今星期螞蟻集團(6688)開始招股，理應抽走部分科技股資金，點知這幾天ATM都先後創歷史新高。有分析話螞蟻招股反應太好，騰訊(0700)都有微信支付吖，係嚴重被低估，但美團(3690)冇支付喇呱，但夾硬要解說，都仲可以話係水漲船高嘅，但有一個有趣的現象，本來螞蟻熱爆，竟然係帶旺對家，而不是親生阿媽阿里巴巴(9988)，雖則巴巴都創上市新高，但動力明顯不及騰訊和美團，究其原因，應該係北水推波助瀾。
現時三大科技龍頭ATM，只有阿里巴巴未能進入港股通，原因係第二上市的股份，仍未被納入，內地監管機構一切必然以穩陣行先，同股不同權股都要年幾先開綠燈，第二上市的中概股，阿里巴巴去年11月才上市，都未夠一年嘅，但究竟第二上市有甚麼特別風險，要搞咁耐，真係要問返內地監管機構先知。
入返正題，早前三個交易日，騰訊累升8%，美團更升13%，以幾萬億市值的股份計，這個動力極強，阿里巴巴3日加埋只升1.5%，慘啊。北水連續三天大幅流入港股，三個交易日共買了110億元騰訊，47億元美團，認真誇張，你可以話係阿爺托市護盤，為螞蟻做勢，但青冰在專欄都多次提及，過去兩年，北水大舉入市買大盤股，多會出現在大跌市，動用大量資金買兩隻龍頭買到破頂，極其罕見。
北水去年共買入2493億元的港股，今年首9個月就買咗4706億元，當中3月的環球股災，就買咗1397億元，佔當中的3成，我們常常取笑北水係大媽，但你睇返人哋甚麼時候落最大的注碼，就知大媽其實蠢唔晒，當然啦，買港股都涉及有政治任務的，要在「主場」話事，自然就係要累積籌碼嘅。當戰友將這些年度數字，跟這三天的比較一下，你會發現157億元的騰訊及美團，絕對不是小數目，別要忘記，這只是三天而已。
現時騰訊及阿里巴巴是恒指成份股，美團最快都要11月13日的季檢，才有機會染藍，到生效日，已經係12月4日收市後了，屆時ATM都是成份股，而北水可以買賣其中兩隻，換句話說，對恒指的影響力就更大，如果內地監管機構再為第二上市入港股通開綠燈，相信北水亦會蜂擁來買阿里巴巴，反而螞蟻在A、H兩地同時上市，對內地資金來說，吸引力不及ATM，再者，螞蟻要入恒指，最快也要明年二月，北水要操控指數而買螞蟻，仲有大把時間。
--