和電(0215)賣固網，怒賺百幾億，終於在2月底宣布派0.80元的特別息，連同末期息0.032元，剛過去的星期二就要除淨0.832元。玩開股票的戰友都知，除淨都係一個玩左袋入右袋的遊戲，當股價係一蚊，派息一毫子，除淨後報價機係會顯示除淨前的股價是0.9元，咁除完之後開咩價，都係睇市場供求，冇定論的。

但究竟點解和電除淨後為何會跌凸咁多呢？先給你一些數字，和電公佈消息前，股價係3.10元，翌日裂口高開見過3.30後回落，隨後兩日仲見過3.10，當冇事發生過咁，誠哥的股果然超級難玩，3至4月間，都係牛皮為主，最叻都係見過3.36，但其實都冇企穩過，踏入5月又突然破頂，高見3.47，唔通真係有人會搶息？除淨前收報3.38，換言之除完之後的理論價係2.548元，點知開市價已經係2.36，嚇死寶寶了，開市即刻唔見7%，之後隻股一直向下，昨天更低見1.92，換言之你除淨前用收市競價3.38買，袋完息之後仍輸25%，痴線架咩。

這兩天，青冰看到不少評論指和電估值貴，唔值得買入，當中包括大行瑞信，降評級至跑輸大市，青冰冇睇報告的內容，但在報章或一些投資平台，都見專家分析指估值貴，大致的計算都係本身和電有幾多資產，派完息之後剩返幾多資產及現金，派息後估計盈利有幾多，市盈率市賬率乜都出齊，總之就係貴，但最奇怪嘅係，除息要除幾多大家一早知，這些數字在上星期除淨前一樣計到，相信可得出的結論亦是一樣，都係貴，但點解上星期唔計畀大家睇，依家跌凸咗咁多先至話貴呢，貴就是急跌兩成的原因？

本身和電並不是一隻沽空活躍的股票，但青冰發現在除淨前幾日，數字急升，除淨前4天的沽空股數合共2188萬股，除淨前那天，單日錄得1522萬股沽空，佔當日成交的30%，4天加埋的沽空加權平均價係3.388。溫馨提示返，借貨沽空，除了要畀利息，有股息嘅時候，係要原銀奉還畀股東，換言之，單以沽空成本價計，等同除淨後的2.5568，以現價計都執唔少喎，而除息後這三天成交共有1.47億股，佔流通量的12%，相信已有足夠的成交量畀空軍平倉了。

青冰翻查過同是大市值股的電能(0006)及港鐵(0066)，共四次的特別息除淨日，發現並無突然急升的沽空量，咁龐大沽空是否推低和電股價的主因，只能向陰謀論想，都係嗰句啦，估值係貴，除淨前後應無分別的，斷唔會除完息後冇咗吸引力，突然由平變貴嘛。

Fb個人專頁 http://www.fb.com/chingbing888