老師你好，我早排開始睇你既問答信箱同埋書籍，知道愈早可始投資愈好，將現金變成有價值的資產
但係，由於我係投資新手，並唔係好識得準確判斷股票合理價格（因為工作關係未能參加老師既課程），所以希望以月供股票既方式平均投入股票市場，另外希望得到更加有效率的建議，基本資料如下。
現年25歲，月薪25,000到30,000不等，可用儲蓄為30萬，目標係40歲前做到基本財務自由。
計劃月供＄2000盈富基金 ＄1000中電控股或港燈 ＄1000領展房托 ＄1000比亞迪股份
其實仲有港鐵公司以及建設銀行都想買。
不過唔知點樣計劃買入，另外，現時計劃會唔會太保守做唔到增長既效果，希望老師能夠比小小建議。多謝
個案重點： ‧投資新手 ‧25歲 ‧月入$25000-$30000 ‧儲蓄$30萬
重點目標： ‧以月供股票去累積財富 ‧如何提升增加效率 ‧40歲做到基本財務自由
龔成老師分析：
唔緊要，你保持從不用的途徑增加投資知識就可以了，上堂的作用是最大，你都可以睇下遲d的課堂夾唔夾到時間，因為我每次都會在不同時間開班的。
月供部分包了不同類的股票，潛力、平穩增長、保守都有，是一個不錯的組合，可以進行。中電（0002）的增長力會比港燈（2638）高，如你想增值多一點就供中電。
至於$30萬方面，由於你是新手，同時現時市況不算平，只能動用部分資金，例如一半，同時買入時要分注，投資平穩增值股。盈富（2800）、港鐵（0066）、中銀（2388）、建行（0939）都可以投資。
餘下的資金則等機會，大跌市時才動用。因為我地投資，並不知道之後短期股市的升跌，因此在策略上，往往要留有一定的現金，除非股市見到超平宜的價位，否則不會心急動用這些資金。
如果想財務自由，要開始學習投資知識，你離40歲仍有一段時間，這時期會有很多優質股可投資，而我地會運用「先增值，後現金流」作策略，因此你這刻可做好增值先。同時市況會出現上落，當中有危有機，只要你有能力就可把握到這些機會，會加快你的財富增值。
你保持月供，就已經是累積了一定的財富，若果能進一步把握機會，就更易成就財務自由。
因此，這刻先進行上述的財富分配，同時開始增加投資知識，我相信你40歲可以做到財務自由的！
龔成老師簡介
‧ 暢銷書《股票勝經》、《選股勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者 ‧ 《經濟一週》理財真人Show 節目擔任致富教練 ‧ Now TV 財經節目主持人 ‧ 曾接受港澳多個傳媒訪問 ‧ 過往於銀行從事投資相關工作多年 ‧ 曾在萬多元月薪狀態下，憑股票累積數百萬財富 ‧ 現為全職投資者，擁過千萬財富 ‧ 於網上分享投資心得，瀏覽量過百萬，為人氣博客，解答網友理財問題逾10,000條 ‧ 《經濟一週》、《華富財經》專欄作家 ‧ 擁財務學學士學位 ‧ 證券業持牌人士 ‧ 股票課程導師，香港及澳門學生人數逾2,000人 ‧ 過往10年投資成績，過半能獲利超過1倍以上
Facebook 專頁「龔成」粉絲人數超過100,000人： www.facebook.com/kungshing80
若然你有問題想向龔成老師發問，可在龔成的fb專頁中（www.facebook.com/kungshing80）inbox龔成。
【龔成問答信箱】（Q14001-Q14100）
Q14001：
你好成哥，我係股票班學生，我早幾個月上完你堂開始試下估值銀河同中銀香港，中銀香港比合理區域低，所以我有入市，但市價岩岩好比合理區低部低少少，咁樣應該掃貨定分批買入？
但銀河我預計合理區為 38-54， 我而家見住佢由40 升到現家，我明白合理區內應該分批入注，但係我想請問我的估值合理嗎？而家仍然可以分注買入？
龔成老師：
因為你與企業估值也是近期個月的事，所以未必能完全掌握，仍要多作練習。所以，你估出的數，未必是完全準確，要有少少風險上的調整，咁樣會較好。
中銀香港（2388）是有質素的股票，早前有較大的回落，但仍未到平宜區，暫時仍處合理區的位置，最多只是合理區中下部。所以，這股你可以分注投資，但就不能訓身。
至於銀娛（0027），你估的數則較為接近企業價值，而現時可以話處合理水平，因此可以分注投資。
但要留意，我地進行企業估值時，要分析佢的「盈利」，這個將會影響到佢的企業價值，要進行預測、推算，要考慮佢最新的情況。
Q14002：
請問中國鐵塔同美國鐵塔邊個較為優質? 兩者各自進入左便宜區未? 感謝
龔成老師：
我無特別分析美國鐵塔，所以無法評論。
中國鐵塔（0788）有質素的，之前有少少炒概念，所以之前估值有少少貴。
這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。
考慮到佢的質素、發展能力，這股算是合理區中上部。
由於這股有發展力，可長線。
但如這刻買入，分注慢慢入，可以的。
Q14003：
老師，可唔可以報定5月基礎班？
龔成老師：
要特別同你處理，你先直接whatsapp 55457212，同我同事話「想而家就報名5月班」，同事會跟進的。
Q14004：
老師 sasa178 現價可收息？
龔成老師：
莎莎（0178）雖然高息，但唔好當佢是收息股，因為當佢盈利減少時，有可能會減少派息的。
從業務長期面來說，佢仍有投資價值，只是中短期一定有風險，不確定性大，所以，這股可以投資，現價合理，但就只能小注。
Q14005：
龔成老師你好，我想問6033呢間公司穩陣嗎？ 如果重手買入收息，想聽下你有何建議。
龔成老師：
首先你要明白，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。
因此，你要建立一個平衡的投資組合，當中有不同的類別、不同的行業，這是最好的平衡風險方法。對個別股票或行業太重注，都唔係咁理想。
電訊數碼控股（6033）業務算是不差，佢生意都算穩定，但有時都會出現生意下跌的情況。
見佢過往派息穩定，作為收息股可以，但見佢近年生意額略有下跌，這都會有少少風險。但我相信不太大注就得，這股可以長期收息的。
Q14006：
你好成Sir, 記得成Sir在年頭課堂上提及過(金沙續牌成功機會好大), 不過我想更新吓所以問問成Sir!
