Q41251：
老師，有無太空類型股票？
龔成老師：
其實唔算多，維珍銀河（SPCE）是行業的其中一隻，但風險高，是否成功無人知，但如果你能承受高風險，小注，不是不可。
較有質素是SpaceX，但無上市，不過Destiny Tech100 Inc. （DXYZ）這基金，則有投資。
留意，這基金風險較高，當然有潛力，如果投資，只建議小注。
DXYZ是一家封閉式管理投資公司。公司投資於創投支持的私人科技公司的投資組合，並為日常投資者提供接觸私人市場機構投資者的機會。公司持有的股票包括：SpaceX、OpenAI、Epic Games、Discord、Super human 和 Stripe等。公司為美國客戶提供服務。
這些都是潛力企業，但要有心理準備上落較大，小注投資好了。
另一隻相關股，是Virgin Galactic Holdings Inc.維珍銀河（SPCE）
維珍銀河股價在2021年創新高後，其後持續回落，現時股價未見好轉。
2021年，維珍銀河創辦人布蘭森（Richard Branson）乘搭維珍太空船上太空，這一動作，成功吸引了大量資金投入這行業，維珍銀河股價受到熱炒而大升，創歷史新高，由於企業仍在發展狀態，未有正式的收入，只能不斷利用集資等方式去維持發展，當近年未見明顯發展時，加上熱潮冷卻，近幾年股價大幅向下。
維珍銀河（SPCE）可以理解是一個極高風險高潛力的企業，是一間總部位於美國的航空太空公司，利用可重複使用的技術，發展商業載人太空事業。如果研發成功，產品能做到商業化，長遠利益很大，但同時風險也十分高，真正成功的時間也可以很漫長。
到2023年中，維珍銀河在美國新墨西哥州執行首次商業飛行，任務代號「Galactic 01」，總共載運6人，其中3人為空軍，在飛行過程中，另外3人是維珍銀河機組人員。
維珍銀河使用動力噴氣母艦機「VMS Eve」載運太空船「Unity」升空，達到高度約45,000英呎(約13.68公里)後，Unity脫離母艦，以超音速垂直上升至海拔53英里(約86公里)，進入太空邊緣，乘客經歷幾分鐘的失重狀態，然後太空船開始轉向，滑翔下降返回地面。
維珍銀河一直無法正式商業化，令企業不斷處負現金流狀態，在市場失去耐性下，自2021開始，股價持續向下。2023年尾，布蘭森更加稱不再投入資金，令這企業股價進一步轉弱。
這企業長遠發展存有較大未知數，加上要持續投入大量資金去發展，如果企業業務長遠有發展但中途資金不足，都有機會令企業失敗，投資者要明白這點。
始終這是一個十分新興的行業，不確定性很高，發展風險也很大，而最終產品市場的接受程度、應用程度，也是充滿未知數，如果投資者無法承受高風險，不宜投資。
如果投資者能承受高風險，睇好行業及這企業的發展，可考慮小注投資（一定要小注），買入後不要理短期股價，長線，有心理準備，多年後大升，或大跌。
Q41252：
老師想問下英偉達如何？值得長線投資嘛？
通關個陣買左個的士牌而家真係渣都無😭係咪的士牌已死
龔成老師︰
英偉達公司NVIDIA (NVDA)有質素。是《38全球倍升股》的其中一隻，長遠發展正面，有長線投資的價值。
佢是一家人工智能計算公司，其業務部門包括GeForce圖形處理單元（GPU）、GeForce NOW遊戲流媒體服務和相關基礎設施，和其相關的處理方案。
其業務可應用層面，都相當廣泛，投資係可以，當然，回翻少少先買會更有投資值博率，至於現價，算是合理區較上部，可小注投資，等跌再加，但股價波動，或者用月供儲貨，會比較好。
之前都有出過分析NVDA的影片，你可以睇翻︰
https://www.youtube.com/watch?v=CKI2zA7LaV0
的士牌都是一個投資工具，但你就唔好預期佢有好大的增長力，已經不及過往的年代。
因為佢面對市場環境已有不少變化，叫車程式會對佢不利，雖然未必會影響到要大幅減租，但都會影響長遠增長。
你暫時可視為收息的工具，唔好預佢有明顯增長力。首先，你預佢短期仍弱，另外，現時要守住先不是不可，可以耐心等香港經濟好轉，到時多些人搭的士，牌價上翻翻但如果到時確定，整體的士牌的價值將長期向下，到時就宜賣出。
Q41253：
龔sir我想問一個問題，如果而家股市咁動盪，係咪應該買收息股？
之前你俾個幾隻收息股我。
你回應：「高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。」
但我發現這幾年大部份都係賺息蝕價。
咁其實係咪應該買滙豐？
Dividend Yield 是否12%
龔成老師︰
我諗你個核心概念錯左，你不應該著重短期股市情況，就轉來轉去，最重要是長期的組合配置。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
所以，你選擇邊類型架股票，唔係睇市況，而係睇你人生階段和投資取態。
