Q19021：

你好，sir，想了解288，佢係豬肉鏈產業龍頭，佢擁有70%子公司雙匯股份，點解佢子公司嘅市值已經越過288依嫁市值？

另外想問點解雅生活都高過雅居樂集團嘅估值，感謝龔sir

龔成老師︰

有幾點要留意的。

首先，你平時睇的財經網站，佢計市值的公式只計該地股票，例如一間公司在1000股，其中100股在香港發行的H股，佢就只會用100股去X股價。

同時，「股價」係市場給予企業一個評價，可以係主觀的。

只要投資者較睇好雙匯（000895.SZ），佢市值係絕對可以高過萬洲國際（0288）本身。你可能會覺得奇怪，但的確係會有咁架情況。

同埋市場上經常有同一間公司，國內股貴過港股的情況，因為市場情況始終不同。

因為當中有不同的資產負債情況。例如子公司值$100O億，就算母公司全資持有，但母公司的負債有$900億，其實母公司只值$100億。

雅生活（3319）和雅居樂集團（3383），情況都係一樣。

Q19022：

本人20歲頭 已出社會工作 每月人工扣除強積金後 大約有$17000 扣除家用 雜費 大約有 $12000淨

現持有現金6萬左右

一年前做了一份15年的儲蓄保險 每月供2000元左

但半年前開始接觸到你 再加上發現我這個年紀做儲蓄保險是否一個弱智的投資？

所以想問下你 我係咪應該斷供儲蓄保險 用果舊錢轉去月供股票？謝謝你

龔成老師：

以你的年齡，的確應該投資增長類工具較多，而上述這些儲蓄保險，是一些防守性的投資，未必最適合你。

不過，這類工具又不是完全無用的，因為我地理財，應該攻守兼備，做好防守部分後，就可以進攻，但防守部分，不用多，「足夠」就得。

每月$2000，並不算多，因此，你都可以繼續供，視為財富配置防守的部分。總之，之後唔好再加就得。

而之後的資金，就可以集中去月供股票、投資股票，集中進攻的部分。當然，都要用時留有現金。

Q19023：

龔老師您好！我一向都有做開投資，但回報總係不似如期，所以想請敎如何改善我嘅portfolio。

現金：8萬左右

股票：2萬左右（3033-7.85蚊入、6060-49蚊入）

外幣：太約3萬左右

收息基金：4萬左右（年息3-5%)

月供基金：21萬（本金約19萬左右）

儲蓄保險：12萬左右

每月儲：4-5000左右

如果我想用儲蓄保險嘅錢買股票，這個可做法可行嗎？因為保險回報率較低，只有2-3%

龔成老師：

首先，唔好太著重中短期的表現，要睇長線。

上述的分配，要睇翻你的年齡與風險承受程度，先知是否適合。

儲蓄保險是防守性的產品，回報低是正常的，你要著重「配置」，了解翻這個比例的配置，是否適合自己，如果你想進取少少，轉股票是可以，你可以考慮盈富（2800）。

至於你現時持有的股票，基本上都可持有的。

而你的月供基金，則要睇翻這基金的質素，過往回報情況。

Q19024：

龔成老師你好。小弟有八萬現金餘錢，想初追股市市場，可以給我一些意見嘛？

龔成老師：

投資，是一個配置的過程，要睇你的年齡與風險承受程度，建立優質組合，長線持有。

你可以考慮盈富（2800）。

另外再加1、2隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，暫時只建議你動用$40000以下的現金。

而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

Q19025：

成哥, 咁而家揀一隻潛力股黎供嘅話供1448 好定3067 好d ?

