Q43211：
龔sir 巴群 b 溢價跌緊，有冇咩價位適合大手？ 還是都係分注？
龔成老師：
慢慢分注，因為巴菲特退休，巴郡裡的「巴菲特溢價」不斷減少，而當中仍有幾多要減，無人知，但你會見近幾個月，都出現了美股升，巴郡跌的情況，即是「巴菲特溢價」仍在減少，所以買入要慢慢分注（不要急，不要大手）。
Q43212：
老師，建行爆升，你會否建議高價放部份股票
龔成老師：
之前股價較低，原因是市場擔心壞賬爆等因素，但之後情況穩定，估值得重估。
現時其實未貴，只是合理，當然，之後股價較難有高速增長（之前高增長是估值重估），之後要推動股價，就要有更多實質業務發展。
這股長線收息都可，但如果你想減部分，都可以。
Q43213：
老師，想問問隻823和836，邊一個比較有投資價值
龔成老師︰
0823係平穏增長股，0836係潛力股，你先要分清邊隻較適合自己背景。
至於投資價值，2隻近年都有佢架不利因素。
0823︰香港物業長線發展只會平穏，加上消費者消費模式改變。未來要睇經濟，同埋佢海外發展狀況。
0836︰產能過術、地緣政治風險影響緊佢部份業務。
Q43214：
你好， 龔Sir，想建倉ARK, QQQM or IBIT ETF。 那個ETF 有較大增長潛力？ 那你比較穩健？
龔成老師︰
ARK Innovation ETF(ARKK)主要投資一些創新性產品和服務的基金，是一隻潛力與風險並存的ETF。
主要持股包括潛力股，如TESLA、ZOOM、COINBASE、UNITY等等。
此基金有一定不確定性，要精準地估值係好難。
由於基金是主動型基金，當中的組合會改變，同時好睇基金經理的投資策略，因此，不單是考慮當中的資產，同時考慮「基金經理」。
因此，較難定義平貴度，但如果再考慮基金經理的策略，就較難有答案，例如佢賣出了部分股票，平貴度就會改變。
而QQQM和IBIT相比，IBIT潛力和風險都係較高。
你要記住，潛力股不確定性大，如果發展好，固然可以好好賺。相反，發展不似預期，佢地架股價都可以跌好深。如果你投資經驗不多、較年長、或者投資取態偏保守，潛力股只宜少注。
但算你好年青，又有經驗，都不宜佔組合一半以上。
以下是其他潛力股，你可以睇下。
潛力股︰
例如指數基金，美股可投資納指基金（QQQ），或在港上市追納指基金（2834）、港股則可考慮安碩恒生科技（3067）、中國電車基金（2845）。另外再加：美股如微軟（MSFT）、ASML Holding（ASML）、Tesla（TSLA）、Amazon（AMZN）、港股如騰訊（0700）、比亞迪（1211）、小米（1810）等，你可以了解下，並從中選股，但佢地波動性和風險會較高，要自己平衡。
但我建議你長線用平穏增長股作主力，你組合才會較穏當。
平穩增值股︰
指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、港交所（0388）、長建（1038）等，你可以了解下，並從中選股。
Q43215：
我都5X歲聽你講財務自由,我可以唔吏做野,你話都有一定收入,但我得幾萬元有冇可能發生,因為我出來賺錢一定要受老闆氣,但我不想在人事複雜環境工作,我有冇可能實現財務自由生活
龔成老師︰
有，但你要清楚自己財自目標，同埋要認真學好當中技巧。
若你希望退休後，每月有1萬蚊現金流，以股息率6%計，你需要本金200萬。因此，我地要以這200萬作為目標，透過一些有增長力的股票，去累積這筆資金。
到你退休時，再將這些有增長力股票，換成為收息資產(如收息股、年金、債券等)，去創造你需要的2萬蚊現金流。
但你要明白，始終你隔離退休時間，唔算相當長。所以要努力每月空出最多資金，同時在退休生活開銷上有所平衡，才大機會做到。
以你5X歲年齡，可以投資「平穩增值股」進行增值。
策略上，你每月5成儲蓄做月供。其餘先儲起，用一邊月供一邊儲蓄的策略。
平穩增值股，例如指數基金，美股如（VOO）、港股如盈富（2800），另外再加：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、港股如中銀（2388）、港鐵（0066）、恆基（0012）、港交所（0388）、領展（0823）、長建（1038）等，你可以了解下，並從中選股。
同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）、高息基金（3110）都可以，你可以了解下，並從中選股。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
我假設投資回報有10%（連股息再投資），你每月投資$12000，10年後大約會增值至210萬。
記住，唔好睇少複利效益架力量，只要時間夠，就算金額和回報率不多，也可以產生唔錯效果。
我建議你睇翻以下Youtube影片，相信會對你有幫助︰
[複利故事] https://www.youtube.com/watch?v=ZaVTKyodNCg
[巴郡跑贏美股100倍] https://www.youtube.com/watch?v=xm1dx0A2Q5k
不過，我比較擔心一點，就係我見好多你而個情況架個案，最尾會感得咁做增長太慢，不如短炒博下，最終輸錢收場，令到情況不單無轉好，反而去到一個不能回頭的地步。
希望你引以為戒，不要走錯同樣的路，加油!!!
