近半年內上市的新股，有唔少都係有個B字跟尾，即係屬於生化科技公司，港交所(0388)加呢隻字，就係想投資者認清楚，這堆生化股的門檻是不同的，唔好話賺錢，未有營運收入都可以上市，所以這些股參差是可以理解的。下半年B字團隊有6隻新股，當中有4隻也是穿底的，包括復宏漢霖(2696)、亞盛醫藥(6855)、東曜藥業(1875)及中國抗體(3681)，最近上市的兩隻，反而較佳，啟明醫療(2500)及康寧傑瑞製藥(9966)首日都升三成。

戰友梗係以為青冰會詳細分析啦，Sorry，實在力有不逮，要理解每隻生化股的藥，或者研究日後推出市場能帶來的收入，實在要有極專業知識，咁抽這些B字股，豈不是盲抽就可以？新股旺，這個道理係work的，但睇返B字股的參差程度，要參與，只能從另一角度去分析。

啟明醫療及康寧傑瑞兩股的共通點，就是基石投資者多，質素亦較佳，有高瓴資本已經是保證，有OrbiMed及GIC等也是令人安心，因為這些都是專玩醫藥生化股，絕對比你同青冰專業得多。而另一個共通點，就是招股反應佳，孖展額大，超購倍數多，當然這些都是在招股第二及第三天才知道，但現時資訊發達，google吓一定找到，不過，好熱鬧而最後炒車的新股，亦非常多，抽中之後是否暗盤即掟，就要睇吓啲貨去咗邊。

啟明醫療及康寧傑瑞分別超購311倍及191倍，當然會啟動回撥機制，即係國際配售及公開發售各佔50%，換言之國際配售那邊的基金是否夠貨，對股價有冇支持，很有參考性。啟明醫療的國際配售在回撥後只有3926萬股，當中5個基石投資者就分到3082萬股，佔配售的78%，而3082萬股，就是整個招股活動的39%；康寧傑瑞就更癲，國際配售在回撥後將有8970萬股，而7個基石投資者拿了8970萬股，換言之係拎晒，難怪有幾位朋友有去配售申購，最後分到係零股，而8970萬股，就佔整個招股的50%。

點解基石投資者拎幾多貨是要留意呢，一來是信心的表現，而最重要的是他們有禁售期嘛，如果尋常基金拿到貨，升三成可能已經獲利了。往後炒唔炒，都可能要更多因素推動，但貨源盡在基石那邊，總會令人較放心。

最後一提是康寧傑瑞昨天成交是1.15億股，老散分到的同樣是8970萬股，即使行使了超額認購權的2691萬股，合共亦只是1.16億股，換言之，昨天的換手比率已近100%，究竟昨天邊個買貨呢？究竟往後是否大製作呢？可密切留意。

-- Fb個人專頁 http://www.fb.com/chingbing888