Q45820：
龔成師傅，
有事請教， 我買咗少少農業銀行1288 平均價五點五元，
現在見他回落不少 ，這隻銀行股可以長揸嗎？前景如何， 請問佢年息有幾多厘，謝謝🙏
龔成老師：
農行（1288）收息可以，但增長力不算強。只要貨不是過多，可持有，長線收息。現時股息率約5%。
近年的內房負債問題，以及延伸的資產風險，的確會影響到內銀的壞賬。而在4大內銀當中，農行的壞賬問題相對較高，因此的確有壞賬增加的風險。
不過，內銀的壞賬問題、農行的壞賬情況，並不是今天的事，市場已經反映了相關因素，股價在估值方面，已經反映了相關因素，同時由於農行規模大，以及過往壞賬控問題未到十分嚴重的程度，因此大部分負面因素，其實已經反映。
因此，除非內房等負債問題明顯惡化，否則，股價最多只是調整，並不是大跌。
以長期及整體的角度分析，農行本身都有質素，有一定的規模，不過，這股增長力不算強，可視為收息及基本增長類。
前景算是不過不失，中短期會因中國經濟而受影響，但相信持續好轉。所以有長線投資價值。
Q45821：
龔生，請問如果想投資AI/晶片股，請問可以考慮邊隻？
雖然資金唔多，可能預一手係10000左右？
龔成老師︰
如果你資金唔多，可以長線用月供儲貨，佢可以唔洗一手/一股股買。
你每月定一個投入金額，佢就會按當時市價，去幫你按比例入貨。
一來，可以在有限資金下儲貨。二來，長線咁慢慢儲，可以拉平均個買入價，去平衡你買貴貨風險。
至於目標，你可以參考以下。但相關股份都係高風險，你係初學者就小注好了。在未有太多投資知識前，建議先集中指數ETF，如2800/VOO。
其實AI有好多相關企業，分布係不同的範疇。不過，具體講係好複雜，因為唔同架企業，係AI架業務和應用程度都所不同。
[部份可考慮AI企業，不過留意近期佢地都升左唔少，只宜分注慢慢儲貨。]
上游設計晶片相關︰NVIDIA(NVDA)、AMD、博通(AVGO)
中游生產晶片相關︰ASML、台積電(TSM)、中芯(0981)
下游提供或受惠於AI應用︰META、Microsoft、Google、AMZN、PLTR、9988、1810、1211、9888。
你可以因應自己認知和想法，去到決定投資邊樣企業。
如果你無太多想法，純粹睇好AI發展，可以分注咁儲佢架ETF。但始終AI發展潛力係有，但不確定性都高，所以不能過於進取。
以下是AI概念股分析影片，你可以睇下︰
[硬件類] https://www.youtube.com/watch?v=t0BCLLyOfs4
[應用類] https://www.youtube.com/watch?v=P_K-5riMDjI
[部份AI相關ETF]
(i) 美股︰Global X Robotics & Artificial Intelligence ETF(BOTZ)主要投資於可能從機器人技術和人工智能 (AI)利用中受益的公司，包括那些涉及工業機器人和自動化、非工業機器人和自動駕駛汽車。
前十大持股包括NVIDIA(NVDA)、直覺外科(ISRG)、KEYENCE CORP(6861.JP)、ABB LTD(ABBN)等大型企業。
此股有一定投資價值，但不確定性高，市場對AI未來發展其實未有具體的想法，所以有少少係"估願景"。
另外，要留意多一點，就是此ETF前5大股票佔去整個組合4成半。所以，這5間公司表現，好直接影響到ETF的升跌。
總括而言，你投資係可以，但不宜過份進取。
(ii) 美股︰iShares未來人工智慧與科技ETF(ARTY)，基金是追蹤Morningstar Global Artificial Intelligence Select Index。
前十大持股包括NVIDIA、AVGO、META、AMD、Google等大型企業。
