Q35561：

老師，如何看分注和一次過入貨？

邊個會較好？

龔成老師：

視乎兩大因素：

1）投資者本身的實力，對於有實力，能計算估值的投資者，就有機會用一次過買，但如果技巧不足，就以分注較好，我地投資，永遠是想風險為第一位。

2）大市情況。如果大市處恐慌期，才可以用一次過買入，否則在一般市況，利用分注是較好的策略。

Q35562：

龔大，想請教下316東方海外甘高息，pe 又甘低，想分注買黎收息加等股價升值可以嗎？而家系咪便宜區？

龔成老師：

東方海外國際（0316）你要小心睇佢數據。

雖然有質素，但息高及市盈率低，背後有一些情況的。

因為全球運費在早幾年大升，佢近年賺好多錢，股價都上左好多，而近年運費回落唔少，佢盈利都正常翻。之前派息十分多，不過，往後派息將會減少。

投資者不要預期這股是高增長類，也不是超高息股，可以定義這股為平穩增長類型的股票。

不過，這企業並不是無發展的，這企業業務規模大，於全球約於90個國家或地區設有約440個辦事處，於2023年3月，這企業接收了2018年以來交付的第一艘船，這艘

運力達24,188個標準箱的巨型船舶，同時，東方海外表示隨後5年內計劃交付28艘船舶，可見之前由於疫情令發展減慢，而現時各方都回復正常。

現價在合理範圍，不過有一點投資者要留意，航運股對全球經濟週期較敏感，因此會令股價有點波動，投資時都要控制好注碼。現價已在合理區中下。

Q35563：

老師，想請問7261同7266有咩分別? 買邊隻會好D?

龔成老師：

分別不大的，見佢過往走勢都是接近，同時都是追納指的槓杆產品。相信較大的分別是管理費及追蹤誤差，但這方面可能你要上基金網站，比較一下先，我未有仔細研究。

Q35564：

14同1972如何

收息2選1？邊一隻穩健？

龔成老師：

你預兩隻的情況有點似，中短期都是弱，長遠仍有發展，但不是高增長類，收息都是可以，如果你想風險平衡D，就1972，如果想高息就0014（但0014會比1972物業較集中，因此風險會高少少）。

希慎興業（0014）是不差的股票，在銅鑼灣持有多個商場物業，是典型的收租股。

過往受惠自由行人數及消費力，令銅鑼灣商鋪租金十分高，希慎也得以受惠。疫情過後，自由行消費模式有所改變，令銅鑼灣的租金、商鋪估值與高位有一段距離，雖然影響了希慎持有的物業，租金及估值表現，但這企業並不是無價值的，只是增長力比過往年代減左。

長遠來說，企業質素仍在，不過全面回勇要時間。

希慎近年投得一幅加路連山道地皮，這是銅鑼灣十分罕見的土地，可說是希慎利園拓展策略的一塊重要拼圖，希慎計劃將項目發展為配備社區設施的商業建築，更加與希慎現有的利園設施產生顯著的協同效應。

同時，希慎啟動了一個逾20億元重建計劃，為整個利園區各期進行改造工程，包括增設全天候行人通道系統，預計2026年前完成，到時加路連山道商業項目亦會同步落成，會連接一起。可見，管理層仍十分睇好銅鑼灣長遠的價值。

因此，這股雖然中短期未算強，但長遠，這些地始終有一定的價值，因此這股長遠不差。但不是高增長型。

是收息及平穩增長型，現價合理區底部，可長線投資。

Q35565：

Sir, UBER 點睇？

龔成老師：

Uber Technologies, Inc.（UBER）是有風險有潛力類。

Uber係一家技術提供商，可以將乘客與司機、食客與餐館和食品配送服務提供商，托運人與承運人之間進行匹配。

該公司的需求匹配技術平台最終可以用於其他產品和服務，如自動駕駛、無人機交付和Uber Elevate，正如公司所稱，它提供“空中拼車”。優步科技總部設位於舊金山，業務遍及63個國家，擁有超過1.1億用戶每月至少訂購一次乘車或訂餐。

它的總收入中約有76％來自拼車，而22％來自送餐。

我相信佢前景正面，業務有增長力，不過，生意波動加上未有盈利，都是風險因素，而最難的地方在估值，令投資風險不少，我好難講現價平貴度，只能說，這股風險較高，但不是無前景，而投資金額一定要小心控制。

