Q35401：

老師你好， 有個問題想問下你。

24歲

一個月人工12000

家用3000

開支3000

股票5000

依家屋企人話要我買保險，供18年儲蓄 （將來亦可作為對減醫療保費用）

自願醫保60萬額（可扣稅）（每傷病計）

癌症保障360萬 （保費只需$55/月）

供20年危疾50萬 （賠現金）保至100 歲

意外40萬

每月$1550左右。

老師覺得使唔使買咁多保險？

Thanks

龔成老師︰

其實保險要買多少額度真的很個人，但最重要是供款是自己能夠負擔的範圍。

保險在理財的計劃中扮演「防守」的角色。

原理就是將你某些不想承受的風險，轉嫁給保險公司。例如人壽保險的原理，是當一個人不幸過世，其家人會因此而失去經濟支柱，

若果想將「失去經濟支柱」這部分的風險轉比保險公司，就要買人壽保險。當家庭失去經濟支柱時，保險公司的賠償就會起作用，購買保險的人就用「保費」作爲代價。

在理財中，我們應該做到「攻守兼備」，保險是防守性產品，有購買的需要。我自己也有買，但買哪些類別，金額多少，就真的很個人化，要視乎你願意承受哪些風險，又有哪些風險想轉嫁給保險公司。

另外，由於保險只是一個防守性產品，因此不用買得過多，「足夠保障」便可。理財是一個配置的過程，當你做好防守後，就應該將資金，留作「進攻」之用，這樣對整個財富最為有利。

就你上述保險而言，除左儲蓄保，其餘都係有佢保障作用係度，但你留意翻以下幾點︰

1) 儲蓄保，即係儲蓄 + 純人壽保障。後者係有需要買，但前者好睇你投資能力同取態，如果你係好保守，你可以用佢儲錢，但始終佢增值能力好有限。否則，你咁後生我一般建議你買無儲蓄成份架"純人壽"。節省左架資金，去長線投資優質股。

2) 醫療，可以，記得盡早買。因為年紀大，健康差左就可能會貴左，甚至部份疾病不受保。

3) 危疾︰佢賠償係以一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年左右年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

所以，保障去到360萬，好似有點多。

不過，睇翻你保費其實都幾平，建議你睇清楚保障範疇，唔好單單睇個保障額，例如有乜病保到、等候期之類。建議你去比較多幾隻危疾計劃，才作定案。

4) 意外︰唔係話必需，好睇你自己，如果工作上比較高風險，都可以考慮。

Q35402：

Ar sir , 啱啱睇完你YouTube講BRK.B

呢隻股票適唔適合平衡美股同港股用呢？

龔成老師：

適合，因為佢大部分都是美股，加上有不同企業，可以視作一個價值投資型的基金。如果你本身有港股，想加美股作平衡，但又未知加邊隻好，可考慮這個。我自己都有貨。

Q35403：

龔sir,我有一份美國科技股票基金，現在美股估值很高，我恐怕有一天會爆破，我想轉一部分到債卷基金，你認為能夠避險嗎？

龔成老師：

如果你擔心現時在高位，有下跌風險，的確可以轉到債券基金，在方向上，有避險的作用。

不過，其實無人知幾時見頂，如果該基金不少股票，都有質素及長遠發展，其實可以想想，是否要全部賣出，而當中的考慮點，是你整個股票組合持有美國科技股票的比例，如果你整個組合，這類股票只有這基金，會建議你只減持部分，留部分作長線持有。

另外，債券基金雖然有避險的作用，但在正式投資時，要小心選擇，始終債券基金有好多好多類，有的風險較高，有的風險較低，有的有槓杆，你要了解清楚。

總之，比起估見頂見底，建立一個長期平衡，有質素的組合，更加重要。

Q35404：

有冇收息股推介 想月供

龔成老師：

高息基金（3110）、深高速（0548）、香港電訊（6823）、工行（1398）、置富（0778）、陽光（0435）等都可以，你可以了解下，並從中選股。3110可作為核心，再加上其他。

