Q24371：

龔老師，你覺得CPIX如何？

謝謝

龔成老師︰

Cumberland Pharma (CPIX)是一家專業製藥公司。該公司專注於採購、開發和銷售品牌處方藥產品。

業務算有投資價值，近期由於FDA批左新藥，所以股價有較大升幅。

但睇翻公司本身，規模好細，過去多年營業額不算穏定，而且近幾年都係虧損。

暫時初步睇，投資價值只是一般。

Q24372：

1. 老師，想問美股，COIN屬水桶1 BRK屬水桶2

2. 0066, 0823, 2800當中，哪隻的增長力最弱？（3隻也在月供，想減1隻）

龔成老師︰

1. COIN屬水桶1(仲要係高風險水平的水桶1)、BRK屬水桶1至2

2. 近年來計，盈富(2800)會係較弱，但佢有平衡組合能力。相反，領展(0823)和港鐵(0066)都係同屬物業類(0066 - 算半隻)，有少少集中，你可以從中減一隻。

Q24373：

好的 仲會有得上返嗎

福壽園同鐵塔之前都跟左買 喱兩隻都跌到不得了 仲要守嗎

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

福壽園(1448)同鐵塔(0788)都係有質素，你可以照持有。但788增長力減左，不建議持有太多。

就算再好股票，中短期都會有波動，更何況現時整個大市氣氛都疲弱，回調係必然。最重要係佢地質素無變差，所以你照長線持有。其真實價值，必然會反映在股價之中。

你要學識冷靜判斷，唔好太受大市氣氛影響，否則你投資會很危險。

Q24374：

龔sir你好，最近留意新聞報道話滴滴出行打算係香港上市，想問下如果真係係香港上市，會唔會有潛力？同埋預計係幾錢股？

龔成老師︰

股滴滴出行（DIDI)退出美股，暫定回港上市，但一切尚未落實。

根據現時公司通告，現有持股可轉換為公司可自由流通的股份，在另一個國際公認的證券交易所上市。

集團會在之後，組織股東大會，以對相關事宜作出投票。而在投資者，只能再等新消息。

滴滴 (DIDI)是一家經營出行技術平台的內地企業。主要業務為共享出行，為消費者提供各種不同的出行服務。

之前其APPS被內地下架，對佢造成一定影響。由於主要股東是包括UBER、軟銀等外國企業，令中央擔心內地數據外流。未來或對其營運模式，施加限制。

本身集團業務係有投資價值，但現階段尚未有盈利，故不確定性較高。

加上未知是否100%來港，也定價相信會跟當時美股相若，以便過度。此股由於不確定性高，若真係在香港上市，可以投資，但只宜小注。

Q24375：

多謝咁詳細解釋，早幾日美股全跌，富途我之前入了好重貨，平均$107，點算，已經跌咗2/3了，其他SP500,QQQ, 現階段入得過嗎？

龔成老師︰

不要只睇短期市況，要集中分析企業本質。

富途（FUTU）佢係一家在線經紀公司，提供一站式在線投資服務，騰訊（0700）為股東。該公司通過網上平台提供服務，其中包括香港、中國大陸，以及美國股市的市場數據、交易服務和新聞源。

佢以經紀佣金，以及手續費服務的形式產生收入。

早前佢由於被質疑在內地《個人信息保護法》不合規，近期又被指在內地無牌經營，令股價進一步下跌。

相信內地加大對金融平台規管，會是長期政策，暫時未知會影響佢幾大。政策風險係高左，最好先再觀察一下發展情況。若你現時只係小注，可以守住先。若大注，就最好沽少少，去平衡風險。

至於美股ETF，現價只算合理區頂至略貴。如果你無貨，可以入少少。但若果係有貨在手，建議再等等。

Q24376：

你好 請問會唔會開辦online course ？

龔成老師：

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；

✓股票、基金、債券、的士牌等資產的運用和買賣技巧；

✓懂得分辨資產質素和平貴，在最合適的時機買賣；

✓如何以最低的價錢，買到最具升值潛力的物業

✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

Q24377：

Sir，我有滙豐OOOO5，8OO股68元，8OO股60，1元，8OO股44.35元，我本想長線收息的，但現在我該如何？

我是一個68歲阿婆收入不多，衹靠仔女每月給一萬元使用，現見OO5如此情況，我該放還是再等？請教我如何做？

龔成老師：

要睇你持有匯豐的比例，佔股票組合%是否太過多，匯控賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。如果你持有%不過多，就持有一直收息，但如果過多，寫在經濟好翻，股價上翻多少少，減持部分。

