Q24041：
龔sir，我係岩岩上完股票班(基礎班)學生，已經報左你之後嘅進階班。溫書途中有啲問題唔明，希望你解答。
用市盈率計估值嗰堂，我想問如果用方法一(過往市盈率)，計完5年每股盈利平均數後，要俾返個每股盈利增長嗰度，
可唔可以參考佢過往5年平均每股盈利增長率(相加再除以5)，例如我計比亞迪電子過往5年每股盈利平均增長係74%，咁就當佢高增長，俾20%。
(因為你話無乜增長就5%，基本增長就用10%，高增長就15-20%)然後將每股5年平均盈利乘返1.2，得出<推算每股盈利>再乘返合理市盈率（參考10年中間4年平均再調整），
得出企業估值。再參考返大行預測每股盈利，睇下偏差大唔大，如果太大，可能將自己預估嗰個同大行嗰個取個平均數，因為覺得大行普遍會較進取，想保守返少少，
唔想跟哂佢。唔知呢個方法可唔可行？因為自己未敢憑主觀推算每股盈利，想有過往實質數據作為基礎，同可以保守啲。想問以後用此方法推算可行嘛？
我最後計到比亞迪電子合理範圍係22-35，答案是否合理？
每股盈利5年平均:1.35
每股盈利增長:(根據以上方法取20%）1.6
大行預測(參考):1.3 (2021)
最後取左1.6 (覺得以企業將來增長，1.3過於保守)
市盈率中間4年:10-12倍
自己推算合理市盈率:15-20倍
合理價:24-32
10% buffer: 22-35
另外，用方法2，行業比較，計完平均每股盈利後，係咪都要好似方法1咁調整返個每股盈利(如果預期有增長)，加返個增長率俾佢？同埋如果係預期會賺錢嘅企業，
係咪計完10% buffer 後同埋調整左每股盈利後，就唔洗再做任何減值或打折？（假設無任何短期或核心影響）
反之，如果賺錢減弱嘅企業，如果最尾嗰度已經會減值或打折，中間仲洗唔洗再調整每股盈利（俾負增長率)，因為如果中間再調整，係咪就會重複左？(減得太多次)
問題有點長，辛苦哂阿sir!
最後，想多謝你將複雜嘅教學內容簡單化，本身對數字很差的我都大部分理解並應用得到，課程十分有用，唔知點多謝你!!
龔成老師︰
你這個估值方向，大致上係正確的。你可以用佢過去幾年的"年度化增長率"(即每年平均增長率)，去加大你個每股盈利，以反映其發展潛力。
但要留意，"無乜增長就5%，基本增長就用10%，高增長就15-20%"這個指標，係一般性參考，方便初學者掌握。但面對一些增長潛力較高股票，有時我地要自行作調整。
另外，不論你用緊邊個估值方法，每股盈利都要因應其增長力，去作出調整。
你要記住，指標係死的，人是生的。最重要，係你明白這個"有參考性的每股盈利"，背後的意義。我地係希望透過這個數字，去真切地去反映，企業現時和未來發展狀況。
因此，你唔好比個指標限死左自己，佢只係比你參考。
比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。
因此，我地會以佢最新一年每股盈利作為指標。
由於集團始終係代工企業，市盈率唔會太進取，我地會用佢過去10年中間4年數字，大約為10-12倍。
之後，再加多10%緩衝區，不過，我自己會再有少少調整。合理價，大約為︰HKD22-38。
所有用於反映業務價值的調整，在計算緩衝區前，應該已經完成。加上10%緩衝區後，就是你的最終估值答案。
你現時依然係初學者，有時面對潛力股估值，係會有點難。但你再慢慢訓練多D，有左經驗，你就會較易掌控這類情況。
上進階班前，記住多練習初班學到的知識，到時會有助你掌握，課堂見!