龔成老師：

兩隻都唔算平，如果較為平衡，可以選安碩恒生科技（3067），始終風險度會低少少。這基金適合長期月供，慢慢儲貨的。

Q19026：

呀sir, 想問月供股票需要每月記錄購入的價格嗎？還是由得佢每月購入？

另想問現在供緊的未補地價居屋，自住，是否不屬於資產？

而家領展同小米是合理價嗎？

如果暫時組合是這樣有問題嗎？

領展 2手

小米 2手

盈富 - 月供 $1000

匯豐 - 月供 $500

想快d聽你介紹水桶2

龔成老師：

你唔需要記錄價格，只要不斷儲貨就得。

未補地價居屋，自住，嚴格來說不是資產，不過，這不代表你完全無財富。居屋投資的價值不算高，但卻有自住的價值，因為比起住私樓，佢可以幫你節省到現金流，令你有更多剩餘資金，作投資。

領展（0823）現價合理，小米（1810）就略貴。

現時持有的無問題，但匯豐（0005）只是收息股，增長力不強。

水桶2：盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等。

Q19027：

老師你好，我係你嘅新讀者，今年21歲，本金有10萬，對投資方面嘅知識咩都冇，我唔想盲衝衝咁走入去，我應該點做？

同聽講老師你有出書，有咩書適合新手睇？

求老師指導

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供盈富（2800）。你可以暫時供$5000。

對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上$10萬其中一部分，正式去投資股票。

Q19028：

龔sir，你好，我最近學買股票

中石化(386) 3蚊買入10000股

中海油（883）7.20買入 12000股

永利(1128) 10.78買入 3200股

最近想買隻中短期既，有睇過車股，吉利同永達都唔錯，係咪買新能源車會比較好D？請多指教

龔成老師：

上述的3隻股票，都算有質素，不過386、883，你預長遠增長力不算強，收息可以。

以中國海洋石油（0883）來說，雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

另外，我唔建議短線投資，好難玩的。中國的車股部分唔貴，如高追要小心風險。

Q19029：

老師，我已入2手阿里巴巴，暫時仲有一手港鐵，一手網易，同月供3 + 823，仍有25萬現金，想慢慢入市，之前銀娛係52.5買左然後升左之後賣左

第一次賺幾千蚊，雖然好少，但好開心

呢家仍有現金，可以既話想入騰訊，比亞迪，但一直較高位未敢入，亦怕科技股會否較多，老師覺得組合仍可加入邊種？如中國平安，電能置業，長實，AIA又好唔好？又或仲可加入邊隻好。感謝老師

龔成老師：

你現時持有的都是有質素的股，可以長線投資。

投資賺錢的確開心的，但之後要慢慢學會長線投資，回報會更高。

至於加那類型股票，建議你先加一些平穩增長類，例如盈富（2800）、銀娛（0027）、恆基（0012）、港鐵（0066）、平安（2318）、長實（1113）、電能（0006）、友邦（1299）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

至於潛力股如比亞迪（1211）由於現價唔平，加上這類股要求你的投資能力較高，所以遲少少先。

Q19030：

龔老師你好! 我是你的學生現年53歲, 以前一直工作沒有規劃好自已財務狀況, 前二年睇到老師文章覺得很有道理及開始規劃理財, 並於2019年初開始月供股票, 祥細如下 :

1)0003 中華煤氣 - $5,000

2)0027 銀河娛樂 - $3,000

3)0939 建設銀行 - $4,000

4)1211 比亞迪 - $3,000

5)2800 盈富基金 - $5,000

6)0388 港交所 - $4,000

7)0823 領展 - $3,000

8)0066 地鐵 - $3,000

問題 :

1. 請問老師這月供股票組合分佈有什麼意見?

2. 由於現價比亞迪己漲了不少, 月供金額有否需要減少轉投其他股票上?

麻煩老師提供意見!

龔成老師：

1）你上述所供的，都是有質素的股票，基本上可以長期進行。全部股，都建議你長期持有。

整體的財富分配無問題，不過以你的年齡，其實可以開始加翻D收息股。

2）比亞迪（1211）你可以減月供，或停一停，可考慮將資金轉到收息股。

但要留意，唔好將所有現金都投資股票，留有部分現金都是需要的。