此股有一定投資價值，但不確定性高。投資係可以，建議用分注去慢慢儲貨，同時控制注碼。
(iii) 港股︰Global X 中國機械人及人工智能ETF(2807)，主要投資於對中國機械人及人工智能的發展和普及至關重要的公司。
當中包括主要業務為用於工業機械人和自動化的硬件及軟件開發、非工業機械人、自動駕駛汽車和人工智能產品之公司。
組合當中，以資訊科技為主，佔組合6成半。
前十持股包括百度、中際旭創、NARI Technology、海康威視等。
如果你睇好內地AI行業發展，同時又能承受風險，可以小注而隻ETF。不過留意，佢成交唔多，有機會買賣差價偏大，影響回報。
Q45822：
老師，隻携程最近跌了不少，現價合理嗎？我一股都沒有，現價值得開始分注嗎？
龔成老師：
其實攜程集團（9961）股價大跌，是因為受查。
中國國家市場監管總局最近公告，根據前期核查，依據《中華人民共和國反壟斷法》，對攜程集團有限公司涉嫌濫用市場支配地位實施壟斷行為立案調查。
相信這動作，都會對短期股價有影響。至於長遠，就要睇事件發展，相信不會有太大核心性不利，但都可能對賺錢能力有影響。
因此，都要觀察事件發展。
潛在罰款：根據《反壟斷法》，罰款金額通常為上一年度銷售額的 1% 至 10%。
花旗預估罰款可能在 4.9 億至 49 億元人民幣之間。
摩根大通則預計罰款最高可能達 62 億元人民幣。
--對質素有否影響？--
如果以本質來說，攜程集團（9961）仍有質素，相信今次最終結果，較大機會是罰錢，會影響盈利，但最重要是，之後的市場的地位有無影響？
投資者要留意之後的監管，會否令行業情況出現改變，令這企業賺錢能力減少。
如果一些政策令企業賺錢能力受長期影響，企業價值就會略有影響，以初步受查情況分析，相信這可能性都存在。
不過就算如此，長遠攜程在市場最強市佔率地位，相信不會改變，只是賺錢能力受影響，這是較大機會出現的可能性。
因此，企業核心的優勢仍在，但之後的賺錢能力，受影響。
簡單來說，企業估值會減少，但長遠投資價值仍在。不過，最終情況要持續觀察才有答案。
--攜程長遠仍是有質素--
相信長遠，這企業仍是有質素，企業是全球領先的一站式旅行平台，可提供一套完整的旅行產品、服務及差異化的旅行內容。
用戶可以通過平台進行任何類型的旅行預訂，從目的地內活動、週末短假及短途旅行，到跨境旅遊及商務旅遊。
產品及服務組合涵蓋經濟、高端、定制化及精品產品。集團經營一系列品牌。根據報告，以商品交易總額（或 GMV）口徑統計，佢係過去10年內一直為中國最大的在線旅行平台，近年更為全球最大的在線旅行平台。
財務數據方面，收入都有不差的增長，但盈利就比較波動，有時會出現虧損，反映企業仍處於投資期。
其中一個影響這企業的賺錢能力，以及競爭力的因素，是的有關經營效率，而這方面攜程處行業領先情況，例如，這企業利用人工智能技術，加上從過往經營中所積累對旅遊行業的資料，令這攜程能夠策劃出合適的旅行產品及向用戶提供個性化推薦，為平台創造大量交叉銷售的商機。產生這企業的優勢。
這企業有獨特性，長遠有投資價值，但風險會高少少（特別是中短期，對受查的不確定性），同時估值方面會較難，變數增加，始終財務數據波動較大。
現價算是在合理區中間，如果有興趣的投資者，都可考慮分注投資，長線持有，但要明白中短期風險因素。
Q45823：
小弟應該會去放咗2成金銀，資金買小米定係銀行股好？thank老師
龔成老師：
減持部分白銀是可以的，最重要是留部分銀，長線。
至於資金點處理，好睇你的投資目標及風險承受程度，如果你年輕想博，小米可以，如果你想穩收收息，銀行股較好。
Q45824：
老師,你好,
如有現金300萬,欠銀行樓按本金256萬,仲有12年供,每月約2萬,請問老師會如何做法？本人將近退休.
