Q48891：
老師你好，我Coinbase150蚊以下慢慢月供，我想問下而家需唔需要停？定係都仲可以繼續？
其實買得唔多，幾萬蚊慢慢玩下
龔成老師：
最重要是小注，例如你只用整個股票組合的3%買這股，你可以用月供或其他方法買，總之，到左3%就停。這企業是高風險類，有發展力，但一定只能小注。
其實一般月供，我會建議長線少少，最少月供3年和持有5年，才會有理想效果。
但Coinbase本質有D唔同，因為佢係風險好高，唔適合月供。
如果你有一定貨，就停一停。不用沽長，長線持有就可以。未來再加注都得，但不要佔組合太大比重。
Coinbase Global Inc（COIN）雖然有獨特性，但真正的長期價值有多少，根本好難估。
Coinbase已經比上市時，成熟左好多。但現階段依然好受幣市影響，所以你預佢中短期會好波動。若持貨不多，又預長線持有，咁就無問題。
此股依然有長線投資價值，其實佢股價較高位有明顯回調，但長線潛力依然係有。佢現時不停開闊緊自己架業務，由幾年前只係做買賣交易，收下買賣交易費。到現時已有託管、集資、鏈上抵押借貸(BASE公鏈)等能力。(當然，暫時仲係手續費收入為主。)
長線佢發展，有機會慢慢變成類似港交所(0388)模式，即係一個全功能架集資交易平台。甚至長線有機會蠶食部份傳統經濟架金融業務。
當然，這個只係"預測"，唔係一定做到，但佢現時相信是向這方向發展，故具有潛力，值得持續觀察佢發展。
投資此股係可以，但要明白佢係高風險類別，只宜小注。若你本身投資經驗/風險承受力好一般，此股就未必適合你。
Q48892：
老師，現在開始月供QQQ可以嗎？
另外你點睇SOXX呢隻ETF? 可月供嗎？
龔成老師：
Invesco QQQ Trust（QQQ）是追蹤美股納指的ETF，長遠有潛力，是最簡單投資美股潛力股的工具。
美國的納斯達克指數，當中在多間大型的國際非金融上市公司，成份股以市值作基礎，並以一些規則平衡較大市值股份造成的影響。這些企業潛力較高，但風險都會較高。
如Alphabet、亞馬遜、英特爾、Netflix等，都是全球最大型的科技類公司。
長遠有一定的潛力，但要留意，指數較為波動，現價已在合理區較上部，不建議這刻大手投資，最好的方法，就是月供或分注小注投資，長線持有。
所以，你月供可以，但不建議金額太多，同時，要長期月供，不能只集中在中短期月供之後停，要拉長買入期。
iShares半導體ETF（SOXX）
本基金旨在追蹤NYSE Semiconductor Index的投資表現，旨在追蹤由美國半導體產業股票組成的紐約證券交易所半導體指數的投資結果。
該基金通常將至少80%的資產投資於其指數的組成證券，以及具有與其指數組成證券基本相同的經濟特徵的投資，並可能將高達20%的資產投資在某些期貨、期權和掉期合約、現金和現金等價物中。
你預佢有風險有潛力，長線投資可以，但都要控制好注碼，不宜投資太過多。如果想月供，同QQQ原理一樣。
Q48893：
請問288可以長線收息嗎？
龔成老師：
萬洲國際（0288）質素唔算差的。
有時你見肉價短期上落，都會對佢股價有短期影響，不過，我地分析時，唔好太著重中短期因素，例如短期的肉價格，以及供應等因素，都會對佢中短期有影響，但我地最緊要是分析企業的長期營運模式，發展，而這股正面的，可長線。
這企業過往的生意保持平穩，業務基本上是平穩的，只是因貿易等問題，令股價較為波動，成為這股的風險。
由於這股近年上升不少，現時投資這股，可說是平穩增長及收下息咁，不要對股價太有期望。同時，都要控制注碼，始終佢業務如果回落，會影響佢股價同派息。
Q48894：
Sir,想請教吓,已經60歲，買年金好嗎？
好多人講話年金是搵笨的。
龔成老師：
這是一個理財產品，沒有特別著數或搵笨，只有適合與否，雖然佢增值力欠奉，但這的確是獲取穩定現金流的工具，對退休人士來說是不可不知的投資物，對沒有後人的人來說，更是不錯的產品。
方法就是先支付一筆現金，而保險公司就會每月「連本帶利」付錢，為你提供每月穩定的生活費，令生活更
有預算，並一直收取至百年歸老為止。但要留意，有可能百年歸老後，未任何餘下的價值，後人就無法得到任何財富。