Q35405：

sir,踢契即是點樣？

龔成老師：

「踢契」其實佢正式的名叫「業權質詢」，意思是指，買賣雙方在簽好臨約後，買方就會就樓契的內容，又或物業情況，藉律師向賣方提出合理的業權質詢（即踢契）。

如賣方律師未能在合理期限前，就業權提問作出完滿解答，以及提供令人信納的證據，就會被視作違反了簽訂協議，買方「踢契」成功。買方就有權終止買賣。

Q35406：

老師你好, 我早幾年用月供方式買了以下的股票，但最近見到愈跌愈低，唔知要繼續持有，分段賣出，定係賣一半留一半

shares 平均買入價

3067 100 $17.19

1810 1792 $22.02

66 895 $43.2

1177 4924 $6.31

2800 776 $28.17

感謝老師!希望可以有個明確方向

龔成老師︰

月供其實是一個長期累積財富的計劃，不建議突然暫停，除非企業質素有變，否則會影響月供的效果。

近年港股因爲美國加息、疫情、戰爭等一連串不利因素，表現都偏弱，這些時間的大跌市的確好考驗投資者的心理質素。

安碩恒生科技(3067)、盈富（2800）屬於指數型基金，本身已經是一個組合，有分散風險的作用，可以長線持有。

小米（1810）、中生（1177）屬於潛力股，此類股票在現時的加息周期，表現會較弱，但仍有質素，需要投資者耐心持有。

港鐵（0066）屬於典型的優質股，可以長線持有。佢收入主要分鐵路同物業部份，後者近年好弱，中短期相信都難言樂觀，長線投資價值係有，但預無咁快回到較合理水平。

你整體的組合其實質素不算差，只是這幾年的市況好容易令投資者失去信心，如果你擔心的話，可以減少部分供款比例，尤其是潛力股的部分。

最後，建議你長遠可以加入美股，令到組合(地區性分佈)更爲平衡，如果不懂選股的話，可以先考慮(VOO)或（QQQ)。

Q35407：

龔老師，比亞迪最新業績出左，雖然增長放緩，但股價都已經反映左，是否適合買入？希望可以分析下 謝謝

龔成老師：

Tesla減價戰，影響了中國電動車賺錢能力，所以短期行業競爭大，1211都會受影響，股價仍是一般。

但長遠，仍是翻多少少先。

如果本身有貨，可長線，雖然企業最爆炸性增長已過，但長遠仍有發展，但就預佢股價波動，因此，只要持貨不過量，就可以長線持有。有質素，有發展，不用擔心。研發不斷進行，汽車賣得好好，電池技術發展得很好，行業長遠前景良好，企業長遠發展正面。

現時已經成為中國電動車市場的一哥，同時品牌及銷售網絡理想，長遠仍有發展，不過，唯一擔心是股價波動。

現價約在合理區中間，由於一手入場費較高，可考慮小注月供可以。如果想一手手買，就要睇你資金情況，如果你只得一注資金，建議等佢回

Q35408：

老師，我想問lvs同港股金沙，其實一唔一樣？

龔成老師︰

Las Vegas Sands (LVS)係金沙(1928)母企，2者係唔同。

兩隻各有利弊，1928，長遠會偏向收息及基本增長。至於LVS，收息作用不大，會偏重於增長。

Q35409：

感謝老師回覆！

已貴買左樓, 真係除左出租幫補, 有冇方法可返身

我計返要去返$23500呎先打和走到, 鎖左我大部分錢，每月辛苦咁供

做錯左決定

龔成老師︰

其實都無方法，因為客觀大環境，暫時睇唔到有明顯會令樓市大升架因素。

從現時整體需求和供應去分析，要佢好似以往咁大升，其實機會唔大。

所以，建議你用長線角度去思考(唔好再諗蝕左個部份)，同一筆資金未來點用，先至係最有效益，去決定你架財富配置安排。

Q35410：

多謝老師回覆，我睇咗80後千萬富翁，裡面提到五大致富方法，我暫時認為股票最適合我，資金不夠，生意頭腦亦唔好，英國樓巿無乜升值潛力，加上未熟悉呢邊巿場⋯

完全理解只做實體班嘅原因，如果老師將來開美股班，會否有可能兩星期內上完嘅課程，我一定會飛返嚟上你堂😊

英國呢邊咩都要交稅，長唔長線，只要有賺都要交，但無理由因為咁就完全唔投資，老師你對於高稅率國家要做到有錢人有咩建議？🙁

同埋英國係全球徵稅，即使我買港股只要有賺錢都係要交稅，咁其實有咩分別呢？

另外一個我唔買港股嘅原因係擔心將來港幣會同美元脫鈎，老師你又點睇？

龔成老師︰

好多一般人，都會用股票作起點。其實只要操作得好，都可以好高效，甚至單靠佢就做到財務自由。

另外，你都說到一個重點，就是任何時候都記住"未熟悉架巿場，就唔好投資"。

至於高稅率，而個都無辦法，我會比較建議你問下當地專業人士，或者係當地投資已久架朋友，點樣去到減少稅項。

而聯匯方面，明白聯匯的人，就知不會脫勾，就算真的脫勾，也只是有港府主導。

因為現時我地行的聯匯，是港幣與美元掛勾，匯價為7.8，區間為7.75-7.85。當銀行要印港幣，就一定要有對等的美元，因此，現時港幣的貨幣基礎，有絕對足夠的美元作支持。其實，只要有基本財經知識的人，都明白這點，也肯定不會忽然脫勾。

由於有完全足夠（是超過）的美元貨幣基礎作支持，所以，如果要脫勾，就一定是由港府主導。

如果脫勾會令港幣大跌，香港經濟轉差，香港政府會否脫勾？當然不會！

就算日後佢真的想脫勾，也會選一個適當時機，就是大家都認為，香港脫勾會更好，港幣反而會升的時候，才會脫勾。

美股方面，的確是你最適合累積財富的方法，你可以自己學下先，我有機會都會日後開美股班！