育行業，提供網上教育，例如課外輔導及備考課程，提供各年齡層的教育產品。
但由於數年前，中國政府對教育行業有較大的政策改變，對這企業有重大影響，於是企業全面轉型，最後至改名為「東方甄選」。
現時業務包括直播電商業務（產品如農產品）、智能學習產品、STEAM（科學、技術、工程、藝術及數學）教育及職業教育等領域。由於企業本身有一定的網上平台及知名度，以及在教育行業的資產、人材，並配合了理想的市場策略，令企業最終轉型成功。
企業已經走出了數年前，因中國行業改革對企業的不利的影響，現時已有正常的發展。
企業近年的業務發展是不差的，同時部分新業務有高增長，但始終新業務發展年期短，存有不確定性，風險較高。
因此這企業有一定的風險，同時較難計算當中的估值。考慮到潛在的不確定性，投資者就算考慮這股，這刻只建議小注。
整體來說，這企業有發展力，但業務始終有不確定性，投資值博率只是中等，投資只宜小注。
如果你有一定貨，可以減持部份，先收回成本。
Q43612：
多謝阿sir解答! 我地買一層物業主要係因為如果我老公唔做公務員
我地就冇得再住宿舍, 到時起碼有自己一層樓可以翻, 對我地黎講主要都係想有自己屋企, 其他升值果d都係當extra
所以搵租客係諗住有人係我地住宿舍呢段期間幫我地供樓, 等我地可以節省成本, 將錢留係其他投資
另外都可以減少我地係呢層樓上面投放既資金, 咁我地可以少少錢擁有一層自己物業咁, 唔知阿sir會唔會明白我既奇怪諗法呢 哈哈！
另外，我好想知道阿sir點樣睇2047年後既香港樓市, 果陣我都係48歲, 又未話老到可以退休
好驚到時我地keep住呢層樓結果可能會有政策方面影響, 好想知阿sir點睇
龔成老師︰
如果你係咁規劃，咁你照進行就可以，做法合理。
但你要肯定這個私人物業，係足以住到百年歸老和供得起。若果你係中途諗住再換樓，咁現時這個私人物業就不宜太舊，至時確保到你換樓那刻，物業價值可以跟大市同步，否則會令你換屋成本增加。
至於2047年後既香港樓市，太遠，我估唔到。如果接下來5-10年，我相信香港樓平穩及有少少增長，不過就不是倍升模式。
記住，就算長線投資，我地都會持續分析。
未來從來都是充滿變數，但我地唔係無野可以做，你要先盡力去累積好自己財富，令到自己到時候有更多資金去增加選擇權。令自己更有能力，去排除更多將來可能出現架風險。
Q43613：
Hello老师，唔好意思想請教吓你，因為持貨比較多，而且帳面都係蝕錢，想問吓你覺得嚟緊個大市係慢慢向上升，定係跌嘅機會都好大？
🙏🙏謝謝你
龔成老師︰
好難一概而論，現時港股算合理區中間，上升空間會相對高少少。
美股則已在合理區中上至頂，唔係一定跌，但下調機會明顯比上升大。
不過，最終都要睇你手上係乜野股票，因為股票平貴度和升跌，唔一定同大市一樣。
而且，若你手上股票係劣質，就算大市升定跌，佢都應該要減持。
Q43614：
老師，最近在看這本書(80後千萬富翁)，真的好可惜也是80後的我現在才學習這方面的知識。
希望老師你就算發左達，都唔好咁快退休，等過多十年八載我的子女可以去上你堂，向你學習
龔成老師︰
我暫時未有退休計劃，其實80後年紀，只要用正確方法，一樣可以係退休前，做到唔錯架財富增值效果。你都有上堂，相信都明白這個道理。
之前我有出過影片係有關複利效應，你可以睇下，溫故知新。
加油!!!
[複利故事] https://www.youtube.com/watch?v=ZaVTKyodNCg
[巴郡跑贏美股100倍] https://www.youtube.com/watch?v=xm1dx0A2Q5k
Q43615：
老師，想請問一下，一間公司往年都一直有派息，息率亦不錯，但今年突然宣佈不派中期息，但公司明明有錢賺，係咪應該繼續持有？
龔成老師
要分析當中的原因，只是短期問題？
還是有些核心問題出現。例如匯豐（0005）在幾年前忽然唔派息，當時因為疫情，英國要求銀行留多些資金面對風險，所以當時佢不派息，但疫情不是長遠發生，所以當時其實不用擔心。
Q43616：
Voog現價算高嘛？
龔成老師：
VOO是最正路的，VOOG是標普500成長型，VOOV是標普500價值型，你可以簡單理解，VOOG會比VOO高少少增長及風險高少少，而VOOV則是比VOO低少少增長及風險低少少。
大家都是以標普500指數作核心，走勢會類似，只是波幅的%問題。
一般來說，會建議投資VOO。現價合理區較上部。
Q43617：
老師🙏買A M D還是英偉達好？本身持倉Am d如果一樣價可以轉倉英偉達嗎
龔成老師：
雖然超微半導體（AMD）都有質素，都可考慮，但如果要2選1，英偉達公司NVIDIA (NVDA)會較強。
英偉達有質素。是《38全球倍升股》的其中一隻，長遠發展正面，有長線投資的價值。
佢是一家人工智能計算公司，其業務部門包括GeForce圖形處理單元（GPU）、GeForce NOW遊戲流媒體服務和相關基礎設施，和其相關的處理方案。
其業務可應用層面，都相當廣泛，投資係可以。
但始終近年上升倍計，中短期股價仍會波動，現時大約在合理區中上，投資宜分注，同時要控制總投資比例。買入後，平常心面對短期股價，長線等企業有更大的發展。
Q43618：
龔sir, 請問 Sqqq會到咩位？
龔成老師：
ProShares UltraPro Short QQQ(SQQQ)這類產品複雜和好高風險，基本上係賭納指100走勢，如果跌你就賺，再加-3倍槓桿。
我對這類產品有保留，納指在過去數10年反覆向上，所以長遠計持有這股對你"不利"，一定多於"有利"。
Q43619：
早晨-老師！ 想問問請教3476 （恒生摩根美國股票高入息主動型ETF） 這隻唯一一隻在港上市既美國指數股票、有沒有投資長線價值？
龔成老師：
恒生摩根美國股票高入息主動型ＥＴＦ（3476）
基金之投資目標為透過投資於ＪＰＭｏｒｇａｎ ＥＴＦｓ（Ｉｒｅｌａｎｄ）ＩＣＡＶ－美國股票高入息主
動型ＵＣＩＴＳ ＥＴＦ來提供收益及長期資本增長。
由於這基金較新，未知具體做成點，始終是主動型基金，成績好壞要睇基金團隊的投資實力。所以，這刻就算有興趣，暫時只宜小注。
Q43620：
我怕退休冇收入，點算？
龔成老師：
要開始為退休計算，第一，要計自己每月到時的開支。
第二，要計你有那些資產，可以創造出多少收入，退休後各種收入，有了上述資產，就可計退休你要多少資產。
第三，如果現時同退休仍有一段距雜，就要開始儲錢，為目標退休金額準備。