另請問金沙, 在什麼價位可以再加注, 早前在36元入咗2手, 佔組合4%, 感謝成Sir!!
龔成老師：
這世界無100%肯定的事，但我地會以擁有的資訊去盡力分析，分析時要理性，唔好比這刻的短期情況影響。而得出的結論，就是金沙（1928）續賭牌的機會，仍是極高的。
$36是金沙的合理價，如果你現時金沙佔你組合的比例不多，現價加注可以。如果已佔一定比例，就可以等跌多1成先加注。
Q14007：
老師，我買左了妖股，蝕左唔少錢，痛定思痛，現在想用 50萬 跟你學習投資選股
我已在 39歲，買股已有10多年經驗，點知呢個月一舖清袋
我最想問，怎樣可調整心態？
因今次真係輸到入哂肉，想盡力調整，但每想起果幾天蝕錢的操作，心情就很不安，十分難受，唯一安慰是有份穩定政府工，請老師指點
龔成老師：
如果你投資的，是一些有問題的股票，當然不能安心，股價上落又大，這情況如同持有一個彈炸，無人知幾時爆，因此，賣出這些股是最安心的做法。
下一步，你要盡量睇多D書，特別是憑投資成功賺大錢，如巴菲特相關的書，你可以更明白投資的操作。
當你有正確的觀念，你就唔會太在意股價波動，因為你明白買股票是買企業，你要訓練自己長期唔睇股價，慢慢變成唔在意股價，只要是優質股，就可以長期持有。
面對賺蝕，亦要平常心，無人想蝕錢，但如果面對無質素的股票，就要理性賣出，所有野要以長期為重，中短期只是過程，如果你能在蝕錢中學習，這都是值得的。
記住，只要你有投資知識，錢一定可以睇得翻的，投資好講理性，你學習平常心面對，都是其中一課。
Q14008：
老師，如果我有筆資金，想買樓又不夠手期，但又不敢放太多有股票上，又不可以放長線收息，因可能隨時要買樓，亦怕坐艇！但又想短期內可以增值。
儲存的現金已越來越少！用下用下就少左。靠份工的收入真係好辛苦！點做？
龔成老師：
我地理財，就是進行一個財富的配置過程，如果平衡各方，都是理財一部分。
如果你目標是在2年內買樓，這筆資金，就不太適合投資，最多只能持有現金，或投資一些較低風險的工具，例如收息股。
現金是最大部分，你要接受這情況，部分可以做定期。如果你目標是首期，盡力儲蓄相信是這刻的重點。
Q14009：
你好，你一直提倡的用便直價買入有質素的股票，向上時都不輕易賣出，因為長期會繼續向上，賣出變成減少利潤亦未必能再買入。
這一點當然明白，可是反過來想，如果在合理價低部的時侯，股價己經反彈向上，豈不是眼白白看著機會流失?購入時間/心態應該可以如何調整呢?謝謝解答
(其實是關於早前問過的楓葉教育(1317)，一直考慮在2.1以下入手，今日一下子升了不少(2.6)才有感而發。無論如何$2.6的己經係合理價中部，入手的價值已經變小，打算繼續觀望同時繼續找尋其他股票)
龔成老師：
首先，你所投資的，要是優質企業，否則我地唔會投資，你上述所講的，亦不適用。楓葉教育（1317）有質素。
至於你所講的情況，「如果在合理價低部的時侯，股價己經反彈向上」，你唔好比「股價己經反彈向上」影響左你這刻的分析，最重要是這刻的平貴，從而作出投資決定。
楓葉教育有質素，雖然增長力比過往減少左，但仍有投資價值，現時仍在合理區，可以投資。
你可能認為「股價己經反彈向上，現價買無咁著數」。這反映你有心理上的投資錯誤，因為無人可能真正捉到底，你這刻買入價比之前無咁平，這是典型的心理問題，我地唔好比之前的股價走勢影響左，分析「這刻的平貴，投資價值率」就得。
Q14010：
龔sir，中國移動(941) 同 比亞迪(1211)
現價 一個$60以下 一個$40以下，你認為那隻值搏率更高，希望長線持有得到更高回報。唔該龔sir
龔成老師︰
中移動(0941)有質素，不過就政府唔想行業的費用太高，因此行「提速降價」政策，會影響佢長遠的賺錢能力。此股只能收息用，預增長力不強。
而比亞迪(1211)主要業務電動車，將會是未來增長力所在，預期未來會為集團帶來不錯盈利增長。
現價2者都在合理區偏低位置，如果以買入價平貴去評值搏率，2者差不多。但以長線增長潛力和回報考慮，一定是比亞迪(1211)較為優勝。
Q14011：
龔sir, 中國聯通現價便宜嗎？見佢呢排跌得好西利，之前7個幾入左d，有d擔心
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
中國聯通（0762）質素無大變，你不用太擔心。集團始終是中國3大電訊商之一，點都有實力，但如果你睇翻佢的損益表，會見到佢5年的營業額，都無乜增長過，股本回報率則長期處於較低水平，反映企業賺錢能力不足。
因為中國政府想人民用電話費上網費較平，所以佢只能賺合理，而不過多的利潤。因此，你要預期佢長遠只會平穏增長。
Q14012：
老師你好，941 我79.05入，到而家我應該等還是止蝕離場？
龔成老師︰
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
中移動(0941)仍然有質素的，不過就政府唔想行業的費用太高，因此行「提速降價」政策，會影響佢長遠的賺錢能力。
你預這股是收息，以及平穩增長的股，此股有得守，持有無問題，但你要預佢要多點時間才會回到你買入價。
