Q41911：
hello 上次問過買收息股問題 我最後入手咗3110(1200股) 6823(3000股) 我遲吓再想買埋港燈 長遠3110我再加大手數 呢個方向岩唔岩？
龔成老師：
可以，上述都是收息股，比例上，3110可多D，而2638、6823由於是個股，比例上會少D。
Q41912：
早晨，龔sir，請問比亞迪12股轉贈股即是什麼？
龔成老師：
雖然佢過程好象有點複雜，但不用理，你明最終結果就得。
結果是「1拆3」。
例如你有1000股，最後會變成3000股，當然，股價都會下調至現價的3分1。
股東的實質財富不會改變，比亞迪的目的是想減少入場費，因為現時每一手的入場金額好高，散戶較難入場。
而拆股能提高股票的流通量，方便散戶入場，以及在買賣操作上更加靈活。因此，都算是利好因素。
不過，我地分析企業，最重要睇企業的業務及遠發展，而拆股並不是核心因素，最多只是加分位。
Q41913：
早晨，請問316東方海外 長線退休收息ok?
Or 288 萬洲好啲？
Thx 🙏🏼
龔成老師：
如果以收息角度，萬洲（0288）穩定D。
不過，我並不鼓勵只集中1、2收息股，你要建立一個收息股組合，才能平衡風險。
你可以建立一個收息股的組合，目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）、萬洲（0288）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
Q41914：
你好龔sir。請問9660，2252，是否屬潛力股？可長期持有嗎？謝謝
龔成老師︰
地平線機器人（9660）從事為乘用車提供汽車解決方案，亦提供非車解決方案，使設備製造商能夠設計及製造具有更高智能水平的設備及器具。
是乘用車高級輔助駕駛「ADAS」和高階自動駕駛「AD」解決方案供應商，擁有專有的軟硬件技術。
企業有長遠發展力的。雖然業務發展快速，但企業仍處於虧損狀態，因此，可理解這股為風險類潛力股，如果睇好，都只建議小注投資，相信佢股價上落會好大，如果風險承受能力不高，就不宜投資這股。
微創機器人（2252）是有風險有潛力股。低風險者絕對不適合。
這企業是一家手術機器人公司，致力於設計、開發及商業化手術機器人，以協助外科醫生完成複雜的外科手術。現正開發其核心產品圖邁腔鏡手術機器人在泌尿外科手術上的應用。
佢擁有與圖邁有關的兩項重大專利，即機械臂與傳動機構以及手術器械。三款旗艦產品，即圖邁、蜻蜓眼三維電子腹腔內窺鏡及鴻鵠骨科手術機器人，均已被納入國家藥監局的創新醫療器械特別審查程序。
佢現時於上海有一個研發中心，新加坡有一個研發中心。
過去市場比佢估值數百億，現算就算調整左，都未算平。雖然此股有前景，同時收入都有增長，但依然未有盈利創造出來。
所以，這股算是有潛力有風險類，前景都不差，但投資要控制注碼。始終估值難，同不確定性高，故不能大注。
Q41915：
龔sir，想問下3081價值黃金，係唔係類似盈富基金咁樣架？
另外寫着費用比率0.40%係點樣？
龔成老師︰
費用比率0.40%，即係佢會每年係資產淨值當中，扣起0.4%作為營運費用。
價值黃金（3081）之投資目標為提供黃金定盤價表現非常接近的投資回報（未扣除費用及開支）。
當金價上升，佢都會上升，當金價跌，佢都會跌。
睇翻佢過往的價格表現，基本上都追蹤到黃金的價值，因此都可以成為投資黃金的工具。
佢同盈富(2800)唔同，2800係追蹤恆指成份股，3081係追蹤金價。
黃金用途，主要係對沖黑天鵝事件，而唔係用來增值。故不建議持有太多，佔組合2-5%好了，最好係用實金。
Q41916：
老師， 我見黃金價格下跌於是買了 黃金etf 2840只是兩手。 老師，你看金價前景如何？
是否繼續會升如大行說會去到四千蚊？ 我是否適宜採用逢低就 少少吸納這個策略作長線部署？
另外我今天再看我宏利嘅 債券派息基金 派了息後今天還有少少 增長☺️。 謝謝老師的賜教 ！
龔成老師︰
我自己唔會視黃金，為增值工具。
黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。
不過，黃金沒有現金流，持有無法創造出經濟價值，其主要作用是對沖黑天鵝事件。
所以，你可以投資黃金，但不用佔財富比例太多，我一般建議係佔財富組合2-5%左右就足夠，而且持有的應該為實金。
Q41917：
你好
龔成老師
想問一下非投資問題
不喜歡可以不用回覆
小弟深信經驗同知識
係非常有用同埋有價值的
小弟喺網上
見過唔少紅娘親/媒人
佢哋都一致認為