Q24042：
老師想打攪下你，U你認為怎樣？
龔成老師︰
Unity Software Inc (U)是一家創建和操作互動式、實時3D內容的平台。
集團令創作者，可以利用UNITY工具，去創作3D遊戲。現時排名前 1,000 的移動遊戲當中，有超7成是使用 Unity 制作。
透過其技術創作的遊戲，可以部署在不同的領先平台，例如任天堂、Play Station、IOS、Android、Window等。
業務有投資價值，佢過去多年營業額都有增長，但由於集團上市時間唔算長，而且依然未做到收支平衡，故不確定性較高。
加上近期被炒高，現價唔平。而家最多只宜小注，最好等有明顯回調，才慢慢儲貨，會更加穏當。
Q24043：
老師 我想問問你點睇海底撈同1579 （跌咗好多相比之前）
另美東汽車 同tcl電子。另外物管股長遠仲是否睇好？唔該你
龔成老師︰
海底撈（6862）本質是不差的，長遠仍會正面，不過中短期會弱。中央推節約飲食，對佢會不利。佢現時更要關分店。
另外有兩點都要注意，第一，管理層有講過，之前市場對佢地公司過度樂觀，估值偏高。第二，管理層話公司面對中國的市道，其實業務不是一直都好的。
加上這股之前貴，相信中短期股價仍一般。
不過以長遠來說，這股仍有質素的，佢以「海底撈」品牌經營火鍋店及外賣業務，火鍋菜單由鍋底、醬汁蘸料以及在鍋底烹飪的食材三個主要部分組成，可點單鍋、鴛鴦或四宮格鍋底組合，餐廳提供多種調料及食材，以及供應小吃、酒和飲品。
在中國有好多分店，以及外國都有。
有規模，有品牌，整體正面。相信長遠仍有發展的。但相信以佢的情況，仍要弱一段時期。
這股市場之前比佢好高估值，就算近期回落，最多只能稱為合理區中間至中下，一定未平。如果有貨可長線，但不建議持貨多過，但無貨暫時只建議小注，股價始終波動，行業仍有不確定性。
頤海國際（1579）中短期弱，有質素的，佢以「海底撈」品牌銷售產品（火鍋底料、火鍋蘸料及中式複合調味品）予經銷商、餐飲服務供應商及網絡購物者（透過電商如天貓及京東）。
並於河南省鄭州市及四川省成都市設有生產設施。集團亦為海底撈集團（由主要股東兼非執行董事張勇及施永宏創立）於中國的火鍋底料產品獨家供應商。
中短期中國市道弱，加上現價仍未算平，都是風險。考慮相關因素，現價只是合理區，預期短期股價較一般。而長遠計，會正面的，但就要長線，行業未能太快好轉。
美東汽車（1268）有質素。
佢主要為客戶提供各類的汽車相關產品與服務，包括乘用車的新車銷售，提供售後維修保養服務、零件與配件銷售、以及提供其他增值服務，如收購與出售二手乘用車，以及延保期服務及汽車保險分銷等。
集經營多間家4s自營店，涵蓋中高端及豪華品牌乘用車，當中包括保時捷（Ｐｏｒｃｈｅ）、寶馬（ＢＭＷ）、雷克薩斯（Ｌｅｘｕｓ）、豐田（Ｔｏｙｏｔａ）及現代（Ｈｙｕｎｄａｉ）。
業務發展不差，財務數據都理想，不過，現價開始貴，這刻未必是好的投資時機，可能要等有較大回落才考慮。
TCL電子（1070）全球最大的電視生產企業之一，其產品銷售遍及全球各主要市場。
集團本質不差的，業務穩定，生意不差，有持續的盈利，不過，過往的增長力就不算強。
負債偏高會係一個扣分的地方，以現時估值來說，可說是處合理區的範圍。
至於物管股，我依然係睇好，雅生活(3319)和碧桂園服務（6098）現價合理，有一定投資價值。我早前出左個FB POST，係有關內地物管行業，你可以參考下。
Q24044：
- 阿sir想請教netflex係最近比炒起
定有長遠投資價值
- 龔sir 想問50穩健收息股會唔會出新版
龔成老師︰
- Netflix Inc(NFLX)是一家訂閱流媒體娛樂服務的提供商。該公司已經在190多個國家或地區支付了流媒體會員資格，允許會員觀看各種類型和語言的各種電視連續劇、紀錄片和故事片。
集團坐擁不少優質和多元化的片種，令到佢可以吸引不同客源，去提升收入。
睇翻佢財務數據，過去幾年無論營業額和盈利，都有唔錯增值。相信未來發展，會係正面。
不過，集團股價近年被炒高不少。就算考慮到佢未來增長潛力，都仲有D貴。
如果你無貨，最好等回少少才開始小注。到有較明顯回調，才正式入貨。
- 只會更新財務數據，中短期未必會有新版。因為我要趕及2022年下半年，出一本全新的《50股》，所以要集中時間寫。
Q24045：
老師好，之前見到老師話中國生物製藥在合理區，我今日用5.95買1000股，應該都係在合理區？
Thx
龔成老師︰
中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。
佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。
但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。
就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。
你買入價算合理區中間位置，現貨可持有。之後如果你要再加注，可以等每回調10-15%才出手。
Q24046：
老師點解1999最近跌左。我買入價16.4有8000股現價沽又無左好多錢点算好？
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
