以賣龍床盤聞名香港的內房發展商佳源(2768)，昨天再度成為全港焦點，原本股價整個上午都在12蚊樓上，在午後兩點左右開始沽盤不絕，到兩點半時低見8蚊，跌咗三成幾，青冰亦係這個時候開始留意到，之後立即將消息post在fb專頁啦，cap screen之時跌60%，點知打完幾隻字，已經72%。

正常見到這些情況，是斬倉吧，可能是大股東押股之類，而青冰在彭博機再細心一看，原來佳源有隻2020年到期的美元債券，也是急跌，再望清楚啲，另一隻債券，到期日就是2019年1月17日，咦，係唔係冇錢還呀？在中午時份，人行副行長潘功勝曾在公開場合表示，中國債市有一定違約率是好事，有助長期健康發展，咁青冰不其然將兩件事串連，唔通佳源咁聽話「犧牲自己」去促進發展？

那個美元債共有3.5億美元，折合約27億港元，但按半年業績顯示佢哋係有85億元現金，廿零億都拎唔到出來，咁盤數咪有假味？好衰唔衰個核數師係德勤，早幾日先有報章話，德勤有5個客戶屬沽空機構列為有問題的公司，在Big 4內算是最多。當找到更多資訊，再配合股價跌極都有，更加深信是有問題了，股價最低見1.40元，跌89%。

接飛刀非青冰的專長，所以昨天並沒有入場，但青冰相信有衝入場博一博的散戶，應該未必知道以上資訊，心態都是炒一轉就走，如果有total loss的心理準備，這些飛刀的確是幾刺激，因為兩三成回報，可能十幾分鐘內就派彩。

收市後佳源澄清該3.5億美元債已全數清還，而集團一切運作亦正常。不過一隻正正經經的股，應該不會半日跌九成吧，最差的情況是違約及停牌，看通告就應該不會，但通告亦沒有詳細交代原因，所以押股被斬應該是下一個靠譜的估計，這亦跟昨天青冰看到中資劵商不問價沽售的情況吻合。

如果戰友昨天接飛刀兼過埋夜，只要今天唔停牌，贏面相當高，但經歷過暴風洗劫後，仍唔見得日後可以當無事，所以還是睇少一隻吧。

Fb個人專頁 http://www.fb.com/chingbing888