如果你係年青，可以用平穏增長股 + 潛力股作組合。
相反，你已近退休之年，就應以收息股為主。
而收息作用，係創造被動現金流(即收息)，去支援無收入架退休生活。所以，持有收息股係唔會理股價(因為唔係用來增值，如果你要增值，就唔應該買佢)，只要佢長線派息依然保持到，咁會一直持有。
當然，如果你本身怕風險，投資收息股是可以，但你要明白這是長期進行，而不是轉來轉去。
我建議你睇翻以下Youtube影片，相信會對你有幫助︰
https://www.youtube.com/watch?v=7Vu3VKKQrLk
Q41254：
龔成師傅，我想有啲嘢請教你， 我本身揸住五萬幾股匯豐 超過20年， 也經歷過都高低潮，也供過股， 好多股價都買過貨，現在平均價61蚊
我見最近個價好凌厲 差不多100元， 現在我考慮在100蚊以上先放一半股票取回本金， 其他再繼續持有，收取股息
我想你給我一個意見怎樣辦好， 你贊成我先放一半嗎， 或繼續持有下去，一直收取股息，
我現在真的揸不住主意， 不知怎樣安排， 有些煩惱，希望龔成師傅給我意見怎樣去做，謝謝
如果真的 要沽一半的話， 去到哪一個價可以沽，謝謝
龔成老師︰
首先你要明白一個概念，我地講投資理財的時候，要從整體的財富組合作爲出發點，避免只考慮單一的股票。
如果你個別的股票佔整體組合超過15%就要做出調整，因爲就算再優質的股票，持有太多都會令組合的風險過於集中。
第二，要考慮企業本身的質素去衡量持有的比例。
匯控（0005）最差時期已經過去，業務正好轉。
不過，銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。
相信長遠是收息股，但股價增長就未必太強。
這股都有投資價值的，現價合理，假如你持貨過多的話，現時可考慮分階段減持。
第三，要考慮你本身的投資目的。如果你投資為收息，就建議你不要太著重中短期的價格，一直持有收息就可以。
總括而言，如果你係較年長，或者保守，匯控(0005)適合作為長線持有目標。但就唔好得佢一隻，成個組合要平衡。
相反，你較年青，目標係增值的話。現時最好分段持，將資金分配翻落具增長力股票會較理想。
Q41255：
收到謝謝您!!如果美股佔資產的一半,現總價下跌15%,仍有50%現金儲備,請問您會建議賣部分還是保留?
因近期看到美國局勢不穩的消息較多,又或會股災等消息,聽到心慌
所以請教一下如果是您會怎做,謝謝
龔成老師︰
現時美股處於合理區較上部，不是大手買入的時機。你已有一定貨，故不宜再加注。
至於是否保留，就睇佢地有無長線投資價值。如果有，我地都可以持有。
今年内的美股因爲新政府的政策，而會變得更加波動，但凡事都有兩面，下調造就了入市機會；上升，則可以幫你做到財富增長效果。
因此，投資是配置才是重點，而不是估走勢。總括而言，建議你點都有些貨在手，至於比例，要維持在你覺得可以承受的範圍内。
另外，唔好只係得美股，建議加入港股去平衡地區性風險。而且，以現價水平計，港股值搏率都明顯比美股高，係一個儲貨時機。
Q41256：
老師, 請問香港MPF仍可放美股嗎？已經歷史高位
不知道投資怎樣安排，投資邊個市場？MPF大約有1M
謝謝分享意見
龔成老師︰
強積金的配置並不複雜，首先要注意，強積金是一個超長線投資，因此不宜做中短期炒賣，不用以預測投資市場的走勢去將強積金轉來轉去，除非你很確定，現時的投資市場明顯平，或明顯貴，否則在大部分情況，強積金不用轉來轉去
其實，你只要按你的年齡階段，去進行分配就得，年輕時較進取，到了中年就以平穩作配置，到退休前5-10年基金配置就要趨向保守，為退休做準備。因此，你只要按年齡做好配置，並且因年齡漸增，慢慢將強積金轉為較保守類別就得。
另外，在股票配置的部分，你可以考慮環球股票，又或以中國+美國作為核心，因為這兩在往後10年，都是全球兩個最大的經濟體，你同時持有可以。
其實強積金，著重配置、平衡，不著重炒賣。要考慮長期配置的模式。
所以，就算而一刻美股唔平，我建議你都要有貨，但不能過度集中。始終佢超長線係有發展，有持有價值。
其實較好的配置，是環球市場，對強積金來說，會較穩陣的。
Q41257：
龔成老師你好， 本人初接觸月供股票 （月供金額若佔每月總儲蓄金額約 40％， 另外60％ 用作存款／ 定期／ 債券等）
月供股票持若12個月， 分佈如下（％ 為佔總股票投資百分比）：
V00 （25％）
2800 （30％）
0388 （15％）
005 （10％）
2388 （10％）
0066 （10％）
想問龔老師配置正確嗎？
應該加入1211，1810，9988 或其他股票嗎？謝謝
龔老師, 還有想請問2388 vs 3988有甚麼分別， 如作長線投資月供應選哪一個? 謝謝老師
龔成老師︰
你上述的組合，無特別問題，都是有質素的股票，可長線。
