Q35651：

想問下ETF係咩黎 風險如何 有咩etf可以推介

龔成老師︰

其實ETF (Exchange-Traded Fund)，就即係交易所買賣基金。你買佢就等同一次過買入一些指數成份股、特定行業、商品等。

我一般推介的都係「被動型」ETF，被動地追蹤好似VOO（追蹤美股標普500指數），港股如恆指、科技指數等，以盈富(2800)為例，只要每年付出0.1%成本，就可以同時擁有數十隻成份股，從而有效地分散投資風險。

如果你本身係初學者，建議你買盈富(2800)和VOO，佢地分別係追蹤恆指和S&P指數表現。由於ETF當中包含不同行業架優質股，能有效分散風險，適合初學者作為投資目標。

你可以同時投資VOO+2800。

長線你可以用分注或者月供模式，去慢慢儲這2隻ETF。但唔好太過偏中其中一邊，要平衡。

同時，長線要努力提升投資知識，令自己可以定平貴和自行選股，以提高長線回報效益。

Q35652：

老師～煤氣股00003 宣報退股，持有的股票應如果處理？

謝謝

龔成老師︰

煤氣(0003)無宣布退股，如果你指近期的通告，佢的通告講架係佢債務證券(5749)。

一般如果以主動型式退市，公司都會以現金或股份方式，向小股東買回持股。

如果係被動(強制)退休，即係公司觸發了聯交所的強制性退市機制，例如重大違規，但暫時又未見有咁架情況。

Q35653：

6號仔 電能實業 前身 港燈

香港有兩間電力公司

兩間電力公司怎樣對比

龔成老師：

電能實業（0006）會比中電（0002）更加國際化，同時在風險分散方面，會做得較好。其實兩隻都是不差的收息股，壤長力不算強，但就有基本收息及平穩增長的能力。

電能實業（0006）佢主要從事投資能源及公用事業相關業務，範圍包括火力及可再生能源發電，輸電和輸油，配電及配氣。

佢除左持有港燈（2638）外，亦有國際業務，如英國、澳洲、新西蘭、中國內地、泰國、荷蘭、葡萄牙、加拿大和美國等能源及公用事業相關業務。

這股是收息股，但增長力就不強，有長線投資價值，適合中低風險類的投資者，投資目標是收息，及有少少增長，而這股的股價也較穩定。現價合理區較下部。

至於中電有質素，是不差的收息股，長線投資無問題。

佢在香港、澳洲、中國等地都有業務。業務穩定，現金流強，這類股適合收息。

雖然股息率唔算好高，但每年的股息都有少少增長，長遠收息正面。現價合理。

Q35654：

老師好，想問比亞迪，未來發展，現價適合購買嗎

龔成老師：

比亞迪（1211）業務發展理想，研發不斷進行，汽車賣得好好，電池技術發展得很好，行業前景良好，企業長遠發展正面。

現時已經成為中國電動車市場的一哥，同時品牌及銷售網絡理想，長遠仍有發展，不過，唯一擔心是股價波動。

現價約在合理區中下，由於一手入場費較高，可考慮小注月供可以。如果想一手手買，就要睇你資金情況，如果你只得一注資金，建議等佢回翻多少少先。如果有多注資金可分注，現價已可以買入（但要留意，這股佔整個股票組合，最好在15%以下）。

