Happy Friday，本欄逢星期五刊出，但其實青冰以往最不願看到的，就是手持的股份選擇在星期五公佈業績，根據過往經驗，都是瓜多過菜，原因係周五出業績，自然是周六才見報，而星期六的財經版都係較少人看，出一個爛業績，少啲人知，少啲曝光，無咁肉酸嘛，不過隨著報紙愈來愈少人睇，而網上資訊愈來愈發達，基本上醜婦很難避得過家翁，星期五業績魔咒似乎無咁有指標性了。
近年經常爬通告搵料，亦發現一個新趨勢，愈夜出業績及消息，負面的機會比較大，這裡說愈夜，是指晚上十時至十一時，報章媒體往往已經截晒稿，除非是大鑊嘢，否則媒體都不會有顯著報導，上市公司就可避重就輕，閃閃縮縮的出通告。近期有一個有趣的觀察，發現香港電視(1137)每月公佈的銷售數字，趨向愈來愈夜公佈，在四月及五月公佈時，通告選擇在晚上十時後發出，剛巧這兩次條數都唔太靚仔，再睇返去年疫情初起時，每月公佈的通告是較早發出，大部分都是晚上七時前，是否巧合還是有心的安排，戰友可自行解讀。
按上市條例，上市公司須在年結後3個月內公佈全年業績，以2021年為例，如果是12月底年結的公司，就必須在3月31日前公佈全年業績，通常出通告話公佈業績的日子，大概是十日至兩星前，換言之，去到3月中都未知幾時出業績的話，甚有機會是在3月底才公佈，由於近年港交所有新例，審計師的刑責更重，如果傾唔掂數，未必會孭上身，所以去到3月31日才出業績的公司，青冰肯定會敬而遠之，搞到最後一刻先交功課，很難砌詞推搪是疫情關係致時間不足吧，更大的機會係，盤數出咗問題，而大家都睇到，今年有不少公司在3月31日都出唔到業績，最後要選擇停牌，唔少公司到今日，仍然未能復牌。港股中有少數公司是3月底作年結，換言之六月底前就要出全年業績，如手持的股份，在六月中仍未有聲氣，戰友真係要打醒十二分精神，隨時準備要跳船呀。
--