Q43216：
老師,可否分析下關於香港稳定幣概念股？哪一隻值得投資,謝謝！
龔成老師：
穩定幣（Stablecoin）是一種價格相對穩定的加密貨幣。
現時主要分為三種類型：
-
法幣擔保型：最常見的類型，也是現時各國主要討論想應用的類型︰例如 USDT（由Tether公司發行）、USDC（由美股Circle發行）。它們聲稱每發行一美元穩定幣，背後就有等值的美元或美債存放在銀行帳戶中作為擔保。
-
加密貨幣擔保型：例如DAI，它以其他加密貨幣作為抵押，透過智能合約來維持穩定。
-
演算法型：不依賴實體資產，而是透過演算法調節供需來維持幣價，例如曾經崩盤的 TerraUSD（UST）就是這一類。
穩定幣設計目的，主要是因為加密貨幣絕大部份幣價都好波動，令到投資和應用加密生態的人承受很高風險。而穩定幣則可以提供一個幣價穏定的選擇， 給大家係加密生態應用。
例如你打算買一個電視，如果用比特幣(BTC)做交易，可能一日後，需要支付的BTC數量已經不同。無論對買家，或者賣家都加大了不確定性。
再舉例，例如你本身想投資加密貨幣(特別是在DEFI生態中)，但未諗到買邊隻，想先停迫住等機會，又唔想備用架本金波動太大，就可以先停迫在穏定幣中。
以上是較簡單例子和一些基本概念，其實穏定幣係可以影響一間公司，以至整個金融生態，所以可以講到好複雜。
總括而言，穩定幣你可以當佢係「區塊鏈世界的電子現金」，佢架特性係匯率波動細。所以，係加密生態有一定存在和應用價值。
至於穩定幣相關股票，可以留意下證券行類，但這類股近期都上左好多，雖然穩定幣可以為佢地帶來發展，但具體有多少盈利，無人知，有時可能會超前反映了因素。
Q43217：
龔sir 我對美股非常之唔熟，基本上淨係留意S&P 同納指，想問下呢兩隻都係用市盈率去衡量平貴？
目前水平係處於咩位置？
合理區範圍係市盈率幾多倍？
Thx 感謝解答🫡🙏
龔成老師：
標普500可以用市盈率去作參考，初步推算平貴度，但參考價值不及港股，因為佢經常處20倍以上，經常都唔平。你當現時大約合理區較上部，甚至頂部，投資要慢慢分注，不要一次過大手買。
你最簡單方法，就是投資Vanguard S&P 500 ETF（VOO）就是追蹤美股的ETF，追蹤指數是標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。
至於納指，市盈率參考度比標指更低，可以利用預測市盈率作輔助，但都只是輔助，不能太信。
Q43218：
老師你好呀，想請教下，自從asml出左業績，大致話因為關稅問題所以唔肯定來年嘅業績導致股價大跌，但呢個我認為係短期因素，呢個想法正唔正確🙏🏻因此可否現時視呢個為一個好嘅買入時期？謝謝你，打搞晒🙏🏻
龔成老師：
第一，中短期會有影響，始終業績受到影響，至於長遠，由於佢擁有技術，因此好多企業最終都要找佢，所以影響不大。
第二，反而長遠有一個險，就是中國企業的技術突破，這刻中國在光刻機，無得同ASML比，但由於美國限制，中國只能用自家技術，所以，全力發展相關技術是唯一出路。
如果5年後，10年後，中國這方面技術有突破，就會成為對手，這是一個不利因素。雖然西方國家不會用中國光刻機，但都會有其他國家用。
雖然無人知這情況會否出現或多少年出現，但都是風險，所以在投資注碼上，都要小心控制。
ASML有一定的質素，以及規模好大，有技術，有優勢。
佢係半導體製造中使用的光刻系統的主要製造商。光刻是利用光源將光電路模式從光層暴露到半導體晶圓的過程。
佢個領域的最新技術進步使晶元製造商能夠不斷增加同一領域矽的晶體管數量，而平版印刷歷來佔製造尖端晶元成本的一部分。
晶片製造商需要 ASML 的下一代 EUV 平版印刷工具才能繼續通過 7 奈米製程節點。ASML 的產品用於所有主要半導體製造商，包括英特爾、三星和台積電。
這股有長線投資價值，只是平貴度的問題。這股現時大約在合理區中間，如果本身有貨可長線，如果無貨，可以現價分注，只要不一次買太多就得（因為股價波動），或月供，長線。
Q43219：
你好龔成老師，本人28歲，月入5萬，平日支出約2萬。經歷咗幾年月供股票，想睇翻而家嗰組合有無咩需要變動
