Q23951：

想請教老師，如果看好中國科技業市場，及覺得現在估值有值搏率，如果只集中買一兩隻。

怕分析公司實力未到家，當中存在未知的風險而自己看不到，指數基金例如3067是一個好的選擇嗎？

龔成老師：

3. 就算唔係中國科技股市場，任何一個市場或行業，你唔係太了解，但又想投資的話，你都可以利用相關ETF，作為投資平台。

若你想投資中國科技業市場，又未懂分析當中企業。你可以用安碩恒生科技（3067），作為長線投資目標。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中間。你可以用月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

Q23952：

老師，上完你堂之後整理返自己現有既股票，記得你話每個行業唔超過30％，每隻股就唔過15％，其實有冇話分配上買幾多隻較好？黎緊等匯豐升返d就放，換其他股

上完你堂有d心思思買醫療/醫美（1177/1830）、電動車(2845)、環保能源類，如果以現時組合，係原本組合上面加注，定係都仲考慮可以買上述股？有咩建議？

11 恒生 100 ＠131.5

5 匯豐 400 @58.05

66 港鐵 611 @45

388 港交所 10 @470

1448 福壽園 1000 @7

1810 小米 800 @24.2

2800 盈富 160 @27

3067 安碩恆生科技 400 @15.32

808 泓富產業信託 2000 @3

1177 中國生物製藥 1000 @5.91

Background: 33歲，每月儲＄10000，宜家用$5000月供66、388、2800，$1500保險，希望7年達到100萬。都想留返少少現金睇下抽唔抽到居屋

龔成老師︰

無錯，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

至於持有多少隻股，要睇翻你組合金額大細，如果係100萬以內，你預10隻左右。若去到100萬以上，最多可以去到15隻。

你現時月供組合，係可以，餘下的每月儲蓄，就等大跌市出現時，才去動用。

至於現有持股，以你33歲年紀計，泓富產業信託(0808)、恆生(0011)和匯控(0005)有少少保守。因為佢地只係收息股，增長力唔高，唔係咁適合你年紀。

不過，你持股唔多，可以保留，但暫時唔好再加注了。

而醫療/醫美（1177/1830）、電動車(2845)、環保能源類這些潛力股，係可以加入組合。但由於潛力股風險較高，最多佔你組合比重4-5成好了。

同時間，你要留意估值，因為部份潛力已經略貴(1177,1830,2845算合理區中上至頂部)，未必適合現價入貨。

Q23953：

近來我join左個電商平台，開始踏上創業路，摸左石頭過河，因為一直是打工，沒有創業的頭腦

龔成老師︰

無問題，無人一出世就識創業，都係邊做邊學。市場好多時都是試出來的。

你可以不斷試、不斷錯，也不用想太多。你唔需要一定有詳細計劃，只要有大方向和基本計劃就可以行動。

當生意開始後，再因情況慢慢修正，咁就可以了。

中間就算有因難，都是好正常的，加油！

Q23954：

龔成老師，謝謝之前上課時你的教導，我才在40多入了 1211，雖然不是很多，但之後會繼續持有的! 與此同時，

我很快30歲，現在有二十萬的現金，想問一下你的看法，看看現在投資組合如何，希望能有你一些寶貴意見! 非常感激!

1211、2800、27、1177、1448。

龔成老師︰

比亞迪(1211)依然在成長期，所以你照長線持有，係正確做法。

至於你持股組合，都是有質素股票，都適合你年紀，你可持有。

但留意銀娛(0027)受續賭牌影響，仍有好多變數。銀娛(0027)在澳門有正面的貢獻，從資產質素、澳門發展、就業等角度，佢都做得不差，賭牌好有機會得到，不過，政治因素就是不確定，這點好難準確分析影響是否大。

