Q24531：
你好，想請教一下基金方面，本人首次投資基金，施羅亞洲高息股債基金(人民幣對沖)你覺得風險大嗎?未來應唔應該向基金進發?謝謝
龔成老師：
要睇該基金情況先答到，你可以睇翻該基金的投資策略，如果當中有槓杆，就要睇是否過多。另外，你可以睇翻佢過往5年的回報，是否能持續派息，是否會出現派息蝕價。
Q24532：
龔sir，我係你44期股票班既學生呀！
我有睇開你既書，而且嘗試簡單分析一啲股票既數據。（由於都係財經網站上抄落黎，所以唔知準唔準確）
從下表睇到6808好多方面數據都有唔錯、亦算平穩增長，（財政年度結算日改為3月31日係因為要作為附屬公司入9988既賬目中）但股價一直由上年10幾蚊跌到依家既3蚊。
由於我仲係初學者，可以很難單從數據睇到當中既問題，想請教一下老師有咩睇法，該企業質素有值博率嗎？同埋我呢個表中一啲數據分析的項目有無太大問題？
呢個方向睇企業合適嗎？感謝老師抽空睇我既問題！
龔成老師︰
高鑫零售（6808）於內地經營大賣場業務，以提供各種零售商品包括紡織品、電子產品、日用百貨、大眾消費品及生鮮產品。集團除對外採購品牌產品，亦自有品牌商品。
早前被阿里收購，股價上左好多。現時佢回調，主要係回復翻去較合理水平。
睇翻佢基本面，雖然業務穩定，但睇翻佢過往的財務數據，就發現佢生意增長力不算強，盈利增長力都不強，相信佢都會因中國的經濟週期受影響，同時，網購的發展對佢都有一定程度的影響。
但要留意，佢最近一期業績，跌幅比較大。所以，要再觀察係個別情況，還是佢賺錢能力真係出左問題。
不過阿里收購，相信會利好長遠發展，這股偏向前景的，但要再觀察。以佢現時的估值計算，這刻的投資值博率只屬中等，未到吸引的人平。如投資只能小注先。
另外，其實坊間財經網站數據，一般都準，你可以用大型D架網站，好似AASTOCK, 中銀等，就會較穏陣。
如果你想再精準D，你可以自己係年報到找相關數據。
Q24533：
龔sir 15萬資金 可以分三隻入嗎 285 1810 9988 這是我剩低的資金 一次過入定分兩注好呢？
其實我對1810同285有信心多啲 兩隻我又驚太集中9988 本身有3手 252 253 14x
285 31.4 有1500股
龔成老師︰
我建議你最好分2,3注去入，同埋阿里(9988)因政策影響，不確定性高左，唔建議你持有太多。
另外，正如我之前所講，你現時較偏重潛力股。
你最好抽翻部份資金，去投入平穏增值股，否則你個組合波動性會偏大。
Q24534：
老師～我31歲(投資有7-8年，巴菲特&彼德。林奇 既書都讀過幾次～唔算太新手）
股票總值150幾萬。
BYD $180 & 297各賣了一手，但現時都佔個倉40%
想問你係咪都係咁～？
Thanks
龔成老師︰
由於比亞迪(1211)近2年好波動，係計算佢市值時，最好用平均數。
現時佢佔你組合較多，都無法子。此股有質素，你可以保留。
但現價已經貴，暫時唔好再加注。最少要等回到$220以下，才考慮小注月供。
Q24535：
我有以下問題想請教你啊！
1.北京汽車#1958
請問這個是否潛力股和值得長期持有嗎？（好似1211）還是屬於炒股風險高，還是有質素及有升值潛力呢？
請問這個股什麼價位是便宜呢？
2.深圳國際#152
自上你班後，你介紹給我作為公路股配置，我由10.x入貨、9.x加注、8.x再加多一注，現價已經跌至7.x，我是否仍然可加注嗎？（此股我有預算分5注入的）
此股這半年一直下跌是否有什麼核心價值問題呢？
請問這個股什麼價位是便宜呢？
3.深高速#548
這個股價非常穩定和硬正，企在$7.x附近，反而未能有大跌機會讓我進埸入貨。
請問這個股什麼價位是便宜呢？
FYI…..公路股（#152, #548）約佔我整個配置表的10％
謝謝龔Sir幫忙解答
龔成老師︰
我都預祝你聖誕快樂!!!