Q24378：

1. 老師，又嬴十幾萬都輸返幾萬，心情真係5多好。雖然我都好相信價值投資，但真係要好有耐性同信念。想請問老師我的組合如何？係咪可以守？

謝謝老師。

2. 老師，我有2000股384，見佢半年業績轉差，今日一大支陰燭，而家輸緊30%，其實係咪質素變差要止蝕？

3. 龔成老師你好，本人 32歲，持有15隻股票，有幾個問題想向你請教一下：

現時投資組合

港股

1810.HK 小米 2600股 @24.2

823.HK 領展 300股@60

1177.HK 中生 4000股@6.4

3067.HK 安碩恆生科技 3000股@14.2

3988.HK 中國銀行 13000股@2.8

700.HK 腾讯控股 300股@569

270.HK 粵海 8000股@12

6098.HK 碧桂園服務 1000股@51

868.HK 信義玻璃 2000股@21.8

6186.HK 中國飛鶴 4000股@17.6

1929.HK 周大福 1200股@14.6

2800.HK 盈富基金 2000股 @24

1448.HK 福壽園 6000股 @7.3

302.HK 中手游 4000股@3.7

241 阿里健康 2000股 @20

(1) 想問現時投資組合，有沒有需要改善的地方，或者是某部分需要重新分配？

(2) 想問中國飛鶴同阿里健康有無質素？是否有得守(帳面輸比較多)？

謝謝龔成老師解答以上問題。

龔成老師︰

1. 無錯，價值投資係要耐性。你見全世界最成功的投資人巴菲特，都只會做長線投資，唔會短炒。

因為中短期股價，可以因為好多因素影響，有些因素甚至跟企業無關，所以無得計。但長線企業價值，必然會反映在股價上，只要長線持有優質股，就自然會有理想回報。

2. 唔好用股價升跌，去判斷一隻股票的投資價值。最重要係質素，只要佢質素無變，就算股價出現波動，都無問題。

中國燃氣(0384)今年都比較多事端，早前在瀋陽發生燃氣爆炸意外，10月21日遼寧瀋陽市太原南街南七馬路一飯店發生燃氣爆炸，波及公交車。官方數據稱，事故導致4死、47傷。

今次出事的瀋陽燃氣，其中大股東為瀋陽瀋西，持有瀋陽燃氣70%權益。而背後中國燃氣(0384)，則持有瀋陽瀋西46%權益。

其實佢爆炸事件，已經唔係第一次，早前6月係湖北都發生過同類事件。

該事件導致25人死，逾百人傷。當地公安機關根據初步調查結果，刑事拘留左8個人，其中包括十堰東風中燃城市燃氣發展有限公司姓黃的總經理。

十堰東風中燃城市燃氣發展有限公司由中國燃氣(0384)持有85%股權擁有。

不斷發生同類型事故，令市場擔心該公司安全管理制度，是否存在嚴重缺陷。相信中國燃氣(0384)股價，中短期將會受壓。

以本質分析，中國燃氣業務不差的，財務數據正面，生意與盈利保持向上，股本回報率高，賺錢能力強，不過，負債少少高是扣分的地方。

而今2次事件，會對佢有中短期影響，至於長期，由於會加大左安全方面的成本，政府監管都可能加強，因此點都會影響賺錢能力，但未到核心性。

不過，如果佢再發生更多類似事故，不排除會對經營方面，造成長線影響。整體來說，這企業都有投資的價值，不過風險高左，你預佢中短期股價上落大。

現價算是合理，但注碼不能大，都可以長線投資，未必是高增長類。

3.1) 你現時組合，大致上都可以，但要留意以下2點。

第一，中行(3988)只係收息股，增長力不高，唔建議持有太多。中手游（0302）和阿里健康(0241)業務波動，不確定性大，都令這2隻股造成風險，長線只宜小注。

第二，你而家太偏重左係潛力股(1810, 1177,3067,0700,6186,1448,0302,0241)，佢地雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穩增值股，例如指數基金，港股如盈富（2800）、美股如（VOO）。另外再加、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

3.2) 阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，但你預佢股價上落大。

中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，你買入價唔算平，故大市氣氛較弱時，就較大機會出現虧損。此股長線投資可以，但就要控制注碼。

Q24379：

你好龔sir:我而家32歲,想將財富快增值想請教你以下邊隻股票我應全沽,其實好多都仲輸緊，想你幫我重組下或者應否轉投資其他,感激

(0005):$80x1600

(1810):$13.4x10000

(1211)$37x500

(688)$23x2000

(0027)$47x1000

(1928)$28x400

(3067)$15x4000

月供

(0066)$2000

(823)$2000

(2388)$2000

(2800)$10000

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有股票和月供組合，都無大問題。現時大市氣氛較弱，就算再優質股票，都會有機會出現虧損。但佢地長線質素無變，你照持有就可以。

不過，以你32歲年紀，應以增值為主。匯控(0005)只係收息股，增長力唔會太高，以你年紀，不宜持有太多。建議你沽少少，換至較有增長力股票。

另外，你月供部份，因為你尚算年青，我建議你加入1,2隻潛力股，去提升組合增長力。你可以考慮減少$2000-4000盈富(2800)供款，去加入新潛力股。

潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

Q24380：

1. 新書有冇Google play store買，主要寫什麼？希望你可以分享逆境時心境，如1211由7x跌返去18元，等我哋克服投資逆境

2. 9988跌得好勁，有恐慌出現？

這是個很好考驗

香港和美國，9988見恐慌拋售未？想等果一下

龔成老師︰

1. 新書唔會放Google play store，未來會有2本新書，一本係以Q&A形式，去教大家一些理財投資知識。

而另一本，係50隻新經濟股，當中有一部份會係美股，但未定比重，重寫緊。

克服投資逆境係好重要，這是其中一門必修課。

2. 阿里業績差，相信阿里中短期仍較弱。

阿里巴巴第二季度收入同比增長約3成，而純利逾53億人幣，同比跌8成，非公認會計準則淨利潤285億元，跌4成。

盈利大跌，其中一個原因是上年度同期，有較多投資收益（投資在上市公司，股價上升帶來會計上盈利），如果以較反映經營層面的數據分析（即是不考慮會計、一次性相關因素），盈利下跌約4成，這個數字，當然是不理想，其中一個原因是支出增加，反映行業競爭加大，同時，增長力減少。

另外有一點值得投資者留意，該集團指，調整2022年財政年度的總收入指引，預計2022財政年度的總收入同比增長為20%-23%（而過往預期是30%）。

以最新的業績，以及阿里收入的收入修正，相信中短期的經營環境，仍會較一般，投資者要明白短期股價波動，但長遠來說，阿里始終本身有優勢，慢慢能適應新經營環境。現時，要睇你持有的%，如果%太多，就宜減，如果佔組合比例不過多，就守住先。