敏華（1999）唔差的，佢業務有沙發、床墊、板式傢俱、海綿、傢俱配件等產品的製造及銷售。
旗下擁有「Cheers芝華仕」、「Fleming北歐宜居」兩大知名家具品牌。
整體來說，這企業有一定的質素，品牌及銷售網絡，加上在中國有一定的市佔率，都反映有業務上的優勢，業務情況正面。
現價算係合理區中上部，這股有長線投資的價值。
你現時出現帳面虧損，主要係因為你買入價略貴，現時佢只係回翻去一個較合理水平，而唔係質素出左問題。
因此，你可以照長線持有。
Q24047：
平安好醫生48.8有1400股咁而家應該繼續守定係點
我買嗰啲全部都跌咗好多仲有中國飛鶴，中國平安，銀河娛樂，金沙，小米，比亞迪電子
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。
買入價，你的賺蝕，只是一個心理因素，該企業長遠的發展，才是我地是否值得持有的重點。
如果企業有質素，但股價短期下跌，就不用擔心，照持有就可以。
如果企業無質素，但你現時蝕錢中，繼續持有只會令你財富繼續貶值，因此要賣出。
如果企業質素轉差，就有可能要減持，因為這股佔你組合的比例，未必值得太多。
你現時持有股票，都係有質素，可以守。
平安好醫生(1833)由於本身佢未有盈利，市值好大程度係建基於佢願景，不確定性較大。所以，你預佢依然會好波動。
不過，金沙(1928)和銀娛(0027)受續賭牌的不確定性影響，暫時不建議持有太多。
雖然長線投資價值依然存在，但風險高左，故要控制翻佢佔組合的比重，最好2隻加埋唔過2成。
Q24048：
龔成老師, 你點睇世茂集團的長遠情況啊? 我有3手20.時買入, 應該繼續持有嗎? 假如長遠仍可以守, 依家值得趁低吸納嗎?
另外, 佐丹奴國際我在高位時買入, 依家比買入時跌超過一半, 派息亦唔算高, 係唔係應該依家賣出, 買入更有增值能力的股票?
謝謝解答!
龔成老師︰
世茂集團（0813）質素中等，但現時都有風險。
佢係中國優質房地產項目的大型發展商，於中國優越地段發展高端房地產。業務包括發展住宅物業、零售物業、辦公樓及酒店。
項目位於上海、北京、哈爾濱、南京、福州及中國其他快速發展城市等，過往生意與盈利都有增長，發展不差。
不過負債較高，令企業風險存在。
現時內地樓市和經濟都有放緩情況，加上政策風險，都令其發展不確定性高左。
現價合理，長線投資價值是有，但唔建議太大注投資。你現貨可以守，但不太建議再加注，始終成個行業風險係大左。
佐丹奴(0709)都有質素，可長線持有。但主要係收下息，你唔好預佢有明顯增長。若你不是接近退休之年，這類股票就不要持有太多，應以增值為主。
Q24049：
但1833大約幾多先進入便宜區？仲有想問1177大約幾錢先進入便宜區
龔成老師︰
平安好醫生（1833）最近有監管出台，令估值下跌，其實佢行業有潛力，但監管影響賺錢能力，這點較可惜。中央要加強監管互聯網醫療，相信有可能影響賺錢能力，估值略減，但未算對企業造成核心不利影響。
佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。
平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。
企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。
雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。
因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區中下部，但好波動，分注投資可以，但唔建議金額太大注，一定要明白風險，以及控制注碼。
中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。
佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。
有長線投資價值，現價算合理區中間。要去到初步平宜區，你預跌多2成倒。
Q24050：
老師想你幫我我檢視下組合
現持有
0548 深圳高速公路股份 1000股
968 信義光能 8000股
01330 綠色動力環保 6000 股
02343 太平洋航運 11000股
03998 波司登 4000股
6666 恒大物業 10000股
比較重倉968 22蚊有貸 同 恒大物業 7.5有貸，全部高位買入
組合買入價值 36萬 依家得番25萬 未賺過錢，得番5萬現金 組合已經虧左10萬，十分心痛
唔溝貸長線可以守番上去嗎?十分感謝!!
龔成老師︰
高位入貨，固然不理想。但我地是否保留，唔係睇個買入價，而係睇佢有無長線持有的價值。
你以上持股，都係有質素，適合長線持有。
但太平洋航運（2343）和綠色動力環保(1330)質素唔算好高，而恆大物業(6666)風險都高左，不宜持有太多。
你現時約30歲，應以增值為主。深高速(0548)只係收息股，增長力唔高，唔適合你。現貨可持有，但唔好再加注了。
而信義光能(0968)佔你組合都較多，建議你沽少少，換至其他優質股，去平衡翻個組合。
現時大市只在合理區，餘下5萬現金就等大跌市出現，才去入平貨。