- 北京汽車（1958）質素只是中等。
佢主要於中國從事乘用車車型設計、研發、製造及銷售，及提供相關服務，乘用車包括轎車、運動型多用途汽車（ＳＵＶ）、多功能乘用車（ＭＰＶ）及交叉型乘用車。
集團亦通過持有51%權益之北京奔馳汽車產銷梅賽德斯－奔馳品牌（Ｍｅｒｃｅｄｅｓ－Ｂｅｎｚ）乘用車，並為中國唯一一家該品牌的轎車及ＳＵＶ之製造商。
另外睇翻佢資料，佢的自主品牌包括以下三大產品系列「紳寶」「北京」「威旺」。
表面上好似有d品牌價值，但過往業績一向都一般般，盈利波動，同時無太大的增長力，反映產品的賺錢能力唔算強。
同時品牌對經濟有一定的敏感度，而近年中國經濟一般，影響生意，相信這情況會持續一段時間。現價合理，但長遠的發展力唔算好強。
- 深圳國際（0152）有質素，是不差的收息股。
其業務主要分為收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。
近期大市氣氛差，加上環球經濟或再因疫情，而出現不確定性，當其業務都會有影響，故下調係正常。
而你要分析的，係佢長線投資價值。公路部份，其實都幾穏定(唔計疫情影響)。而其他部份，雖然會有波動，但整體算平穏。
這企業係有質素，你用來收息係可以。唔需要理中短期波動，照持線持有收息。
至於是否加注，要睇翻佢現時佔你組合比重。如果已經接近，甚至高過15%，你就要停一停，以免出現過度集中性風險。
現時佢只佔你10%，可以再分2,3注，再去入多少少貨。
- 深圳高速公路股份（0548）有質素的，這股持有不少有質素的資產，現金流穩定，不過增長力不強。
這股有長線投資價值，收息可以，但就不要對股價有太大期望。現價合理。
你唔好預佢有大跌，現時佢佔你10%，你可以等佢有較明顯回調，就再分2注入貨，並長線持有。
Q24536：
老師，港股倉蝕左我25%,例如700，我總平均價係614，而家去到438，應否入貨定繼續不理它，繼續月供
又例如1928，我平均價25，而家16.5,這股我無月供，又應如何處理。
最後想請問，應否轉投資美股，例如投資ETF,希望賺返港股暫時失去的
龔成老師︰
一隻股票投資價值，係睇佢質素、行業發展前景等，而唔係睇佢中短期股價升跌而定。
騰訊(0700)係有質素，你可以照月供。其實月供，就係透過長線平均價格入貨，去拉平衡個買入價。故現時股價低，反而更加要保持月供。因為可以用同樣成本，買到更多股數。
至於金沙(1928)，由於佢續牌風險，令佢不確定性高左，你若有一定貨在手，停供係可以。但佢依然有長線投資價值，現貨建議保留。
長遠要建立一個更平衡的投資組合，同時投資港股及美股，能有效減少風險的集中度，因此這是方向。(我並不是說港股無左投資價值，佢依然值得投資，但就要平衡。)
我相信中國、美國，都是全球兩個長遠最大經濟體，同時投資會有不差的長期回報，美股如不懂，最簡單是投資ETF，如追蹤標普500的VOO，分注或月供，都有不差的長期效果。
現時美股不算便宜，就算你美股無貨，都不建議現時一次過大手投資，最好是慢慢分注，平衡自己在財富配置的比例。
相反，也不建議完全不投資港股，因為當中仍有有質素的企業，長遠仍有當中的價值，只是有些企業的增長力，比過往減少左，因此只需平衡配置就得。
Q24537：
龔sir你好，又係我吖。我想買下，127已經否決咗私有化，我早前已經沽晒，我想問值唔值得再入返？謝謝你
謝謝你
龔成老師︰
華人置業（0127）質素只是中等。
佢主要從事物業投資及發展、經紀服務、證券投資、放債及化妝品分銷與貿易業務。
不過過往有一段時間，賣出了不少資產，過往多年派大額的股息，現時企業的業務發展力已不足。加上佢過往私有化的行為，反映對小股東唔太好，不過，現價又唔算貴。這類股，不宜持有太多。
Q24538：
老師想問下 百事可樂 ，visa 咩價可以入？ 長線可以嗎
龔成老師︰
百事可樂(PEP)是一家全球性的食品和飲料公司，業務遍佈全球大部份地區，品牌知名度極高。
過往多年盈利和派息，都有穏步增長。但由於企業已有一定規模，故難以有明顯增幅。
此股算是平穏增長型股票，有投資價值。現價計有少少貴，但由於佢有質素，好多時都唔平。無貨可以考慮先小注，到有明顯回調，才開始正式入貨。
Visa Inc Class A (V)是一家在200多個國家和地區提供數字支付的支付技術公司。此股有品牌和規模，長遠發展正面。
睇翻佢過去3年，發咭量和交易次數，都係維持增長。但盈利無明顯增長，雖然2021年首2季，由於疫情放緩，令收入有所回升，但盈利未見有明顯增長。
整體而言，企業係有質素，值得長線投資，但只會係平穏增長型。近年集團在加密貨幣範疇加強部署，在未來或有機會成為一個新增長點，可以再觀察。
現價計，己經唔平。無貨可以考慮小注，回多1,2成才開始儲貨，值博率會更好。
Q24539：
老師，請問上市公司提出私有化，回購價制訂標準係點定？係咪任佢開，小股東只可硬食？
龔成老師︰
其實係集團本身去定，但小股東唔一定硬食，因為可以投反對票。
就好似之前華人置業（0127）咁，投票架時候得不到足夠票數，最終都過唔倒私有化提案。
Q24540：
sir你好，我係月光族，有賭癮，我月入1萬7 我今年23歲 手上既積蓄得返4萬左右，仲有得救嗎？
我個4萬買左金沙中國
龔成老師︰
首先，如果你有賭癮，或者理財不善架情況，你要先處理好。如果較大問題，可以找專家協助(如社工)。
其實你才23歲，十分年青。只要你調整好理財觀念，和學習正確的投資知識，係可以得到唔錯回報。
雖然你人工唔算多，但你都要盡力儲錢，去做投資增值。因為你年輕，可投資時間長，複息效果會較高，要好好把握這個優勢。
當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。
例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。
以你現時23歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。
策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。
你現時你無太多投資經驗和知識，潛力股這類風險較高的股票，你就不宜持有過多，最多維持2-3成好了，甚至先集中係平穏增長股類。
到你學會更多投資知識﹐潛力股比重才可以相應調高，佔組合約3-5成，視乎你當時投資知識多寡和了解這些股票程度而定。
餘下的另一半現金，我地就等機會，當大市出現較大回調，就加大力度掃貨，然後作長線投資。
至於金沙(1928)你可以照持有，但如果佢係你組合的全部。我建議你沽少少，換至其他股票，去平衡風險。