Q14013：
龔成老師你好：
本人35歲，與太太育有一女(一歲)，我現時月入32k, 扣除所有必需開支後, 每月可儲蓄約10K－12k(每年預計儲蓄增加4%)，另現時現金有20k，沒有物業。
理想目標想55歲時滾存足夠資金(千二萬)，可以產生每月50K的被動收入 (除了希望被動收入可以應付日常開支，更希望做到被動儲蓄, 用作投資)。
閱讀老師的著作和文章後，一年前開始小注作嘗試(0005 $73.5@400，941 $81.5@500) 三日前開始把10萬元左右的儲蓄再購入0005 $60@400和941 $62.3@500外，另最近新購入00066 $53.9@500和9988 $176@100 作長線投資組合。
以下有幾個問題想請教，希望老師能抽空回覆：
-
跟據我現時的投資組合及資金狀況，我定期購入一手(每年)，還是選擇月供好d？
-
若要達成我的目標，除了需要增加我的儲蓄外，以我現時的投資組合會否太保守？
-
另外，我現時只持有一手9988, 以我現時的資金狀況，我應該襯短期熱潮升浪離場套現後再投資現時組合内的其他股票/其他低成本股票；還是等往後儲夠錢，再購入多一手先，再放一手留一手，成為組合内的潛力股？
-
最後，最近留意緊0215，入場費低，又有穩定5%以上的派息，我應否小注(2-3手)購入成為我組合内的潛力股(因有機會派特別息)？
感謝老師賜教！
龔成老師︰
-
1 年期太長了，我會建議你用月供比較好。
-
你組合中的2隻股票，匯豐(0005)和中移動(941)都無乜增長力，唔係咁適合你。
你可以考慮以平穏增長股︰盈富(2800)、金沙（1928）、恆基（0012）、中銀（2388）、煤氣(0003)、港交所(388)、長建(1038)、粵海(0270)、領展(823)、深高速（0548）或潛力股︰比亞迪(1211)，中生(1177)或福壽園(1448)去取代這2隻月供股票。
- 你有少少停留在「賺差價」概念，你要記住投資增值重點是"長線持有優質資產"，短炒我以往見過好多人做，但都蝕錢收場。
阿里巴巴(9988)這股有潛力和質素，但這股會較波動。如果你想將佢加入組合，要以月供形式進行﹐之後長線持有即可。
- 你要小心一點，"入場費低"唔等同一隻股票"平"。買入與否應該是審視股票質素和長線前景，未來是否有增長潛力。
和記電訊香港（0215）因為派特別股息，所以股價推高左，現時翻到較合理水平。你要明白特別股息並不保證下一年會一樣派送，如果你單以這個為買入原因，就會造成風險。
此股預佢之後只是平穩型，增長力不強，所以唔係咁適合你。
Q14014：
Sir,中生1177，政策問題，近期回左唔少，雖然知道是放長遠去看，但真的有點緊張！ 其他一直以前很穩的收息股也是
龔成老師︰
近期環境經濟不景，加上中美貿易戰等因素，都令不少股票下挫。
但我地一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。
其實中生(1177)近期出左d資料，指藥物的中標價都跌左，這的確會令醫藥企業的估值下跌，因為會影響企業的賺錢能力。
不過長遠計，市場會自然出現平衡，行業去翻合理的賺錢水平，長遠甚至對大型醫藥企業有利，因為中小型企業有機會生存唔到。
不過，行業將會進入較弱的時期，中短期股價相信仍會較弱，但長遠而然，仍是正面的。現價合理，如投資一定要分注，因為股價仍會十分波動，同可能會弱一段時期，要較長線投資。
其實，行業較弱的情況在早前已開始出現，因為中央出左d藥品降價的政策，「以藥品規格採購試點進行，據透露本次帶量採購的具體操作方法，是按藥品通用名進行遴選，企業必須要保證有足夠的生產能力，大於等於3家的為充分競爭，價低者得」所以，預左對行業有影響。
不過，中生製這類咁大的企業，財力較強，就算市場出現中短期的亂局，只會淘汰左一d無質素無實力的企業，長遠對佢影響有限。但賺錢能力減少，企業無可避免去扣少少分，但都有質素的。這股過往處略貴水平，近期回到合理區了。
Q14015：
龔sir, 我想問下1775有冇投資價值
龔成老師︰
精英匯集團（1775）主要於香港從事私立中學輔助教育服務及經營私立中學日校，亦提供配套教育服務及產品。
精英匯集團旗下多個子品牌都在高速成長中，當中以"遵理"最為人所認識。服務對象由三歲至成人都有，主攻高端消費教育市場。
在精英制的香港社會，這類型高端教育機構，有發展潛力。加上自身品牌有很高知名度，會是一個優勢。
業務上，的確有吸引力的。不過上市年期不足2年，市值也很少。你有留意我fb，我一向都新股半新股都無興趣，因為真實面要慢慢先見到。你要預期佢股價比較波動，估值困難，只建議小注，同時你要明白當中的風險。
Q14016：
龔成 ，請問我現在已經52歳，正生活在死胡同中 我.想請問我可以怎樣做？
我現在有80萬現金,每月薪金$56000，我有三份基金,兩份年金,每個月剩下大約一萬元可儲存,
我先生係月光族, 我想做月供股票,請問有沒有好的建議 麻煩你
龔成老師︰
