Q28551：
老師2777現價可入？另外2007兩隻邊隻好？
1999買入16.4現5. 1留定放好？
龔成老師︰
現時内房存在監管的問題，再加上企業本身的高負債問題，投資價值只屬於中等，如果本身可以承受風險，小注可以，富力地產(2777)和碧桂園(2007)比較，2007會較好。
敏華（1999）唔差的，業務上有優勢，都有長線投資的價值，你的買入價錢偏貴，再加上現時市場因爲美國加息等不利因素影響，中短期都會偏弱。
如果你持貨不多，可以守住先，但要預上翻去要一段長時間。
Q28552：
龔Sir你好，個市啲價開始吸引同時都當然擔心係咪仲可以去返之前的股價。
想問以下股票值得加注嗎？（本人持有少量）最擔心係騰訊，阿里同銀娛，想睇睇龔Sir你點睇
港交所388
友邦1299
銀娛27
阿里9988
騰訊700
非常感謝
龔成老師︰
只要是優質的股票，長遠一定會回歸其合理的價值，中短期的波動，不用理會。
騰訊（0700)，阿里（9988）因爲監管的因素，中短期都會較弱，但他們都是優質的潛力股，只要持貨不多，都可以守。
雖然澳門的賭牌續牌已經明朗化，但澳門博彩業仍然存在不確定因素，因此，銀娛（0027）不建議持有太多，要保守少少，控制注碼。
其他的都是優質的股票，可以長期持有。至於加注與否，要考慮現時的投資值博率和你整體組合的分配。
你持有的股票現時都處於合理的價錢，但如果持有現金少又或者本身已經有好多貨，建議可以先等一等。
Q28553：
龔sir, 可唔可以講吓你投資股市嘅經歷，由大好市到股災，當中你嘅資產點樣大升大跌，你又如何調整自己嘅心態？
謝謝！
龔成老師︰
一定要平常心，唔好太著重短期因素與價格，集中睇長遠的企業價值，就可以在當中把握機會。股災，個個都驚，持貨多輸好多，加上有無數咁多負面消息。
無錯，從短期角度，的確可以好多壞消息，但市場一向都有做習慣，就是將壞消息過份放大，令股價大跌，散戶因恐慌而賣出，所以，投資者只要以平常心對短期情況，唔好太著重自己這刻的身家多少，不要著重股價，而是著重企業價值，就得。
我舉例乜野叫平常心對股價，你明左，就知我點面對股災，面對價格大上大落。我持有比亞迪（1211）已經14年，由$2x升到上$88，試過跌翻$12，之後多年後，又升到近期$300，之後又跌翻。
當時比亞迪（1211）$88是貴，賣出，等跌買入，的確有賺，如果佢企業價值增加，佢股價的確不會支持到$88。
但如果好似近年，佢的業務開始增長，全球都開始用電動車，佢上到$100最初是貴的，但由於企業價值有增長，慢慢又變成合理，如果用你的方法，就會在$100賣出了。
你試想想，如果用短線思維，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」。
好多人有睇股價的習慣，但我好少睇，同時，我平時都會用「長線」的思維看待問題。
當我買入一隻股票的時候，我會問自己：5年之後企業的發展如何，經過分析，寫企業評估表，知道自己持有的是優質的股票，就會理解短期的升跌其實對企業的價值無影響。
最重要是不要用「買入價」去評定一隻股票的質素，而是要分析企業的前景，賺錢能力，當你明白自己投資的是什麽公司的時候，自然股價跌，你都不會怕。
Q28554：
龔大大，好耐無私訊你。我細既小朋友就黎已經1歲喇。最後我都繼續做野請左人湊小朋友。 想請教下依家應該點樣部署好， 想分注入d收息同升值股。 有40萬現金， 心思思諗
緊VOO, 安聯月派息基金， 3988/939, 386/ 883, 303 (又或者長和系) 。想聽下你意見。
依家手持有1,386,939,1038,1113,2845,3033 加埋約50萬，負緊-30% 左右。
龔成老師︰
先講你的組合，長和（0001），長建（1038），長實集團(1113)都屬於長和系列，有集中的風險，因此長線不建議持有太多，保持組合平衡。
中石化（0386），建行（0939）屬於收息股，可持有收息，但增長力就不算強。
GX中國電車（2845），南方恒生科技(3033)屬於潛力股類別，可以持有，但就要注意波動性，投資的時候要「分注」。
至於你想投資的項目︰
Vanguard標普500指數ETF〈VOO〉，是追蹤標普500指數的ETF，可以月供或分注。
中行（3988），建行（0939）屬於銀行股，你現時已經持有建行，銀行業風險較一般行業高，建議你維持組合的20%以下較爲合適。
中海油（0883）屬於商品類別，自主定價能力不高，質素只係中等，不適宜持有過多。
偉易達（0303）作為收息及平穩增長股，可以，但增長力就不算強。如果你目標係收息為主，加基本增長，此股可投資，但不能太過大注，現價合理。
而長和系，你已經持有不少長和系列的股票，若佔比係高的話，就不建議再加入同一系列的股票。
如果你不懂選股，基金都是一個可以選擇的項目，但市面上的基金有好有壞，你要分析基金的管理費用，10大持股，過往回報等再做決定。
由於你有一定貨在手，現時又未算好恐慌，未係大手入貨時候。你手上$40萬可用少少買入收息股或平穩增長股，餘下就等大跌市時動用。
除了你想投資的項目外，以下這些收息股或平穩增長股都適合你，你可以參考下。
Q28555：
老師，我上次同你講我月供股票，分別是盈富，領展，建銀同交通，但是現時一路都跌緊，所以真係有點猶豫繼唔繼續月供好，想請教一下。
龔成老師︰