初步分析，佢得到賭牌會過半，但政治是一些不能預測因素。

要留意，現時賭牌的條款，要求加入政府人員，這無可避免地影響了企業長遠的賺能力，優質度及估值都會略減。

此股長線投資價值依然存在，但風險度係高左，故暫時要控制注碼，不宜持有太多。

而你現有20萬，可以多用5萬去入一些增長股，餘下部份，就等大跌市出現時，才去掃平貨。

Q23955：

老師 想問 收水對公司估值會唔會有影響？

龔成老師︰

相信未來會重回加息週期，因此信貸成本會高左，對企業盈利造成負面影響。

而且息口上升，代表未來收到的錢，折現回今日價值會較少，故估值上一般都會向下調整。

不過，這都是理論層面。我地都要了解翻，佢收水背後的原因。若果係經濟已走出陰霾，開始復甦，那估值上，反而有機會係向上調。

Q23956：

龔SIR 我$15買左一手心通

宜家得返$4.6 仲走唔走好？

龔成老師：

微創心通醫療科技（2160）是有危有機類股，是「B」類，即是未有錢賺的，這類股股價會上落較大。

如果你持貨只有一手，當耐心等企業好轉翻，但要明白不一定成功。

佢係一家中國醫療器械企業，專注於心臟瓣膜疾病領域創新的經導管及手術解 決方案的研發和商業化。

佢自主研發的第一代經導管主動脈瓣植入（TAVI）產品VitaFlowTM，於2019年7 月獲國家藥監局審批並隨後於2019年8月在中國進行商業化。

根據資料，截至2021年1月17日，有五款TAVI產品在中國獲批准或商業化，其中，VitaFlowTM是首款使用牛心包作為瓣膜組織的產品。

佢亦推出第一代自主研發的AlwideTM瓣膜球囊擴張導管及AlpassTM導管鞘，使其成為中國唯一一家全面提供自主研發互補性TAVI手術配套產品的醫療器械企業。

VitaFlowTM II是唯一在中國研發並已在歐洲開展臨床試驗的TAVI產品。

除TAVI產品之外，佢目前還擁有五款經導管二尖瓣（TMV）在研產品，通過自主研發及與全球合作夥伴（即4C Medical及ValCare，均為專注於二尖瓣及三尖瓣醫療器械研發的醫療器械企業）的共同開發戰略性地針對所有主流可行的二尖瓣返流經導管瓣膜療法（TVT）方案。

Q23957：

龔sir 1810長遠揸得過嗎？現價算唔算平 見佢股價跌左好耐 thx

另外，我想問838 Tesla概念股是做Tesla 模具的 近排仲成為Tesla一級供應商 Tesla長遠都睇好 甘我想問838可以長遠揸住嗎 ？thx

龔成老師：

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

因為有歐洲國家，將佢的產品定為有安全風險，因此對佢中短期仍會不利。

但如果從長遠及更全面去分析，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區中上部，小注分注可以，但唔好入得太急，預佢股價仍波動。

至於億和控股（0838）團主要從事設計和製造金屬沖壓模具；製造金屬沖壓零部件及車床加工零部件；設計和製造塑膠注塑模具以及製造塑膠注塑零部件。

由於佢是TESLA其中一個供應商，因此，TESLA發展對佢都會有正面，但睇翻佢過往業務與過往財務數據，只是一般般，反映企業的賺錢能力，本身不是好強，只是由於TESLA而向好。

但這刻未能完全確定企業向好，加上股價近期上升不少，投資值博率仍未算高。如果投資，只建議小注進行。

Q23958：

老師好！我手上持有幾手中生製藥（平均價7.7）。之前大跌市到而家都上唔返去，琴日仲跌到全年低位。

過往呢隻股冇咩不利消息，只係公司不斷增購，呢個係咪令股價低迷嘅原因？ 應該點樣部署？ 謝謝指教

龔成老師：

佢下跌的原因，第一，之前貴，炒作大，因此有回落。

第二，之前佢因為疫苗因素受惠，但外國不斷有新研發，對佢就會有少少不利，但只要從長遠分析，這企業仍是正面的。

至於佢回購，反映企業睇好自己公司長遠發展，認為現價是回購的好價格。

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中下，有貨可持有，分注或月供可以，這股可以長線持有的。

Q23959：

303請問便宜區？

請問3110高息基金 & 303偉易達，那較佳，或其他？

謝謝

龔成老師︰

GX恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

相比偉易達(0303)，佢係一籃子股票，更有效分散風險。但現價未算平宜，你預落多2成以上，才算初步平宜區。

Q23960：

龔成老師你29歲，月入25k,月儲10k 有30萬儲蓄，想問應如何投資，謝謝解答

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你29歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股。

另外，你可以再加上一些潛力股，例如安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

大市現處於合理水平，那30萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。