例如
1.一次性還樓按
- 仲有200萬買3416這類ETF來供樓按
3.還樓按100,余下50萬投資ETF取高息及其他股票買賣
4.其它？
龔成老師︰
而個係機會成本問題，最重要睇你投資知識水平。
如果你投資經驗淺，或者好保守，都可以加快還款。因為投資存在不確定性，但省下來的供樓利息，郤是保證。
相反，你係有一定投資經驗和能力﹐就應該保留較多資金，去進行投資增值。
所以，你可以因應自己情況，去決定還款投入資金比重。
不過，考慮到你就退休(當你3年內)，其實可投資時間唔長，就算投資優質股也會承受一定波動，故主力還款會係較安全做法。
(當然，如果你用來退休本金尚有明顯缺口，則保留投資會較適合。)
Q45825：
你好龔老闆，小弟冇咩背景，讀書只係普通HD
而加想學理財同AI, 由於睇左富爸爸 明白到資產嘅重要，行動力等等
如果有一舊錢 應該點樣去投資中高風險嘅股票比較好
我目標係資產生產嘅錢 / 股息 夠超出支出 （租金,食，學習既費用，想自己慢慢做一個老闆）
龔成老師︰
作為一個初學者，你先要做三樣野。
第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《圖解股票小百科》適合初階者的。我Youtube Channel都會不時分享一些投資技巧和知識，你都可以睇下。
https://www.youtube.com/@%E9%BE%94%E6%88%90%E8%80%81%E5%B8%AB%E8%87%B4%E5%AF%8C%E5%B9%B3%E5%8F%B0
第二，了解銀行及證券行，去開一個證券戶口，並準備做月供股票。
其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。
第三，將每月的部分資金，去做月供股票，供一些指數ETF，如港股盈富（2800）或美股VOO。對初階投資者來說，月供股票是一個很好的累積財富方法，因為可避免你一次過在高位買入的風險。
原理如同儲錢，不過就不是儲現金，而是儲股票。計劃要長期進行。
另外，盈富、VOO是一個股票組合，適合絕大部分人投資，風險不高，長期儲貨可助你財富平穩增值，記住要長線持有。
當你在做上述三件事的同時，開始學下股票，了解下那些股票適合你自己。上述只同你簡單供盈富、VOO，當你過幾個月，有知識及少少經驗後，就可以利用你手上的資金，其中一部分，去投資股票。
另外，你可以睇下而3條影片，相信對你了解指數ETF、長線投資和複利效應而2個重要概念，會有幫助︰
https://www.youtube.com/watch?v=nBr4tCJ__oY
https://www.youtube.com/watch?v=ZaVTKyodNCg
https://www.youtube.com/watch?v=xm1dx0A2Q5k
Q45826：
銀行股應該揀一隻，還是分散幾隻好？
龔成老師：
分散會較好，始終集中一隻風險較高。當然，不用胡亂分散，選自己較睇好，質素較高的2、3隻都得，最重要是控制總投資金額。
Q45827：
Hello 老師你好, 我收到你果12隻股票推介, 首先多謝你~
不過今次搵你係想請教小小股票周期既問題,
其實想問番中港股市呢5~6年黎都係一個股災既情況, 直接上年先至好左好多. 咁我記得你都有講/教過就係股災買貨既賺錢機會最大, 例如恆生指數10倍PE, 或者聽到D人遠離股票. 但係想知其實好多時點樣可以知道係底部呢?
舉個例, 1999年科技股爆破, 好多人都以為係機會, 但係一直跌跌到03年沙士仲係低位. 今次中港股市都係, 好似阿里巴巴由280跌到200好多人入市, 點知跌到150左右以為冇得再跌, 點知跌到60蚊仲維持左3年有多, 今年先最高見180但仲有好多人未到家鄉,
想知道其實好多時係中港股市中以為係底, 其實都仲未到, 有冇咩方法可以知道係真正底部?
而且根據你既經驗, 中港股災係咪都會維持一段比較長既時間?
其次就係同上網問題有小小關係, 想請教下你既現金比例, 因為係一兩年前我問你地同事拎你5隻推仲既股票, 你寫小米時你有講近年既資金都去買美股, 不過小米係你唯一有加注既港股. 想知道你一般會維持現金水平幾多%去買貨? 點樣有效運用手上最後一筆現金?
龔成老師︰
其實無人會知真正架底部係邊，包括我在內。
你見巴菲特佢做買賣，好多時完成後，都仲會有明顯升/跌幅。
因為價值投資，唔會估底，只係從佢平貴度，去慢慢調整持貨比例。
例如去到30000點，就慢慢減持。回到20000點頭，開始慢慢儲貨，係無問題。
但唔係all-in，因為未開始平。你見我係FB，都係18XXX，才叫大家開始可以考慮大力點部署。
至於現時已經唔係股災水平，大市已經重回合理區。不過，要長線大升，要有經濟配合。
但內地以至全球，經濟都係弱，仲有好多不確定性因素(如戰爭、關稅等)，所以未來仲會好波動。
我現時現金比例，大約2成。
到大市有好明顯回調，或者個別股票出現不合理調整(但長線質素還在)，我就會出手。
Q45828：
Sir早晨，我係退休人士，想買高息，有冇好推介？謝謝
龔成老師：
投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。
你可以建立一個收息股的組合，目標是5%以上股息率的收息股，以下可以參考下，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
3110可以視為收息股的組合中其中一員。這基金可投資的，現價合理，可分注。佢是投資香港大型，派息較高的上市公司。
這是不差的收息組合，但增長力不強。
Q45829：
龔Sir,我有啲懷疑其實價值投資法係咪美股比較實現到，港股比較難啲，必需升到咁上吓即拋呢？因為通常港股升到咁上吓，就會落返原位，呢樣嘢其實好多年都係咁，以前京東$300+，美團$250+，騰訊$700+，而家都回落好多。
龔成老師：
其實價值投資法，並不是不賣出的。價值投資法的核心，就是「買股票就是買企業」，買入後耐心持有，但當企業升到貴的時候，就可以賣。
當然，如果我地持有一隻長遠增長力強的企業，就應該長線，平常心面對短期波動。