其實你情況又未算最差，因為你跟一般月光族和走進死胡同的人不同，因為你都會做一些基金和年金，為自已財富進行增值，而非全部收入消耗在消費品和享樂中。
我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。
你年紀比較接近退休方向，所以策略上要保守一點。你月供預算可以分成2份，一半供"收息股"，另一半去供"平穏增長股"。
以下係一些優質的股票給你選擇︰ 平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）
至於80萬現金，由於現時大市只在合理區，你資金可以先用分注形式投入40萬（比例都係收息和平穏增長類各佔一半）。餘下40萬待大市出現一定程度的下跌，才大力度掃貨，這樣安排會對你較好。
Q14017：
老師你好，我33歲，月入28000,之前都無乜儲開錢， 現金大概有5,6萬， 大半年前開始月供 $5000 去2800, 如果下個月想供$8000, 組合如下 o 唔ok?
$3000 2800 $3000 0002 $2000 0066
謝謝老師
龔成老師︰
首先，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。你選擇盈富（2800）和港鐵（0066）都適合你，但中電（0002）只是收息股類，增長力欠奉，故此股就唔係咁合適。
你可以選擇投資在平穏增長股︰銀娛（0027）、恆基（0012）、中銀（2388）、煤氣（0003）、港交所（388）、長建（1038）或潛力股︰比亞迪（1211），中生（1177）或福壽園（1448）去代替中電。
至於餘下的6萬現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
Q14018：
龔成老師，你好：
本人25歲，月入25000，每月可以儲10000，預計每年人工升幅係10%左右，儲蓄亦可以有10%升幅。 我計過5 年本金可累積90萬左右，我的理財目標是30歲有250萬。
現時未持有任何股票，手上約有10萬元儲蓄，準備在恆指2萬4點分注入貨。
請問可以點分佈資金月供股票，幾多成係增長型股票（例如係1177,384 ），幾多成係收息型股票（例如係 公用股（0001 , 0002,0003）,房託股）去達到理財目標？
另外，想問下理財目標是否合理（太進取/保守）？定係要追求被動收入（股息）多於帳面資產目標？
那個方法會快D達到財務自由？ 有咩計算方法去尋找一些倍升股？
多謝老師嘅解答。
龔成老師︰
以恆指過往平均年回報10%計，你月供$10000再按年加大10%供款，5年後約可增值至88萬，當然要視乎實際情況。
如果你要做到5年後有250萬，你供款要加大至每月約$28000。當然你可以加大潛力股投資，但這會令你投資組合極為波動，風險不成比例地高，我唔建議咁做。我地投資應該著力於在合理風險下，爭取最大回報。
其實，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你年紀計，應以增值為主。現在你每月儲到的錢，可以5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰
盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）等。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
而倍升股計算方法，我在課堂中也要花好幾小時教授，所以好難係度用三言兩語解釋比你聽。如果你想深入了解，我建議你參加我的課程。
課程中會教授選股3步曲，你會見第1步的程式選股，是只用一些簡單的財務指標，用程式已可快速找到表面的優質股。到第2步，才較深入去找股票，到第3步，才會好仔細去分析，我相信這3步曲，正是你需要的。
Q14019：
你好，龔成老師，現時有閱讀你的書本及追蹤你的資訊一年
本人25歲，現有資金是20萬，但冇任何股票，暫時都冇經驗負擔 。從你的書中得知現金是會不停貶值 而我想由盈富基金開始著手
你認為買幾多手好？還是分散投資？
龔成老師︰
盈富（2800），這是包括50間質素不錯上市公司股票的組合，已做到分散投資的效果。加上你是新手，未有選股力，盈富會係一個很好的選擇。
由於現時大市只在合理區，你可以將20萬分成2份。其中10萬以分注形式（如每月1號就不理價格，直接買入1手。）去儲貨，而另外10萬等你有更多經驗和知識才動用會較好。
同時間，你要去多讀投資相關書本、年報，新聞和課程。本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q14020：
龔成老師你好，本人快到退休年齡，現無穩定收入 多年來持有數隻股票，當中有賺有蝕，部分蝕錢了又唔敢放，變相有啲愈蝕愈多的情況，故特此來信，希望老師幫手睇睇再作決定。
想留優質股，放棄劣質股換錢再投資優質的收息股，資料如下，謝謝