我先講一些大方向，其實，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
你手上持股，都係具有長線投資價值。但是否適合，就要睇埋你人生階段。
如果你未接近退休之年，這組合係可以。若你是偏年青，則建議加入一些潛力股，去提升組合增長力。
而定期、債券、0005都是較保守選擇，年青人不宜持有太多。
當然，如果你本身怕風險，不太追求增值，就可以持有收息股。
至於潛力股，你提到架1211，1810，9988，都是合適的。另外還有以下那些，你可以研究下︰
潛力股，例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。
如果最入門，會建議3067，不過，都要慢慢分注買入。
Q41258：
成哥, 請問恒指今年有無機會上返3萬點？
原本我MPF全美股，依家轉少少去港股 仲岩唔岩時候？
小米有無機會回落返49蚊左右？ 4x嗰時無入到
感謝成哥
龔成老師︰
中短期走勢好難估，今年相信恆指係正面。但會否去到3萬點，要睇往後經濟變化，始終好多政策出台不久，要時間比市場消化同反應。
至於MPF，現時美股唔平，相對港股值搏率會較高。而且，我唔建議只集中晒一個地區，咁會有風險，故長線你都應該要加大(美股以外)其他地區比重。
至於小米(1810)，你架想法，有一個嚴重錯誤架地方。
我地投資唔會估走勢，因為中短期股價受好多因素影響，有D係同企業本質無關，所以好難估。
好多散戶會諗，而家個價咁高，不如沽左先，平D再買過，或者等下平D先再入。但如果你沽左或者等下之後，佢再大升。你就會錯失升值機會，同埋要用較高成本才可以買翻。
所以，我地一般只會係大市好狂熱、股價好貴、或者長線質素變差才會沽出。因為這些情況，我地就有一定程度知道，佢未來增值空間已經有限。
相反，如果股票係有質素，我地就不用理會中短期波動，一直去持有。或者你係無貨，就會先用小注，再長線分注慢慢儲貨架模式，才會是最穏當做法。
所以，我經常叫讀者必需學好估值和分析技巧。因為係投資路上，佢地真係十分重要，是你成敗的關鍵。
Q41259：
你好，請問有AI投資嗎
龔成老師︰
其實AI有好多相關企業，分布係不同的範疇。不過，具體講係好複雜，因為唔同架企業，係AI架業務和應用程度都所不同。
[部份可考慮AI企業，不過留意近期佢地都升左唔少，只宜分注慢慢儲貨。]
上游設計晶片相關︰NVIDIA(NVDA)、AMD、博通(AVGO)
中游生產晶片相關︰ASML、台積電(TSM)、中芯(0981)
下游提供或受惠於AI應用︰META、Microsoft、Google、AMZN、PLTR、9988、1810、1211。
你可以因應自己認知和想法，去到決定投資邊樣企業。
如果你無太多想法，純粹睇好AI發展，可以分注咁儲佢架ETF。但始終AI發展潛力係有，但不確定性都高，所以不能過於進取。
[部份AI相關ETF]
(i) Global X Robotics & Artificial Intelligence ETF(BOTZ)主要投資於可能從機器人技術和人工智能 (AI)利用中受益的公司，包括那些涉及工業機器人和自動化、非工業機器人和自動駕駛汽車。
前十大持股包括NVIDIA(NVDA)、直覺外科(ISRG)、KEYENCE CORP(6861.JP)、ABB LTD(ABBN)等大型企業。
此股有一定投資價值，但不確定性高，市場對AI未來發展其實未有具體的想法，所以有少少係"估願景"。
另外，要留意多一點，就是此ETF前5大股票佔去整個組合4成半。所以，這5間公司表現，好直接影響到ETF的升跌。
總括而言，你投資係可以，但不宜過份進取。
(ii) iShares未來人工智慧與科技ETF(ARTY)，基金是追蹤Morningstar Global Artificial Intelligence Select Index。
前十大持股包括NVIDIA、AVGO、META、AMD、Google等大型企業。
此股有一定投資價值，但不確定性高。投資係可以，建議用分注去慢慢儲貨，同時控制注碼。
Q41260：
龔成老師，想請問，我買入股票001平均價61.8共15首，已經買了幾年，一直都在跌，前兩天升過沒有留意，今天看價格已經是49.5，想請問我是否放部份轉去其他股票，
我應該如何部署，麻煩給我意見，感激
龔成老師︰
長和(0001)有質素，但現價已反映左賣資產因素，所以之後會去翻業務基本面。由於地產市道弱，相信佢中短期只會一般。不過，長線會慢慢好轉。
這股不是高增長型，佢算係收息+平穏增長。現價合理，未貴，始終佢資產有一定價值。
至於是否轉去其他股票，就睇你人生階段和持股比重。
若你係較年青，可以轉部份去潛力股，去增升組合增長力。
如果佢本身佔你組合較多比重，同樣可以換碼，去分散投資，以平衡風險。