Q43231：
其實合股有咩好處呢？
對持貨者有咩影響呢？
龔成老師：
合股好處是「股價數字大D」，好睇D，對企業實質價值無影響，只是數字遊戲。
持貨者，總權益不變，例如10合1，你原本持有1000股，之後會變成100股，而股價會增大10倍，但實質條數一樣。
Q43232：
老師早，想問一下我點睇PFE輝瑞？現價可以？好似幾高息
龔成老師：
輝瑞公司 (PFE)有質素，佢是一家全球研究型生物製藥公司。
集團主要從事醫療產品的發現、開發及生產業務，其全球產品組合包括藥品和疫苗。長遠正面，企業的研發能力強。
此股有一定投資價值，但礙於業務性質關係，盈利方面會較為波動。現價算合理較下部，可分注或月供儲貨，並長線持有。
但由於業務上都有一定不確定性，令投資風險增加，故不宜太大注。
Q43233：
早晨阿sir, 點解2800同388 - 5年平均股息率唔高過3%，都仍視作為一個好嘅收息股？係咪因為企業性質原因？
龔成老師：
其實盈富（2800）是基本增長類加收息股，如果收息，高息基金（3110）會更好。
當然，盈富有約3%股息，加上過往幾年派息大致穩定，所以都算增長及有股息類別。
至於港交所（0388），其實是平穩增長類，不過佢派息比率每年都有9成，即是賺多少派多少，但由於股息率始終不算高，因此不是收息股類。
Q43234：
你好，老師，我有一啲MPF嘅問題想請教。
我今年40歲，希望可以55-60歲可以退休，我由2005年開始，公司加埋我每個月大約供款$8000，而家MPF大約有216萬，其中76萬係賺返黎。現在MPF分配為，50％ 恆指基金，其餘50％平均分別為中港股票基金，北美股票基金，歐洲股票基金。
如果黎緊恆指重返30000點，請問我嘅MPF如何部署？
懇請老師指教？
龔成老師︰
強積金的配置並不複雜，首先要注意，強積金是一個超長線投資，因此不宜做中短期炒賣，不用以預測投資市場的走勢去將強積金轉來轉去，除非你很確定，現時的投資市場明顯平，或明顯貴，否則在大部分情況，強積金不用轉來轉去
其實，你只要按你的年齡階段，去進行分配就得，年輕時較進取，到了中年就以平穩作配置，到退休前5-10年基金配置就要趨向保守，為退休做準備。因此，你只要按年齡做好配置，並且因年齡漸增，慢慢將強積金轉為較保守類別就得。
另外，在股票配置的部分，你可以考慮環球股票，又或以中國+美國作為核心，因為這兩在往後10年，都是全球兩個最大的經濟體，你同時持有可以。
其實強積金，著重配置、平衡，不著重炒賣。要考慮長期配置的模式。
你現時配置，大致可以。
至於退休，你要計清楚自己開支。
若你希望退休後，每月有2萬蚊現金流，以股息率6%計，你需要本金400萬。因此，我地要以這400萬作為目標，透過一些有增長力的股票，去累積這筆資金。
到你退休時，再將這些有增長力股票，換成為收息資產(如收息股、年金、債券等)，去創造你需要的2萬蚊現金流。
Q43235：
老師，我未接觸過美股，我應該買哪些美股，我有研究coinbase, NVDA,ASML,TSM, MSFT, QQQ, 但係已經升左好多，應該點入手？ 謝謝
龔成老師︰
如果你未接觸過美股，我建議先用指數ETF。
因為指數ETF係一籃子不同行業架組合，具放散風險能力。就算當中個別股票出問題，對成個ETF都唔會有嚴重影響。
例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800），都係指數ETF類別。這些ETF有質素，適合一般投資者選擇。
若你未有定平貴能力，可以用月供或者分注模式去儲貨，去平衡買貴貨風險。
如果想知多少少，VOO或者指數ETF係乜，可以睇翻我之前架Youtube影片︰
https://www.youtube.com/watch?v=RnYZQlSG8qA
至於你提到的股票，都有長線投資價值，但風險較都高，始都是科技股。而coinbase風險度高。
若果你無太多投資經驗，不太建議投資住，最多小小注入貨，或者用長線月供模式儲貨(最少供3年和持有5年)。到有一定投資經驗，才再考慮。
坦白講，如果你無投資過美股，買之前，最增加你的美股投資知識先。
Q43236：
龔成老師，想請教你，本身買左自住居屋（未補地價）自住6年，因唔夠住，已搬離。
