Q23801：

想問龔sir點睇美股Rivian?會是下一個Tesla 嗎？

另外想問下，電動車一直持續高企(如1211，2333，2845)，現在是入貨時機嗎？

龔成老師︰

Rivian Automotive Inc（RIVN）有潛力的，當然，業務有不確定性，同時股價較為波動，要注意風險。

Rivian同Lucid，同樣稱為「TESLA殺手」，可見在產品上—定的競爭力，企業有長遠的發展。

佢算是一間新晉的電動車企業，而其中一個股票是Amazon ，相信這個關係對佢有利，因為過往佢試過從Amazon取得了10萬部電動貨車的訂單，為Amazon生產電動車作送貨用途。

企業長遠不差，但估值就十分難，這點令股價波動，初步分析現價唔算平，如投資只建議小注，投資要明白風險，買入後長線持有。

至於比亞迪(1211)現價偏貴，不是入貨或月供時候。你可以用GX中國電車(2845)去暫時代替，不過2845都唔平，最多只可以小注，或者用月供去儲貨。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

Q23802：

你好龔Sir, 我想問下你有關中國燃氣及信義光能？我較早前買咗中國燃氣 （$24.50 - 4,000股）及信義光能 （$18.02 - 10,000股）我應否將兩隻股賣掉轉其他股呢？

謝謝幫忙！

我是新手，如果想買你既書，應從那本開始看？

剛剛睇咗你既post, 等我聽日去買本大富翁致富藍圖睇下先

龔成老師︰

你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

你出現帳面虧損原因，唔係隻股票變左質，而係你買入價偏貴。就算現時回調，都依然在合理區頂至略貴水平。此股有長線投資價值，你照持有就可以。

至於中國燃氣(0384)，10月21日遼寧瀋陽市太原南街南七馬路一飯店發生燃氣爆炸，波及公交車。官方數據稱，事故導致4死、47傷。

今次出事的瀋陽燃氣，其中大股東為瀋陽瀋西，持有瀋陽燃氣70%權益。而背後中國燃氣(0384)，則持有瀋陽瀋西46%權益。

其實佢爆炸事件，已經唔係第一次，早前6月係湖北都發生過同類事件。

該事件導致25人死，逾百人傷。當地公安機關根據初步調查結果，刑事拘留左8個人，其中包括十堰東風中燃城市燃氣發展有限公司姓黃的總經理。

十堰東風中燃城市燃氣發展有限公司由中國燃氣(0384)持有85%股權擁有。

不斷發生同類型事故，令市場擔心該公司安全管理制度，是否存在嚴重缺陷。相信中國燃氣(0384)股價，中短期將會受壓。

以本質分析，中國燃氣業務不差的，財務數據正面，生意與盈利保持向上，股本回報率高，賺錢能力強，不過，負債少少高是扣分的地方。

而今2次事件，會對佢有中短期影響，至於長期，由於會加大左安全方面的成本，政府監管都可能加強，因此點都會影響賺錢能力，但未到核心性。

不過，如果佢再發生更多類似事故，不排除會對經營方面，造成長線影響。

整體來說，這企業都有投資的價值，不過風險高左。

這股都可以長線投資，只要唔係佔你組合太大比重，咁就可以。你預佢中短期股價上落大，而且未必是高增長類別。

書本上，《大富翁致富藍圖》是全面的財富配置教學，相信適合你的，同時，你可以再睇我架《80後百萬富翁》、《財務自由行》和《股票勝經》，都係適合初學者。

Q23803：

老師你好 我今年三十一歲 已婚有一個半歲小朋友 想開始投資但無太多概念 所以想請教應該由咩開始入手

龔成老師︰

首先，你要明白我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係好似坊間個種短期炒炒賣賣，去賺差價，而係一個長線計劃。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，可以投資「平穏增長股」和「潛力股」，去作為投資目標。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你將來有一定投資知識後﹐潛力股比重才可以相應調高，佔組合約3-5成，視乎你當時投資知識多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