#5 滙豐 #6 電能 #323 馬鞍山鋼鐵 #388 港交所 #656 復星 #700 騰訊 #857 中石油 #939 建設銀行 #998 中信銀行 #1088 神華 #1171 兗州煤 #1398 工商銀行 #2007 碧桂園 #2318 中國平安 #2800 盈富基金 #2899 紫金 #3328 交通銀行 #3988 中國銀行 #3393 洛陽 #6098 碧桂園服務
如果需要更詳盡的資料，請通知，謝謝老師
龔成老師︰
首先，當出現股價下跌時，我地一定要了解股價下跌的原因。基本上，股價中短期上落好正常，但如果上落太大，就要了解翻當中的事情，有無一些影響企業核心的因素。
睇翻你個組合，其實當中股票唔算差，蝕錢很大可能是你買入時機唔係咁好。係你組合當中，你要留意翻部份股票會比較波動或者質素較弱（包括323、656、857、1171、3993），但不至於無得守。只要唔係佔比太大，你可以持有。
但我發現你有個比較大問題，就是很集中在銀行股和資源股類別。雖然佢地有質素，但過份集中個別行業會造成風險，當該行業出現問題，會對你組合不利。在未來投資配置時，要多加注意。
由於你將近退休之年，投資策略要由增值轉為創造平穏現金流為主。你可以慢慢將你組合中不合適的股票，換碼至優質收息股如港燈（2638）、香港電訊（6823）、置富（0778）、陽光（0435）。
而你現持有的電能（0006）、滙豐（0005）、建行（939）、中信銀行（998）、工行（1398）、交行（3328）、中行（3988）己是收息類，故已可長線持有。
Q14021：
你好龔成老師，經過幾年的儲蓄我今月終於儲到100萬了！
幾年前開始看你的著作，學習月供股票，之後立下目標要將最少7成的人工儲下來，到今日達成了一個小小的目標，非常高興，也要多謝老師。
想問下一步應該點做？
龔成老師：
先恭喜你！我記得我累積到第一個$100萬時，有種激動的感覺，因為這是我多年努力的目標，當我有第一個時，我發現，第2個、第3個好快就出現，因為開始進入了「錢搵錢」的狀態，比起人搵錢的速度快好多！
下一步，要做好2樣野。
第一，當然是好好運用這些本金，一定要投資在資產項，物業、優質股，都是典型的資產，而我地所做的，就是財富配置，投資在有增長力的項目，令財富不斷增長。
第二，學好投資，選股，評估企業質素，分析企業價值的能力。因為當進入錢搵錢時，你的「投資回報」會對財富有好大影響，該影響甚至大於你「儲蓄的部分，因此，一定要學好投資，差1%，長遠的分別就好大！
Q14022：
老師，我去決定月供金額時要怎樣考量 若每月供幾千蚊如五千, 手續費佔1%, 而全部都散，亦都要分散股票種類，好散同埋增值比例好低咁
不知道如何處理分配 請老師指導一下 謝謝你
龔成老師︰
我地決定月供金額，其中一個因素是要睇手續費不要過高（要少於本金1%）。
當你能月供的金額偏低，而又想分散投資的話，的確會令每隻股票供很少，而導致手續費佔比偏高，影響長線增值能力。
如果有咁架情況，你可以唔分咁散，只投資2隻優質股，到你可以增大供款時，才再加新股票入組合。
另一個方法，就是月供全數投入盈富（2800），這是包括50間質素不錯上市公司股票的組合，已做到分散投資的效果。
Q14023：
龔先生你好，我同男友一直有睇開你的書，佢每本都買齊。想向妳請教未來兩年的投資方向，想兩年後儲到100萬。
我今年25歳，從事教育行業三年，儲到三十五萬，夜晚會返大學進修，學費車費佔每月最大開支，平均每月儲到9000-10000。
目前持有[email protected]股匯豐、[email protected]小米、[email protected]工商、[email protected]建行，係未認識妳之前買落打算收息，但自買入後一直有跌無升，我好認同妳的看法，股票是看資產而多於股價，所以無放到一直賺息。
目前可用資產為二十萬，想問若然想入手港鐵、中電、中國鐵塔等股價在什麼算是合理區？
還是月供股票比較好？因為我收入仍然可以抽居屋，還是留現金用作首期比較好？麻煩老師給予建議
龔成老師︰
多謝你和你男朋友一直以來的支持！
首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。
你現有的股票有質素，長線持有無問題。但以你年紀，應該以增值為主，匯豐（0005）、工商（1398）、建行（939）和中電（0002）都是收息類，無乜增長力，唔係咁適合你。
再加上，你這些股票全部集中在銀行股類，會有過度集中風險，當銀行業一出事，你就會整個組合被波及，所以你暫時唔好再加注在銀行類。
由於你打算抽居屋，那你現時三十五萬就最好以現金保存在手，最多只可做短線定期。而增值就透過你月儲的1萬去做，可以$6000去做月供，其餘$4000先儲起，用一邊月供一邊儲蓄的策略。
月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。
至於餘下的$4000現金，就等機會，當大市出現一定程度的下跌，就可以大力度掃貨。同時間，如果你中途抽到居屋，你也可以動用這儲蓄部份，去支援你首期開支。
Q14024：
最近見維他奶同港鐵從高位回落,現在算不算吸纳的好時機?