如果本身有貨，可長線，雖然企業最爆炸性增長已過，但長遠仍有發展，但就預佢股價波動，因此，只要持貨不過量，就可以長線持有。

Q35655：

龔成老師，請問371定3718 現價值博率會高的呢？

龔成老師：

北控水務集團（0371）會較好。

主要在中國從事污水處理服務，包括：

（１）污水及再生水處理及建造服務：從事污水及再生水處理廠的建造及經營、海水淡化廠建造及提供綜合治理項目的建造服務。

（２）供水服務：從事自來水的分銷及銷售以及提供相關服務。

（３）技術及諮詢服務：提供有關污水處理及綜合治理項目建造的諮詢服務，銷售設備以及授權使用有關污水處理的技術知識。

業務不差，但負債較高，影響了企業價值，整體來說，可長線，但唔建議持有太多。現價合理底，企業質素未到最高類，只是中等。

Q35656：

龔成老師新年快樂，身體健康，萬事如意。請問我想買一隻美股作長期投資，年期是五年以上，因為資金有限，只能買一隻，請問邊一隻穩定且有增長潛力

龔成老師：

當你太集中在單一股票時，就會出現集中風險，其實每隻股票，最好佔組合比例上限為15%。

因此，如果你資金有限，美股最好買一些「基金」或「組合」類的。

Vanguard S&P 500 ETF（VOO）是最好的選擇。

佢就是追蹤美股的ETF，追蹤指數是標普500指數，當中都是全球有實力的公司，有長線投資價值。

由於美股波動，不建議一次過大手買入，最好的方法慢慢分注，或以類似月供模式進行，長線持有，這是一個最好的投資策略。

如果你想買個股，可考慮一些統合企業類，如Berkshire Hathaway Inc（BRK.B）即是巴菲特主理的巴郡B股。

巴郡是一家控股公司，擁有從事各種業務活動的子公司，包括保險和再保險、公用事業和能源、鐵路貨運、製造和零售，屬於大型綜合企業，可以理解為一個投資公司，或可視為一個基金。有質素，可以長線。

由於有巴菲特作操作，基本上有一定質素，有長線投資價值。

巴郡的平貴度，建基於其資產組合平貴度的分析，考慮到現時主要持股的平貴度，大致推算巴郡在合理區中上，有興趣的投資者可分注，或用月供方法去儲貨，並長線持。

Q35657：

老師，雖然呢刻港股好低殘，但我發現價值投資真係把握到便宜區入貨，給點耐性，回報應該真係可以好可觀🤣⭐️例如呢刻恒指再升多二千點，都只係萬八點，都仲係底部，如果等到牛三狂熱期才放就真係不得了老師

龔成老師︰

無錯，但耐性好多人都無，背後係因為佢地對相關投資項目無信心。

而點解無信心，因為佢地根本無能力認清楚當中架價值，所以點解我成日會講，長線投資回報，必然同你架知識成正比，就係而個原因。

當然，我地一定希望現價入完，一直升到去牛三狂熱先放，咁就最理想。

但記住，就算最優質架股票，都有機會出問題，可能係政策、科技、或者佢營運條件等等架因素造成。因此，緊記1年左右，就要審視下D持股，邊重溫、邊等待佢地成長。

Q35658：

Sir, 想問下建行現階段4.72和港交所 552，入得過？

一直都有留意建行 不過上個月中個低位錯過左。

388 本身有5手，平均261。

龔成老師︰

現時2隻股票都在合理區中下位置，可以分注。

但留意翻，個股唔好超過組合15%，你現時0388有貨。如果已經超標，就算再跌都唔好再加，以免太集中一隻股票，而造成風險。

Q35659：

我係家庭主婦，沒有收入的，現時有大約$50萬saving,請問可以做什麼投資 ，能夠賺取額外每月收入

龔成老師︰

你是家庭主婦，沒有收入，投資的話，應該建議保守少少，不要冒太大的風險。

(除非你本身好有投資經驗，或者你日後提升倒自己投資知識去到一定水平，否則以你無收入人士計，不太建議投資太進取的股票。)

你可以將部分的資金，做定期存款和買入收息股，又或其他較低風險的工具。

如果你想保守D，可以集中少少係定期。相進取D，可以集中係收息股。

長遠可以建立一個收息股的組合，目標是5%以上股息率的收息股，例如港燈（2638）、深高速（0548）、香港電訊（6823）、工行（1398）、置富（0778）、陽光（0435）、高息基金（3110）都可以，你可以了解下，並從中選股。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）等（記住，股價略波動，不能太過大注）。

現時大市處於合理區底部，你可以將預算投資收息股架資金，分成多注慢慢小注買入上述股票(例如分成12注，每2個月入1注)，丮這個模式去儲貨，之後再長線持有。

Q35660：

龔先生早晨，請問有關穩定收息股，除了941/883/386之外, 請問: 5/939/823 可以考慮嗎?

還有沒有其他更好的選擇，能令收息組合平衡+穩定一點 (為日後退休作預先安排), 謝謝你啊.

龔成老師：

941/883/386當中，941及386會較適合作為收息股。

至於5/939/823，都是不差的收息股，現價合理，可投資，但要留意，同一行業的股票，不能佔你組合%太多。

另外，你也可以考慮其他收息股如3110、6823、2638。