Q23721：
你好，請問AMD 現價可入嗎？本身$151高位入左， 現在回落少少可再入嗎？
另外SOXL $38買左，現在升緊，可以繼續持有？
謝謝
龔成老師︰
超微半導體公司（Advanced Micro Devices）（AMD）有一定的技術與潛力，有長線投資的價值。
佢係一間專注於微處理器及相關技術設計的跨國公司，AMD擁有晶圓廠來製造其設計的晶片，自2009年超微將自家晶圓廠拆分為現今的GlobalFoundries（格羅方德）以後，成為無廠半導體公司，僅負責硬體積體電路設計及產品銷售業務。
而家佢主要產品是中央處理器（包括嵌入式平台）、圖形處理器、主機板晶片組以及電腦記憶體。
超微半導體是目前除了英特爾以外，最大的x86架構微處理器供應商。
在全球個人電腦中央處理器的市場佔有率中，英特爾排名第一、AMD第二，可見有一定的實力及技術。
現時在些大企發展元宇宙，佢已經開始有相關訂單，早前AMD表示，除了Meta之外，包括Google Cloud、AWS、和微軟等資料中心也都使用AMD的晶片，不僅代表AMD正從英特爾的手中搶下更多資料中心伺服器晶片的市佔，也顯示AMD的半客製化伺服器晶片也獲得不少科技大廠的青睞。
企業前景正面，這股可以長線。但現時市盈率唔平，雖然未算貴得誇張，但你有貨在手，最好等佢有明顯少少回調，才考慮加注。
Direxion Daily Semiconductor Bull 3X Shares(SOXL)是追蹤ICE Semiconductor Index，目標係扣除相關費用後，達到正向3倍的回報。
指數當中，有不少有質素的公司，好似NVIDIA、QUALCOMM INC、INTEL等，有投資價值。
不過，我就唔係太建議，用有槓桿成份的ETF。因為行業發展得好，回報可以倍大。但當出問題時，你虧損都係加倍。
有一定風險，最好用無槓桿的ETF會較理想。就算要投資，也必需控制注碼，不能投入過多資金。
Q23722：
- 成哥，十分懮心，無覺好瞓。现时全副身家都係蟹货，损失唔少，仲要睇住日日跌。請畀D意見点做好
持有数量及成本均价
0003煤气10000*$15
2318平保6000*$86
700騰訊500*460
2800盈富10000*28
3067恒科20000*16.2
1628禹州110000*3.3
现时已損失30%以上，尤其禹洲唔知点算。
禹洲係110000(十一万股)，我大部份都係2018股災前已持有，捱过一波都又一波，越踩越深，現已屆退休之齡，唔知仲等唔等到佢哋翻身！
- 顶唔順睇住跌，沽清平保同禹洲，竟然係差不多最低位，损失60%，請问其它的如何处理较好？
如果止跌回升，可否再买入？
龔成老師︰
其實你投資最大問題，唔係選股或者定平貴方面。而係你依然放開唔倒，賺差價的心態。一見個價跌，就覺得隻股票出問題，個心就慌。
你要明白我地投資係長線，最主要睇係企業質素，而唔係個股價。因為只要企業有質素，長線股價一定會增長，中短期波動，我地係唔應該太在意，重點要放在企業質素上。
禹洲集團（1628）主要於中國廈門、上海、福州及合肥從事物業開發、物業投資、物業管理以及酒店業務。
佢係新加坡、香港、上海、合肥、福州、廈門等地均設有分支機搆。
整體質素都有，但未算好強，佢在行業中，未算有好大的規模與優勢，另外，負債較高都對這股造成風險。加上業務有點波動，這股唔建議投資太多。
由於近其中央政策，不利房地產行業，故其出現大調整，都係正常。
由於禹洲質素較弱，你減持係可以，但未必一定要全沽。(但沽左就算)
其餘股票，都係有長線投資價值。不過你已在退休之年，持股就應以收息股為主，而你持有股票，大多是增長型，風險偏高。
煤氣(0003)、騰訊(0700)、恒科(3067)雖然都有質素，但我建議你都要慢慢減持，換至一些收息股，去創造現金流，支援你退休生活才算理想。
以下是一些有質素的收息股，你可以參考下，現價都合理，可以分注慢慢入貨。
目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。
Q23723：
你好龔sir 關注左你個page一段時間，想問問對沙頭角（禁區）樓睇法，有投資價值嗎？
龔成老師︰
首先，要睇翻自己置業目的。
若為自住，你只考慮佢長線配唔配合到你生活所需，另外能否長遠都"供得起"，基本上就可以。
但若從投資角度，現時香港整體租金回報率不高，投資值博率不及優質股。
如果你係因為政府新政策，預期北部較接近內地樓盤會受惠。你就要分析得好清楚，因為政策好多都係大方向，未知落實對沙頭角有無明顯正面性影響。
現時計，這區接近內地，有利有弊，因為近內地，對部分人來說是方便的，同時令這區產生一定的經濟活動。
但始終跟香港傳統商業區，有很遠距離，暫時睇升值能力唔算好高。
Q23724：
你好，龔成老師，我想請教股息定年報酬率比較重要，現齡28歲，我主要投緊資ETF
龔成老師︰