以及媒氣也是
龔成老師︰
最近3隻股票都明顯有所調整，但由於過往市場對3隻股票期望都好高，令到佢地升到一個"貴"的位置，現在只是回調至較合理水平。
維他奶（0345）︰這股前景正面，但這股比當時推介時，已上升了倍幾。現價依然處於貴的水平，你可以再等佢回落多15%，讓股價重回合理區，你才開始慢慢分注入貨，咁會比較好。
港鐵（0066）︰前股長遠前景不錯，現價只是合理區頂部，可以月供或分注。
煤氣（0003）︰此股有質素，雖然最近業績唔算理想，但長遠價值還在，現價只是合理區中至頂部，可以月供或分注。
Q14025：
Hello 我想問少少意見 我而家廿三歲
本來月供長基同領展，各1000元 一月會供長基2000，領展1000，恆基2000，銀娛1000 我想再供多一千元 請問供66定1211好？
我係進取型投資者。 謝謝。
龔成老師︰
你現在很年輕，加上你本身想進取，配置上應該以增長為主，所以我會建議你選擇潛力股比亞迪（1211）。
如果可以的話，我建議你再加大一點比亞迪（1211）比重至$2000。你可以額外加大月供供款，或領展1000/恆基2000中抽$1000出來，因為2者是同類地產股。
另外，由於你隻股票供款不多，要留意翻手續費如果去到本金的1%，就開始高，會對你長遠的回報有一定的影響。
Q14026：
老師，你先前提及我可加入陽光（0435）或置富（0778）作為收息組合的股票；我和家父則認為冠君產業信託（2778）較好。
因為冠君持有一流甲級商用物業，業務穩定，不易受社會因素而影響業務。請問你對我們的見解有什麼看法？thanks!
龔成老師︰
冠君產業（2778）有質素，是不錯的房託，不過現時息率就唔算好吸引，如買入不要太大注，分注慢慢入較好。
佢擁有及投資於提供租金收入的寫字樓及零售物業，主要投資位於甲級商用物業，房託定明要將可分派收入的9成以上作派息。
現時擁有花園道三號（前稱花旗銀行廣場），以及朗豪坊兩幢地標級物業，分別座落於中環區及旺角，總樓面面積達293萬平方呎。
佢所持有的兩個物業都有相當的質素，但花園道三號過往租金有不穩情況，至於朗豪坊，過往雖然呎租不斷上升，但在香港零售市道比過往較弱，再加上近期香港社會不穏等情況下，往後上升幅度將會受到影響。
花園道三號有行業集中風險，以及香港商業區轉移的問題，物業地點優越，這在往後都不會動搖，但在企業節省成本，以及香港其他商業區發展前提下，租金升幅將出現跑輸大市情況。本身雖然優質，但過往租金都太高，市場壓力令其調整，到市場適應後，長遠才會趨向平穩。
綜合而言，這房託有少少風險，當香港零售市道不景，又或金融業受衝擊，都對其收入有影響，最終令股息有所波動，但從長遠及兩物業亙補的角度而言，當中的波動只會在中短期出現，而且不算大。
反之，到時股價的波動會更大，因為投資市場是一個敏感的地方，任何與企業有關連的因素，就算不會造成核心影響，也會令股價出現明顯的波動。
所以，這股可投資，但現時值博率未到最吸引，分注小注可以。
Q14027：
龔成老師你好，小弟月入四萬，未婚妻月入二萬五 未來有一筆遺產繼承，約二百萬，但要先償還先父的債務60萬，分了60期，每月約萬一元
現有積蓄50萬，打算買樓自住，老師你認為應該借足九成（預算450-550萬樓），餘下錢用作額外投資，還是應該借八成，還款年期短些和交少D息，另外儲錢投資較好？
龔成老師︰
我會建議你借足9成（當然你要計計按保的成本），但不要買金額太大的樓，因為現時按揭借貸利率不高。你把節省下來的錢投資在其他優質資產，增值效果會更理想。
你可以將餘下來的資金，投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）。
以恆指過往平均年回報計約10%，相較現時按揭借貸利率高，因此你可以從中賺取息差優勢。但要留意，現時股市只在合理區，入市必需要分注。
另外，將來按揭借貸利率有機會提高，會令你息差優勢減弱，你要明白有此風險。
Q14028：
龔成，你好。我27歲，反緊pt 月入1萬左右 （希望之後環境好d搵到長工）又淨緊銀行卡數60萬到，好想係2022前還清，之後再慢慢步向財務自由
有冇可能靠月供股票而達到目的呢？
龔成老師︰
月供這方法，絕對可以以幫你達至財務自由，只要你選對合適的股票和給時間佢增值，就可以做到。
但你有個較大問題，就是那"銀行卡數60萬"。這種貸款利息沉重，在開始你財務計劃前，你首先要想辦法清理這筆債務。就算清不了，也要看看能不能轉到息率較低的貸款計劃。
由現在到2022年尚有多年時間，只要你加大收入同時，不要再增加新卡數，相信你可以處理好這筆數。在此期間，你雖然沒錢投資，但你也不要因此停下來。你要努力看書、看年報、上投資相關課程增值自已，為將來投資做好準備。
Q14029：
老師你好! 幾個月前買了你的80後百萬富翁, 開始理解到儲蓄和及早投資的重要性, 本人亦都開始減少支出及月供股票
背景資料: 33歲, 月入32K 資產: 現金500K/股票70K/儲蓄保險 100K 支出: 保險年供20K
現時月供 港鐵 3000, 盈富 2000, 領展 3000, 恆基 3000, 另月儲 6000, 如果想1-2年後跟另一半付首期上車
請問現時月供組合有沒有問題? 有更好的建議嗎? 謝謝老師!