居屋樓齡6年， 如果丟空，每月要供款$13k, 如果賣出去，應該只賣到原價或比買入價多幾十萬。
請問你認為未來20年都唔會搬返入去住，咁應該繼續保留居屋 (第時退休可住 或 俾仔女大個後住）， 定係賣左佢好？
如果第時樓價會升，好似保留好d, 但我睇唔清第時會唔會再大跌🙏
感謝你！
龔成老師︰
首先，我自己預期未來香港樓市，只會係平穏發展，唔大升，同時唔會大跌架格局(唔會好似過去20年咁一直升)。
居屋，自住價值仍在，但投資價值一般。
所以，你要好好想清楚，這居屋你長遠算怎樣，當一個投資項目，一直持有？還是有其他可能性。
如果你只打算持有作投資，長遠財富增值，我偏向建議你沽出這個物業，將資金投放係其他更具增長力的地方，咁會對你長線更有利。
不過，如果你現時只係租屋，而居屋是你唯一物業，同時你又預將佢會用佢作退休居所的話，可以保留。
所以，你一定要想清楚，自己的大方向，住屋計劃等。
再問：
如果未來20年會丟空，將來才入住， 係咪其實應該拎舊錢出黎投資股票， 將來再買返私樓黎住呢？
龔成老師︰
如果20年會丟空，我會建議賣出，將資金做投資（不用太進取，要基本增長），期間的增長及股息回報，相信會大多你居屋20年後的價值（加上物業都會貶值），即時你到時才買翻物業，會更好。
Q43237：
龔Sir,請問你點睇美股小馬智行(PONY)？現價算貴嗎？
龔成老師
Pony AI（PONY），小馬智行公司，成立於2016年，總部位於廣州。
小馬智行主要從事自動駕駛技術開發，圍繞自動駕駛出行服務、自動駕駛卡車、乘用車智能駕駛等業務，公司推出Pony Robotaxi及Pony Robotruck等自動駕駛車隊。
Pony Robotaxi已在北京、上海、廣州及深圳提供服務，Pony Robotruck也已投入運營。
小馬智行於大陸地區主要是與豐田汽車合資成立公司，致力於大陸市場的無人駕駛計程車量產與部屬。除大陸市場，公司也逐漸拓展業務至東亞、歐洲及中東等地。
分析現時的財務數據及發展情況，其實企業都有發展力的，但始終這是較新興的行業，是否有好大優勢，以及之後的競爭情況，都有未知數。
因此，這股投資都可，但暫時只能小注進行，同時要明白風險會較高。
Q43238：
如果工行和中銀比較
哪一個比較值得投資？
龔成老師：
你預工行（1398）收息會較穩定，而中銀香港（2388）就有收息及基本增長力，所以，都要睇你的投資目標。
兩隻都有質素，現價都合理的。
Q43239：
你好，我沒有任何投資經驗，可以上你的課程嗎？
龔成老師：
可以，因為股票基礎班是入門課程。
正正適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。
每一課有兩份筆記比你，並有指引，要你在一星期內找那些資料，溫那些內容，做功課等。
每一堂更有一個附加的網上影片，是大約30分鐘的重點重溫片，可比你在家溫習。另外，每一堂都有簡單功課要你做，並有附加影片解說答案。
只要你跟著去完成，就能掌握整個課程所學。到你讀完後，你能自己選股、投資時機、配置、評估平貴，在投資上已掌握了一定的知識。
Q43240：
你好啊龔sir，我4. 23買左386，我想問下價位合理嗎，另外想請問你的目標價係幾多呢？
其次，呢個係投資問題，想請教如果目標價到左應否放一半做流動資金定揾下一隻股票呢？謝謝。
龔成老師：
你的買入價合理，同時企業有質素，在大方向上，可持有。
雖然現時上升左，但未貴，在合區內，中石化（0386）有質素，但不是高增長類，投資者可以視為收息股。
中石化是中國最大的石化產品生產商，在中國成品油生產和銷售中佔有主導地位。主要從事的石油和天然氣和化工經營業務包括：（1）勘探、開發及生產原油及天然氣；（2）煉油、運輸、儲存及營銷原油及石油產品；（3）生產及銷售部門在中國擁有和經營油庫和加油站；（4）製造和銷售石油化工產品、衍生石化產品和其他化工產品。
你如果不是進求高增長，而是收息，其實這股可長線，暫時無話甚麼目標價。
至於另一問題。
如果優質股並且有一定增長力，大方向可以長線，當然，你到目標價可考慮賣部分，留部分。
你要明白，賣出股票後，股價有可能再上，而你將資金轉投資另一隻，是否增長好過原有的？你要好好思考這個問題。
當一間企業發展力理想，就算股價再升，也不一定貴。