你28歲，是增長重要過股息的。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時28歲去計，是財富增值的黃金時期。因此，你應集中在資產增值(即年報酬率)，而非收股息。
策略上，你可以投資「平穏增長股」和「潛力股」。
若你現時對股票唔係太認識，可以先用ETF作目標。另外，用每月儲蓄，去累積優質股。
你每月5成儲蓄做月供。其餘先儲起，用一邊月供一邊儲蓄的策略。
例如潛力股，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。
如果你無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。
到你有一定投資知識﹐潛力股比重可以相應調高，佔組合約3-5成，視乎你當時投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
Q23725：
龔Sir，你好。我今年27歲，投資新手，打算以每月$10000開始月供港股
$3000 盈富基金(2800)
$3000 安碩恒生科技(3067)
$2000 煤氣(0003)
另外$2000打算供中銀香港(2388)或中國銀行(3988)
想請問老師應該係2388/3988中揀邊一個？
3988吸引我既地方是佢派既股息，但好似唔多人揀佢…. 請指教
另外我呢個月供組合可以嘛？唔該
龔成老師︰
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時27歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
你現時月供選擇都正確，至於中銀香港(2388)定中行(3988)，我會建議用前者。2者都有質素，但中銀香港(2388)較具增長潛力，比較適合你年紀。
但留意，現時大市只在合理區，每月儲蓄唔好盡用，要留有部份，等出現大跌市時，可以入市掃平貨。
Q23726：
阿sir,中芯國際前景好嗎？
值得長線持有？
龔成老師：
中芯國際（0981）業務有增長力，但未必能稱為好優質的股。
睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。
雖然這股都有前景，但以佢面對的情況，但好難將佢定義為最優質的股票。
加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，現價約在合理區頂。
Q23727：
龔成老師你好，我今年25歲，每個月可以儲三萬元。Follow左你一段時間先發覺投資增值既重要性。
- 我想每個月投資兩萬元股票，你建唔建議全數用黎月供股票定係有其他投資方法？
- 另外，我對股票投資方面唔太認識。請問你有無邊種「平穩增長股」及「潛力股」的月供股票推介？ 龔成老師︰
我會建議你先用優質股，去累積財富。到你有一定投資經驗和本金，就可以再考慮其他優質資產項，例如物業、生意等等。
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
你25歲，應以增值為主，建議你用「平穏增長股」 + 「潛力股」作組合，去創造一個增值平台。
現在你每月先用$20000做月供，其餘$10000就先儲起，用一邊月供一邊儲蓄的策略。
由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
同時間，你要把握自己年青優勢，好好提升自己投資技巧，去令長線回報更理想。
你要去多讀投資相關書本、年報，新聞和課程。
書本上，你可以睇我寫架"80後百萬富翁"、"財務自由行"和"股票勝經"，都適合初學者。
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q23728：
你好，3175點睇，最近上好多
龔成老師：
Ｆ三星原油期（3175）就是追蹤標普高盛原油額外回報數之表現。
但要留意，當中有點複雜，唔止關油價事，仲有考慮轉倉成本等因素，價格與期貨有關，而期貨會到期，所以要不斷轉倉，而轉倉要成本，就會令這基金價值減少。
近期由油上升，佢受惠，但一定要記住，佢唔能夠完全追蹤到油價，加上中短期油價會好波動，風險較高，如果油價不利，每月有成本，就好難守。因此，一定唔可以大注。
Q23729：
請問美國加息，對香港科技股會否有負面影響？
龔成老師：
對全球的科網股都有影響，因為當中不少股，佢地這刻無盈利或好少盈利，估值主要是將來的現金流，因此當加息，對折現會有較大程度的影響。
美股科網股，由於估值較高，影響會較大，香港的科網股，由於近半年已有調整，影響反而無咁大。
不過，市場是複雜的，如果加息的力度市場已預期，又或企業將來的現金流有理想增長，股價就不一定會大跌。
Q23730：
成哥，511Tvb！其實有冇長遠投資價值？吾懂看！
龔成老師：
投資價值已經不高，年輕人對佢喜愛度不足，現時選擇又多，佢已無左過往的優勢，不建議投資。