龔成老師︰
你現時月供的股票都有質素，以你年紀應以增值為主，這些股票都有增長力，都適合你。
但你要留意翻，由於2年只是一個短期時間，好難講到時的投資回報有多少，因為投資股票其實就是投資企業，而企業成長需要時間。
就算是優質股，中短期都會有股價上落，要長期先可以確保股價向上。
如果你必需2年內動用這筆月供資金作為首期一部份，我建議你投資策略你保守些。將以上組合更改為收息股如港燈（2638）、香港電訊（6823）、工行（1398）、匯豐（0005）、置富（0778）、陽光（0435）或作定期存款，這樣會較穏當。
Q14030：
阿sir 你好！本人40歲， 本人嘅投資組合如下…… 股票No//買入股數//平均買入價
0002 500 81 0003 5000 14.94 - 15.9 0012 5000 35.75 - 37.45 0066 12000 44.4 - 46 0823 12000 59.1 - 70.2 1038 1500 51.3 - 57.4 1211 500 37.5 2007 22000 11.6 - 12.34 2388 1500 25.8 - 34.2 2638 28500 7.11 - 7.41 2800 5500 26.1 - 30.95 1928 800 34.45 9988 100 176
我想問我選了以上這13隻股票作長線投資ok嗎? 資金比例合適嗎?需要改變比例嗎? 本人還有13萬現金及每月可儲蓄萬五，想再買入388，700 ， 1448 ，ok嗎？
本人並沒有月供股票的是一手手買入的，希望你可以解答我的問題！謝謝！我有買你所著作的書籍看的，增加了我不少投資知識！
龔成老師：
我地繼續持有一隻股票與否，最重要睇佢的質素、前景，買入價不是重點。
上述的持股，基本上都是有質素的，就算部分的買入價略貴，都不用擔心，都是有持有的價值。
但你的組合，開始有少少散，這會令管理略有困難，因為我地持有的股票，都應該保持檢視企業的業務情況。
你可以加大投資盈富（2800），其他股，唔太建議加住。另外，碧桂園（2007）雖然有質素，但負債太高，有風險，但你現時的股數持有仍可以，但就不要再增持。
至於另外的3隻想入的股，都是有質素的，但你再加入，會令你的組合隻數更多，因此，除非這些股再進一步下跌，否則，不用急去入。
Q14031：
老師，我持有美股蘋果 佔總資產極少 要定永遠持有
買過170之後 已經唔識用老師教我的方法計幾多錢係合理價 因為pe年年新高
每股盈利亦然 計完幾乎永遠都跌不到計算的價格 非常同意老師評論蘋果的質素
比領展煤氣質素更高 本人已經連續用IPhone 8年 質素必然比Android 好
龔成老師：
一間企業質素好，市場自然會對佢有較高的評價，因此，經常處貴或略貴水平，往往都是常見的。
首先，你現時持股可以永遠持有。
至於面對這類股，如果想增持，其實可以考慮小注小注去入，我地在貴的水平，一定唔會大手入。但如果永遠等，又怕永遠等唔到，有時都要想想點樣平衡風險與回報。
所以，慢慢分注入，都是方法，只要仍是小注就得，等佢回到合理區先正式入。
Q14032：
你好，我覺得美團係潛力股，因為他投資酒店，餐飲業，最核心業務糸外賣。
平均消費26.5元，不過好多業務還未賺，管理層，話大量投資新業務，還有投資魔霸單車業務，因為他第三季業績扭虧為盈，如果他第四季有增長賺話。
股價有無機會爆升，市場一直預期他有賺錢力能，不過這股都好大，如果值博率美團投資10萬多，張來好大機會倍升嗎！
係大陸內地700、9988科龬巨頭，現在如果係餐飲業者巨頭，美團有機會第一，買入價自不過係心理作用，如果一直跌可加注嗎，本人想博這股。
龔成老師：
美團點評（3690）佢業務巨大，同時增長快。不過，佢仍是有危有機的股票。業務較新興，近期現金流有改善，所以令市場好有期望，因此股價都明顯上升左。
我相信佢潛力的確大，往後會好賺錢，但最大的問題是估值，就算一間企業超好賺，我地都唔能夠比佢無止境的價，如果買入的價位，已經反映了佢多年預期增長的盈利，到時佢的增長「只是如此」時，股價反而會多年都無得得。
所以，這類股是較難投資的，因為就算是專業的分析員，都無得用計出一個絕對的估值，大家都只是憑前景估估下。
因此，有風險，有潛力，是這股的結論，你自己衡量投資多少，始終這類企業不是不可投資，在要控制注碼，不能大注。