雖然我們也可將一筆錢，自行每月連本帶息提取，以支付生活費，但我們卻不知自己何時百年歸老，究竟每月提取多少才合理呢？
若果每月只提取很少，生活不佳但去世時又剩下很多錢；反之，若每月提取很多錢，又可能會出現很快將錢用完，但仍有一段人生路的情況。
因此，購買年金就能令自己每月取得合理的現金，令生活更有預算，成為一個解決方法。
Q48895：
龔老師我20年買了二手居屋410萬現在還有280萬, 屋企比100萬，我應還層樓定定期收息
龔成老師︰
這個是機會成本問題，現時普遍定期息口都係比一般按揭息率高﹐你可以做定期，去賺取當中架息差。
不過，你要留意翻流動性風險，即係唔好D錢去晒做定期(或者定期做得太長)，跟住攪到每個月唔夠錢還。
另外，按揭息口係會變動，令到你將來潛在按揭還款增加(當然都有機會係減少)，所以如果你做定期架話，都要預留多少少現金還款儲備，以免失算。
Q48896：
50年樓齡唐樓 應否出售換樓或繼續持有出租？
龔成老師︰
由於唐樓的按揭成數一般都較低，購買時要預留較大的首期資金，令新投資者較為難入場。
唐樓沒有電梯，樓齡高，長線維修費貴，都係不利因素。當然，唐樓租金回報率一般都略高，算係一個好處。
至於點處理，你可以睇翻自己個物業情況，同埋成個財富配置。如果你本身資金好充裕，個唐樓保養好，又低層，你都可以考慮保留住先。
不過，始終有一定樓齡，長線都係換碼較好。
Q48897：
老師，我記得你講過「擁有條件，才擁有機會」。
但係如果社會結構問題,又冇條件移民點樣搞？（自身已經用盡一切辦法都搞唔掂）
龔成老師：
外在環境我地無得改變，我地只能從「自己」開始改變，無論在心態上、能力上，都要有所調整。
你不要想「那些事情不能做」，而是想「有那些事情可以做」。我總相信，機會一定有，如果你過往試過但不成功，有可能是行錯方向，試下從大方向調整去想想。
Q48898：
老師，我知你講野好勵志，又成日想我地進步，
但現實而家的後生，可以點樣發圍，有時面對現實好無奈
龔成老師：
我相信每個時代，都有當中的危與機，要睇下我地有無能力把握。有時當現實環境已經是這樣，如果我地只停在「抱怨、無機會」，就真的不會有機會，我地要從自己的心態改變，同時懂得適應新環境。
坦白講，現世代已經不能只靠讀書，因為大學生太多，為讀而讀無用的！反而發展一些自己的興趣強項，令自己有專門技能，更加好。
另外，要學懂獨立思維能力，不能只懂死背或做重覆性的工作，要靈活。
仲有就時要有做生意及投資的技巧，才可以真正建立財富。
Q48899：
想問吓一般危疾保險買幾多才適合，如果現時55歲，危疾保額大約港幣300萬充夠嗎
想問吓完美醫療還值得持有嗎？
龔成老師︰
1)危疾，佢賠償係以一個指定金額計算，同醫療保不同。這筆賠償，無指定用途。
因此，危疾除了可用作抵銷部份醫療開支外，最重要係填補你因長期不能工作，所失去的收入。
由於危疾係一些大病，一般治療至休養，可能講緊係2-3年。所以，你可以用你2年左右年薪，作為基礎標準。
再按你現時和預期將來家庭開支狀況、保單條款等，再進行調整，咁就可以。
- 完美醫療（1830）業績差，雖然都有盈利，但比上年度下跌3成，如果有暫時也不要加注。
相信在現時香港經濟環境，短期仍會弱，要耐心等好轉，同時，由於部分不利因素有機會是長期性，如消費者轉到中國等地尋找性價比較高的產品，所以，不建議持貨太多，現價是合理，企業雖然仍有質素，但風險度增加，面對競爭也加大。
Q48900：
老師仲有一個問題，想問一下如何計算股票利息係派幾多厘？
龔成老師：
將佢在最新的財政年度，一年內每股派多少息加起來。
再除以現時股價，就是「股息率」，一般財經網站都有提供的。
若你有問題想向本人發問，可在龔成的fb專頁「www.facebook.com/80shing」inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。
另外，所有個案及意見，只是供大家參考，只是教學分享，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。
由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。