Q23804：

老師，想問下2845而家入會吾會太高價位？

另外2380可以長期持有嘛

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

中國電力（2380）業務不差的，近年有發展新能源，帶動業務增長。

佢主要在中國開發、建設、擁有、經營及管理發電廠。過往業務都有增長，不過盈利有少少波動，主要受成本及定價因素影響。

近年有發展風能及太陽能業務，成果不差，帶動企業增長，現價合理，都有長期持有的價值，但由於近期上升不少，因此如投資要控制好注碼。

Q23805：

老師 388 現價入得過嗎

謝謝你

龔成老師：

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價合理區頂，月供可以，或小小注，你預回翻5%-10%更有投資值博率。

Q23806：

老師，想問285算吾算潛力股呀？？

同1024值吾值投資呀？

龔成老師：

比亞迪電子（0285）這股正面的，佢是1211的子公司，主要從事製造及銷售手機部件、模組及其他產品、提供手機設計及組裝服務，以及提供其他電子產品的部件及組裝服務。

過往發展正面，有技術，前景不差。長遠睇好佢的。

如果考慮佢近年的增長，現價合理區中間至中下。如果之前有貨，可以長線持有，由於股價波動，現價小注分注可以。

快手（1024）其實都有質素，只是之前市場熱炒令股價上落好大，同時，要留意佢業務較波動。

係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍未平，可稱為合理區中上部，但短期股仍會十分波動，如果想入貨，這刻只宜小注，或者月供更好。

Q23807：

我想問一些問題。。因為我有看你的書和影片，對我很有啟發，有關投資理財的事，我都照做。

因我有做銀行的月供股票，每月月供盈富(2800)2000元，港鐵1000元，比亞迪(1211)1000元，近排8，9月見價格都跌了很多，可否再供下去。

想問下你?

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

所以，這是一個長線過程，最理想係起碼供3年，持有5年。

如果你經常去自行調整供款，其實係好大機會破壞左個平均價格效果，大大影響你最終回報。

只要佢地本質無大變，你就應該一直供。除非你定平貴能力好強，否則唔建議咁做。

另外，比亞迪（1211）係潛力股，業務發展理想，不過現價係偏貴，暫時不宜月供。

你最好等回到$200以下，先月供會較好。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

Q23808：

老師，我想請教呢四隻指數：

GX中國電車（2845）

安碩恆生科技（3067）

GX中國雲算（2826）

GX中國生物科指數(2820)

記得你話過呢幾種指數中短期波動較大，自己都略略了解2845係追蹤比亞迪佔股較重、3067就係追蹤一d新經濟科技股。其餘個兩種就唔太熟悉，

當時你都有建議我儲兩個月錢就買入一次，想問下現時邊隻更值得投資，謝謝

都係會諗住長線儲貨。現時持股有比亞迪（$45買入）

小米（$22.5買入）

中國生物製藥（$6.幾買入）

完美醫療（$5.6買入）

戇鋒鋰業（$97買入）

帳面$50萬左右，手上可用資金$25000。想睇下投資邊隻指數較好。另見金沙中國（1928）都回落左好多咁，想問下阿sir投資意見。

sorry for好多問題，小弟今年29，目標想30左右賺到100萬，現時月入4萬，扣除家用每月剩$28000左右可投資。

同埋記得你係書中講過，人生第一個100萬好重要，因為會滾出第二個100萬。但係我現時情況，錢都係分散係唔同股票、加上我又長線持有，所以想問下滾第二個100萬的原理係點？

龔成老師︰

無錯，這4隻ETF的不確定性都較大，算係潛力股類，雖然你才29歲，偏年青。但潛力股都不宜持有過多，最多佔組合一半好了。

ＧＸ中國雲算（2826）之投資目標為追蹤中國雲端運算指數ＮＴＲ之表現。

當中較大持股，包括美團(3690)、阿里(9988)、騰訊(0700)、陸金所(LU)等。

這都是一些高增長的行業類別，我自己都睇好的，但預佢價格上落會較高。

ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

當中較大持股，包括百濟神州(BGNE)、藥明康德(603259)、藥明生物(2269)等，都是一些有規模和質素的企業。但始終行業性質上，不確定性較高，故會有一定波動存在。

