同股不同權的《上市規則》修訂諮詢總結昨日公布，公司創辦人擁超級投票權，保障其經營權，新例會在下周一（30日）生效，同日接受上市申請。

「得一想二」是人類劣根性，早前有指中概股赴美上市的數目中近半為企業持有特權股，建議港跟隨開放，人終難免一死，但企業則沒有生命，言下之意不平等待遇會延續至創辦人死後， 大有可能日後這些企業也能將超級投票權易手，變相賣殼，我等小股東真是不敢苟同。

同股不同權以外，大家仍是聚焦於金管局接錢上，自4月12日開始，短短一周合共13次在外滙市場購入513億港元，金管局指規模與預期脗合，運作良好，我等股民就覺得金管局接錢的規模和頻率都是意料之外，如果以這等速度，銀行結餘有機會在未來數周1000億樓下見。

還記得觸及7.85，無論傳媒和大行異口同聲地說，此為套利非走資，但金管局接港元沽盤那刻，銀行結餘和外匯基金票據減少，資金確實是流走。

「咁環球放水咁多年，銀行體系結餘由幾十億升起，咁依家回歸基本步都好正常」如果閣下唔揸股票呢類資產，的確可以做下花生友。但炒股的Sam感覺到，自從港元觸及弱分保證後，股票每次反彈都遭遇山大沽盤，而金管局每次接錢唔少資金趁機沽空期貨獲利，這雖有別於1998年式追擊港元的來勢汹汹，但貿易戰和港元走弱下，做落的確易過做上，此乃財富蒸發。

當資金打算收韁離場，投資者最應該令自己的資產唔好輸，有啲咩野係一定唔會輸，就是增持現金，持有太多股票，你唔沽，人地都沽，閣下風險必然大增。那幾時大市先算係喘穩？唔靠外資，唔靠港資，當然係靠北水，北水連日撤退，都唔會喺呢啲情況撈，你真係仲諗住接盤？

https://www.facebook.com/stocksamantha/