男人高收入先至係筍盤
佢哋一見你都係問你工作收入同埋前途
如果你係低收入或者孤寒或者慳錢嘅話
佢哋都一致認為
單身係會比較好
女仔唔應該同佢哋拍拖
唔應該拍拖或者搵另一半
就算係高收入
例如50,000至60,000一個月
如果你唔願意喺金錢上邊
大方嘅話
一律都係建議你單身
唔應該搵另一半
想問吓你點睇？
孤寒/窮/係咪唔應該搵另一半？
係咪應該單身一世？
小弟人生經驗尚淺
想問吓老師意見
謝謝老師
不喜歡可以，不用回覆
佢哋認為一係最好，
三嘅話都係唔應該搵女朋友
應該單身一世會比較好少少
唔好害人
佢哋係咁嘅意思
我之前去過一間相睇公司
一去到佢就問我
一入到去就問我
職業係乜嘢？
收入係乜嘢？
有冇考慮考專業牌照？
喺事業上更上一層樓？
有冇物業或者車？
跟住然之後問我另一半有咩要求？
我話我希望另一半係慳錢嘅
佢即刻話冇可能
叫我走
龔成老師︰
首先，唔好先入為主，覺得人地問工作和收入，就一定只係向錢看。
因為一個人架構成，係包括好多野，好似興趣、學歷、工作、運動等等，或者人地只係想更立體咁了解你。而且，現時世代偏向2口子財政獨立，所以其中一方財政過份地弱或強，都未必理想。
同埋，你要明白，而個市場架資訊(同投資一樣)，好多時都係焦點左係一D比較多人鐘意睇架地方。而有些地方係事實，但因為無流量或者其他原因，而係無人講。
所以，你要學識點去分析全局。我相信你所講以金錢現實行先的人，係存在，但不代表所有人眼中只有錢。
而且，現時好多女性都有一定財政能力，焦點也不會完全放在財政方面。所以，你唔好先入為主，覺得女生眼中只有錢，事實唔係咁樣。
當然，事實上財政都會係一個考慮因素，因為大家將來一齊生活，錢係一個大家要考慮架地方。所以，財政上又唔可以話真係太差。就算而一刻較一般，都要比人睇到有上進心，無論工作定投資上，都比人睇到你係有成長空間，會令你更加分。
Q41918：
阿Sir 想問1448點解會分三次派息特別息？唔留咁多現金是否表示企業唔再買地呢？ 現價入我自己覺得處於合理區之下。但係PE有19.75算唔算高？
龔成老師：
其實，福壽園（1448）早1、2年已開始更新股息政策。
企業表示增派息率至不低於35%，漸升至逾60%。
該集團指，上市多年來，營業收入年均複合增長率18%以上，新併入項目已見成效，整體盈利能力良好，現金流水平穩健，認為應採用多種融資手段以提升資金使用效率。
而且已從單一墓地經營商成為殯葬綜合服務商，從一個地方企業成為分支機構遍布全國46座城市，並基於對未來發展前景的良好預期，在綜合考慮經營情況、盈利水平、經營性現金流和發展戰略等因素基礎上提高分紅比例。
我相信這政策，反映兩個情況，第一，佢業務穩定，已經做好風險管理等動做，同時考慮不同的經營環境都有一定的賺錢能力，預期現金流強，因此派息將穩定。
第二，由於政策等風險因素，發展力可能略減，管理層過往不斷利用資金收購同業及土地，但現時政策略有調整，資金慢慢將增加派息，反映企業增長力略減。將會由水桶1，轉為水桶1-2。質素仍在，但增長力略減。
簡單來說，這企業整體質素仍在，但增長力會略減，同時投資者要明白政策風險，所以投資都要控制注碼。
現時約合理區較下部，但不能太一次過投資太多太進取，以分注投資是一個策略。長遠發展仍然存在。
Q41919：
龔Sir，請問$150入手的0700
宜家還有持有的必要嗎？
龔成老師：
最重要是分析企業的長遠，有無發展。
這股長遠仍有發展力，仍可持有，只要持貨不過多就無問題。
騰訊（0700）業務正好轉中，佢過往受中國政策規管影響，令企業之前的賺錢能力略減，以及企業估值都會略減，不過，政策影響又未到核心性，無令到企業無法賺錢，只是賺錢減少。
同時，見中國政府之後在政策上開始有放鬆，相信中國政府明白騰訊這類企業對經濟有一定的重要性，同時之前規管較嚴，開始調整翻。相信行業最差的時期有已過，之後會慢慢好轉。
這企業長遠仍有質素，有發展力的。佢最有價值的，就是「平台」，這亦是現世代好有發展的資產。
佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。
Q41920：
老師，你好，想問下新濠200,2供1供股是怎樣的？謝謝回覆
龔成老師：
新濠（0200），將會進行二供一，供股價港元 1.0286。
例如你持有2000股，就有權供1000股，你要用每月1.0286的價格去買入佢新發行的股票，完成後，就會變成3000股。
如果你不想供股，就可以將供股權賣出。
你要持有股票至除淨日，先有權去供，但要留意，除淨日當天，股價都會有自然調整的。