現在月供：
388 $1500
1211 $1500
2800 $2500
VOO USD 250
另外見你最近亦建議Coinbase, 但始終而家升到咁高才開始月供會否不適合？同埋都考慮緊月供QQQ 🤔 感謝老師你既意見！
龔成老師︰
你現時月供組合係可以，長線可以加入更多優質股，去令佢更多元化。
至於Coinbase Global Inc（COIN）風險度好高，只宜分注小注，不宜月供。
此企業雖然有獨特性，但真正的長期價值有多少，根本好難估。
佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。
近年BTC和ETH ETF相繼出台，而部份會對佢架託管業務造成正面影響。睇翻現時大部份BTC ETF，都係用佢做託管人。如果未來再有新的加密貨幣ETF要出台，相信集團依然能穏佔一個重要席位。
不過，大家要留意一點。以往好多人投資Coinbase(COIN)，會視之為投資加密貨幣的替代品。但隨著BTC和ETH的ETF出現，佢而個替代品架功能，可以算係完結左。
未來佢架投資價值，就要完全睇翻佢業務和市場發展。
至於它的業務價值，要分析就要睇翻虛擬貨幣長遠發展。
近年佢都開始加大業務範疇，去令收益更多元化。此外，穏定幣應用愈來愈普及，都會對佢架收入有所幫助(因為Circle會有分成比佢)。
再加上，美國對加密經濟政策漸漸明朗化，都係利好佢發展架原因。
不過，大家要明白佢收入來自業務表現，所以長線股價走勢未必一定會同幣價一樣(有機會更高，或更低)。
同埋，始終成個加密經濟好新(雖然已經比多年前成熟)，但本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知。
長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。
因為分析長遠是否好多人用，是非常困難，因此，當中存有相當的風險，當然，潛力同樣都大。
你若睇好加密經濟發展，可以投資。但你要明白成個加密經濟仲係好新，故未來發展的不確定性相當之高。
投資時，緊記要控制注碼，只能投放一個輸左都唔會明顯影響組合的比重，之後長線持有，咁就可以了。
以下是我之前出架COIN分析影片，建議你睇翻，去具體了解翻Coinbase架業務和加密經濟發展︰
https://www.youtube.com/watch?v=XjtOk6ZwtZE
Q43220：
龔Sir你好. 首先好多謝你的投資意見，對於股票0知識嘅我自從個半月前開始狂睇你D片及收到你意見後便開始投入股票市場，希望能為存款增值及收息創造被動收入，到目前為止賺咗10%，真的多謝你
我設計左一個長線投資收息增長組合，部分已入市。希望你能俾D意見我. 感激感激😊
-
港燈：11%
-
建設銀行：11%
-
香港電訊：11%
-
置富產業房托：6%
-
香港中國高息ETF（3110）：17.2%
-
國指備兌ETF（3416）：13.38%
-美股VOO：13%
- 增長股（比亞迪+比亞迪電子、小米、阿里巴巴）： 17.4%
龔成老師︰
客氣，幫到你就好。
設計組合時，你要先睇翻自己目標。如果已經累積足夠退休本金，就集中收息股去創造被動收入。相反，如果本金不足，就先增值。
(參考︰如果你希望N年後每月有2萬蚊現金流，以股息率6%計，你需要本金400萬。)
你現時組合，主要係收息，適合中年至退休人士，基本上是無問題。
但ＧＸ國指備兌（3416），之投資目標為透過投資於恒生中國企業指數的成份股本證券，及沽出相關指數的認購期權以收取認購期權買方支付的款項（期權金），以產生收入。
由於這ETF運作，並不是無風險，所以，高息是否保持，無人知，同時要明白有價格波動。
由於這ETF成立時間不算長，而這段時間，港股大致是向上的。
但佢始終未經歷過港股下跌週期，未知做成點，所以這個是最大風險（到時派息會否大減？價格會否大跌？無人知）。
我並不是說不能投資這ETF，而是要明白上述的風險，同時在注碼上不宜過多。
因此，3416你持有13%，都可以，但不宜再加（其實好睇你的風險承受能力）。