上月最恐慌的一天，應該是3月19日，恒指見三年低位，一些往日非常穩的收息股，全線被洗，再配合美元強勢，澳元及英鎊急跳水，整個畫面都極震撼，最後聯儲局要出大海無量「無限QE」，美股跌到3月23日先見底，但唔知戰友有冇發現，港股最低嗰日，原來就是3月19日，係比美股早見底，硬要搵原因去解釋的話，可以講係估值平，去年落後全球股市囉。

當然，現時用見底二字，相信仍有大部分人不認同，而青冰亦冇能力預測是否見底，但近期有一個現象，證明市況有好轉。上月的恐慌，跌得急固然係原因，即使隻股有好消息，例如出咗個靚業績，或者疫情對業務的影響有舒緩，對股價刺激極短暫，通常未到午市已倒跌，久而久之，大家想撈想博反彈，都唔敢出手，咁冇乜買盤承接，市場thin，自然就會超跌。

而青冰所指的好轉現象，就是近期股價會跟消息炒，好業績真係會升，有大行唱好亦做好，中國話增加石油儲備，俄羅斯同沙地又忽然有得傾，期油急漲，港股三桶油升7至10%，仲要三隻都打入十大成交。唔好忽視這個「會跟消息炒」，有時市場信心，就係咁樣逐步累積返來，人同此心心同此理，你呢隻有斬獲，才會有動力去發掘下一隻嘛。

歐美疫情仍未有耐見頂，環球經濟一定仲係差，你要找壞消息，每天仍然可找到千百個，係呀個恒指連24000點都去唔到，個市有幾巴閉吖，別忘記有隻大笨象兩日已經跌一成，拖住恒指後腳，再者，你又唔係基金經理，冇乜必要日日睇住個指數，花點精神去揀股更好，說到底，大海無量這招，除了是buy time，只要市場冷靜下來，總要去搵嘢買。最重要的，是不要花精神在持續尋底的股，而是應找一些離底後逐步向好的，前者是市場在沽，後者是市場在買，除非你的假設是你比市場聰明啦，青冰自問做不到，只能乖乖地尊重市場，順勢而做，希望各戰友在次季重新上路，穩中求勝啦。 --  Fb個人專頁http://www.fb.com/chingbing888