我唔建議你停供，因為月供係想透過"定時定額"的方式，去平衡價格波動風險。如果你時供時唔供，但會影響到這個平衡價格波動效果。
你的組合中，盈富（2800），領展（0823）都是有質素的股票。
建行（0939），交通銀行（3328）屬於銀行業，銀行業的風險教其他行業爲高，建議你控制比例，維持組合不超過比例20%。
現時環球的股市都處於較爲悲觀的情緒中，一連串的不利消息令到股票市場甚爲波動，但這些股票都有長線投資價值，所以係值得保留。
另外，月供是長期累積資產的策略，可以平衡價格波動問題，建議你不要受中短期市況波動影響，去停供。如果真要停供/減少供款，可以減少建行和交通銀行的比例。
Q28556：
龔成老師你好，我今年三十二歲，說來慚愧，而家先至開始學投資，以前一直只係以為只要減少開支，拼命咁儲錢就ok, 原來唔係咁既一回事。睇你回覆其他網友既問題真係學到唔少野，多謝你
咁有心去回覆每一個人
我想請教你，我而家同我fiancé係住係英國，係英國打工，想開始買下index fund, 呢啲係咪就係你提到既月供股票？ 我睇youtube 介紹話可以買S&P500, FTSE 100, 有同事講話
如果買index fund, 買美國會比較好，因為佢地capitalism 競爭強啲，所以長遠會升得好啲，我睇返google 個graph 又岩，S&P500 真係升得多啲，唔知你又點睇呢？
同埋我擔心而家英國經濟咁差，仲值唔值得而家開始買index fund, 定係應該等個股市再跌啲先開始買呢？
我地大約扣除開支可以每個月投資£500 咁上下
暫時未有打算自己揀股票黎買，因為真係好初學，唔係好敢買住，希望年底可以返香港買你既書黎進修下先
謝謝你！
龔成老師︰
「有心唔怕遲」，你想增加知識，可以睇我寫架《80後千萬富翁》、《財務自由行》和《股票勝經》，都適合初學者。
如果你有了解過財富系統，就會知道現金長期貶值，它只是「政府的票據」，沒有累積的價值，所以我地要學習持有資產。
「月供股票」同index fund不同，前者是理財的一種策略，適合投資初學者；後者是股票的組合，所以，你可以月供index fund（指數基金）。
美股的指數基金可以考慮Vanguard標普500指數ETF〈VOO〉，是追蹤標普500指數的ETF。
港股可以考慮盈（2800），是追蹤幾十間質素不錯上市公司股票的組合。
過去10年，美股整體表現的確優於港股，但唔代表未來10年，都會係完全一樣。我只能說，我預期未來10-20年中美會是全球最大的2個經濟體，故都有投資價值，所以你都可以考慮當中指數基金。
現時全球的經濟因爲美國加息，疫情等不利因素中短期都偏弱，不單是英國。
我地投資唔需要「摸底」或「估走勢」，只要在合理區或平宜區買入股票，長線就可以賺錢合理的回報。現時美股都處於合理區水平。
不過，你作為初學者，對市場平貴度未必掌握到，建議你都係用月供模式去儲貨。最少要供3年，和持有5年才會有理想效果。
你可以暫時先多些了解釋投資，從指數基金著手慢慢「月供」，等你有一定的選股能力先好投資個別股票。
Q28557：
老師，想請教下如果選擇月供3110是否一個好嘅選擇？還是選擇3988、1398之類高息股？因為3110要收0.68%管理費。謝謝你
龔成老師：
GX恒生高股息率（3110），是一個投資收息股的基金，追蹤恆生高股息率指數之表現。
可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。
這是不差的收息組合，但增長力不強。
你都可以投資部分在這基金，好處是「平衡風險」，沒有集中單一股票，但缺點是管理費。所以，你可以買這基金，只要不過多就得，可同時加少少其他收息股。
Q28558：
AMD $84, meta $158. 請問是否要cut?
龔成老師：
要賺你持貨比例，你預meta中短期弱，而AMD較波動，但長遠又不是無發展的，如果你能承受風險，長線，以及持貨不過多，都可以守。
Q28559：
sir, 請問現在50歲，有自住單位，未供完，有首期，現在應否跌市，買樓收租，謝謝你，
龔成老師：
你要建立一個平衡你財富組合，你可以計一計，如果你增持物業後，會令你整個富組合，大集中在物業類別，就未必值得做。你反而可以考慮投資物業以外的工具，基金、股票、債券、房託、銀行產品等都得。加上現時樓市未算跌得好深，租金回報率只是一般，未算好吸引，因此，從投資角度不宜太過心急。
Q28560：
龔成老師早晨。 有問題請教老師。 本人預了20-25萬。趁低吸納。相買3968 招行。或 941 中移動。 請問2 隻 邊隻較有升值空間招行睇返之前都升過 $60 現在價$37 左右可以買嗎？。941 中移動又咩價可買？。 請給意見。 謝謝老師
龔成老師：
招商銀行（3968）有質素。
雖然佢在規模上，不及4大內銀，但過往的生意與盈利增長不差，以增長力來說，這股不差。
雖然佢股息率不算高，但以質素及增長力未說，這股在行業裡算不差。現價大約在合理區中間，有長線投資價值。
至於中移動（0941）都有質素，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。
可視佢為收息股，增長力不算強，這股有長線投資價值。現價合理。
其實兩隻現價都可以，但不建議你整個投資組合只集中在兩隻股票，所以都要控制投資金額。