現價算係合理區頂，無貨可先小注。或者用月供模式去儲貨，都係可以。

現時4隻ETF平貴水平差不多，而且都有長線投資價值，無話邊隻值博率特別高。你可以睇翻本身較睇好邊個行業，和你對相關持股的認識程度，去決定投資目標。

你現時目標想30歲前達成100萬，不是完全無可能。但你要明白我地投資優質股，係講長線回報。中短期價格會受好多因素影響，就算再優質股票，都會有波動。

所以，唔好用1年咁短時間，去定立計劃，應以長線組合增長作為目標。

除了現有持股外，你可以用你每月儲蓄去做月供股票。每月先用一半去月供，其餘一半儲起等大跌市機會。

不過，你要留意一點，你現時持有股票，雖然有質素。不過，全部都係潛力股，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

至於滾第二個100萬，其實原理都一樣。但因為你個本金大左，所以個複利效果會更高。同時間，當你未來資金再滾到較大水平時，你就要開始加入其他資產項，例如物業類。

令你財富組合更多元化，唔會太偏重單一項目，而造成過高風險。

Q23809：

龔sir, 請教一下 在香港人民幣投資產品有咩建議 我現在有38萬人民幣左右 現在一向都做定期

我問過銀行但佢地好唔專業 我聽唔明 所以想問下會有咩產品做到長期但有高增值既效果呢？ 我見到有債券等 我可以去邊度可以了解多d?

龔成老師︰

人民幣只是貨幣，是人為創造出來的，因此只能稱為「產品」，不是真財富。因此，若你目標係想為財富增值，你最好將人民幣轉為物業、優質股等這類真財富，會比較好。

如果你人民幣係有實際用途，你可以暫時用定期去增值。

若你人民幣無實際用途，最好換翻做港紙去做投資增值，會對你較有利。

Q23810：

謝謝老師的分析, 朋友說這疫苗已經研發成功, 成功率超過九成, 好多國家已經同佢簽合約了, 現在只是等批, 印度已經生產 1M 疫苗,

但期間比較多不確實的謠言, 令股價大跌, 對自己的官方網站已經澄清叫人唔好信謠言 , 朋友說 2022年, 股價有機會升五倍, 或者果合理價錢係3000. ,

佢話賣出唔值錢了叫我strong hold.

朋友是從事藥劑師的, 佢話佢自己就係等這隻疫苗先至打, 其他疫苗佢不考慮.

老師如果朋友說的是對,我是否應繼續持有? 暫時唔好理短期股價, 謝謝

龔成老師︰

我唔係話佢無投資價值，叫你賣左佢。

我只係想你明白，坊間對這個疫苗評價和期望係正面，而且現時不少國家都會加快批出疫苗上市申請，所以佢短期內上市，而且有好成績係唔奇。

不過，我地要從客觀層面，去長線分析成件事。首先，我地唔係這方面專家，係判斷時要保守少少。

雖然現時數據上，都說這疫苗效果有機會接近輝瑞。但病毒正在不停變化，故其保護力有機會出變數。

另外，疫情發展? 最終能否在各地上市? 未來是否需要定期注射疫苗，多久需要補針? 到市場化後，會不會出現副作用事件，影響佢發展? 這些都會影響到疫苗需求，是一些未知之數。

至於是否能升5倍，去到$3000，你要研究翻當中理據。有多大需求、疫苗定價、企業未來發展成本、競爭對手情況等，唔好只係靠估，或者聽人講。

整體而言，你係可以投資，但我建議你保守少少，唔好太大注，因為始終有不少不確定性存在。