Q35566：

Sir，我找股雖然輸咗，但係始終投入的錢有限，但是我幾年前買了樓，現在貶了百幾萬，啲人話會再跌多一半，其實都好擔心，你覺得係咪會咁厲害呢？

如果真係減息會唔會好一啲，咁其實係咪真係會減息呢，因為距離退休真係非常少時間，都好擔心。

龔成老師：

其實，只要你供得起，就算之後樓價波動，對你也沒有即時的影響。

香港樓價雖然短期較弱，但慢慢會穩定翻，同埋跌一半的可能性極少，不用太擔心。

香港樓市，短期較一般，始終中國及香港經濟未完全回勇，但相信未必大跌，最多少少調整。

另外是高息因素，高息對樓市會不利，這就近1、2年樓價回落較多的原因，不過，這個因素基本上已反映，加上香港買樓需求仍大，相信不會大跌。

而當美國正式開始減息，會對香港樓市有穩定作用，不過，香港減息的力度不及美國，所以難以令樓市大升。

至於內地資金買香港樓，相信香港樓的吸引力，未必及過往，因此內地人買香港樓雖然會存有一些需求，但不會因此而大幅推高樓價。

在投資價值方面，租金回報率不高，以及按揭利率不低，加上長遠樓價難以倍升，令香港樓的投資價值，並不高。

相信樓市在長遠計，因供求關係，較難大跌，不過，也不會有大升的情況出現。

樓市始終需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

不過，近年移民的確令需求略為減少，加上政府將加大力度找地起樓，所以長遠，供求將慢慢好翻，無過往咁失衡。

政府現時有較大決心處理好樓市問題，我相信會令之後的供應增加（不是中短期，要長期才慢慢見到），因此，樓市不會大升，但相信都較難大跌（始終需求大）。

長遠計，樓價會平穩，不是倍升，不會好似過往般倍升，而是平穩，同時，由於需求大，要大跌也不易。

Q35567：

龔Sir 如果投資香港股票

27 銀河娛樂

66 港鐵

1211 比亞迪

1810 小米

是否值得長期投資？ 因為見個市跌咗唔少

睇吓可唔可以買平貨. thanks.

龔成老師︰

你所講架股票，其實都有長線投資價值。

投資者不用太著重短期股價，最重要是長遠的企業價值。

當然，每隻股票都要控制注碼，而一些潛力股如1810、1211風險度會高少少，可投資金額宜比0066、0027少。

現時有中國經濟轉弱及內房負值問題、全球衰退風險、通漲問題、地緣政治和戰爭危機等等架負面因素存在。

表面上，經濟好似復常，但另一邊大型企業正不斷裁員，難言經濟理想。

你要明白，現時面對係過去20-30年以來最複雜架環境，好多問題都一次過發生。所以，你預中短期一定會好波動，但我會邊穏陣投資之餘，都會同時找尋市場機會。

現價計，除左比亞迪(1211)係合理區中間，其餘都係近合理底部，可分注。

建議你唔好等到平宜先買，因為無人知佢地係展開新升浪之前，會唔會一定落一落平宜區。

記住，我地投資係用策略，唔係去估走勢。如果估錯左，你就會錯失左一些機會。正確做法，係合理區慢慢入，平宜區就大手入，去平衡買唔倒貨架風險。

最後，唔好只集中晒係個別地區，建議你加一些美股，去平衡地區性風險。如果不懂選股的話，可以考慮用(VOO)

Q35568：

老師，想問隻9988，股票回購計劃可唔可以理解為阿里睇好自身前景，所以增持企業股份嘅意思？

同埋業績符合市場預期，但其實業績係咪都係叫唔太好？

龔成老師︰

一般情況，都係管理層看好前景，或/和現價處於一個較低架水平，就會出現回購。

業績今次算係一般，但始終整體環境弱，但以阿里(9988)有架規模和技術，長線係有佢架投資價值。

而且，現時的確係一個合理區底架水平，管理層進一步增持，其實唔奇。

Q35569：

1428收息合適嗎

龔成老師：

由於上年有特別息，因此股息較多，而下年股息會變翻正常，收息算是可以。耀才證券金融（1428）都有基本質素，但不是最高類別，同時市值唔算大。

佢係香港的證券經紀行，除證券、期貨及期權經紀主要業務外，亦提供孖展及首次公開發售融資服務。

近年的業務做得不差，相信有長線投資的價值，不過就不是高增長型，同時，佢業務會較受投資市場週期影響。

現價合理區中上部，由於業務較波動，因此唔建議大注投資。

Q35570：

Hi龔sir 。想問下環球潔淨能源前景係咪會好好？如果想買相關嘅etf會推薦邊隻？咩價位入算合理？🙏🏻

龔成老師：

iShares Global Clean Energy ETF（ICLN）係追求S&P Global Clean Energy index表現為目標的ETF。

由於早幾年相關主題炒作較高，所以近年表現較一般。

這基金風險會高少少，價格上落較大，長遠來說，相信有增長力的，但就要留意風險。