Q14033：
你好,如果我手上有20萬,請問該如何投資,另外每月可儲2萬元,謝謝你的提議
龔成老師：
要睇翻你的年齡、風險承受程度。
對大部分來說，投資平穩增值股是適合的，因此，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
以現時的大市平貴情況，你可以將其中$8萬投資上述股（你可以從中選股），分注就得。
至於每月儲到的$2萬，你可以將其中$1萬，做月供股票，$5000盈富（2800），餘下再供其他心水股，總之長線投資就得。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
Q14034：
老師以下股票坐艇了，想請教應繼續持有等收息，還是止蝕（感覺距離家鄉很遠）/換馬。
1055 南方航空 10000股，平均價$7.198 659 新創建 4000股，平均價$15.21 3328 交通銀行 8000股，平均價$6.99 939 建行，平均價$8.00 1800 中交建，平均價$9.7 737 灣區發展 5000股，平均價$4.12
除了以上還有超多的一手兩手股票（包括2007 1177 3988等），我應該把他們都放了，集中5至8隻股票嗎？
謝謝老師
龔成老師：
我地繼續持有一隻股票與否，最重要是睇企業的質素、前景，買入價只是心理因素。
你上述持股，基本上都有質素，唔需要擔心買入價的問題。
中國南方航空股份（1055）要上翻去，不是短期事，其實航空業一向都較為波動，同時本質唔算太好賺，你可以自行決定是否換。
新創建集團（0659）可以守。
交通銀行（3328）無問題。
建行（0939）、灣區發展 （0737）只是收息股，唔好對股價有太大期望，集中收息就得。
中國交通建設（1800）負債高，但股價都反映了相關風險，現價算是合理，要上翻去不易，增長力不算強，你等有較大的反彈後可考慮換。
至於你其他股，其實都是要「質素」如果有質素，就可以留，就你最後講的3隻股，都有質素的。不過，見你好多內銀，你要注意集中風險的問題。
Q14035：
成哥你好，我好多年前因為朋友介紹買入404(新昌集團），買入後就開始停牌，近期睇佢話要清盤，同埋佢申請覆核取消上市。
我未遇過呢啲情況，如果呢間公司清盤我嘅股票會唔會化為烏有？
龔成老師：
新昌集團控股（0404）我無研究過，只知佢停左牌。
一間公司如果要除牌，即是無得上市，但公司仍在，只是有上市公司變成非上市公司。
但如果去到清盤，咁即係好大獲，公司會結束，跟翻法律程序，賣資產，先還比債權人，最後有剩先比翻股東，但一般都是無，又或只是極少價值。即是股票接近無價值。
我未知佢係咪玩到清盤，現時，你基本上無特別野做到，只要了解佢的消息，以了解佢最新情況。
Q14036：
龔sir，市盈增長率=P/E 除以 每股盈利增長率，如果佢每股盈利增長率係負數，咁應該咁計法？
龔成老師：
市盈增長率，只適合高增長類的股票，如果該股無增長，當然不適用。
而我地在計算市盈增長率時，一般會考慮長期的增長率，你可以用多年的數據，計算複息平均增長，推算出有代表性的增長率。
Q14037：
龔sir，請教1830必瘦站點睇？我由2.8一路有留意，都唔敢入，近期升幅有返咁上下，我睇到佢未來有擴充以及有生意前景，不過市值就細隻啲
龔成老師：
必瘦站（1830）有質素的，佢生意穩定，同時有平穩增長的情況，電佢盈利都不錯，保持增長。
比較特別的是，佢的派息比率高達100%，每年都是。這反映兩點。
第一，佢有自我成長的能力，不用投資太多的資金，都能令企業成長，這是佢優質的地方。第二，管理層重派息多過企業增值，因為管理層未無太大的發展意慾，但佢又不是無發展。因此，你可以理解這是有平穩增長類的股。
我相信這是不錯的收息股，現時10%的股息，亦很吸引。但市場是公平的，佢股價不太高，先會有10%的股息，而市場點解比佢的股價唔會太高？
這是由於佢的業務，點都會有不確定性，就算過往派息不錯，也未知之後的業務、盈利、派息，你要明白這點。在注碼上，不要太過訓身。
Q14038：
早晨老師！想問下退休基金由2011年5月开始供到現在，選擇均衡基金，一路無變，請問現在需要轉組合嗎？ 市場咁動盪 ，而且 冇乜增長！麻煩晒
同埋老師我留意你 你話大市未到便宜區！ 可唔可以等到便宜區先去月供！會好啲
龔成老師：
退休基金是一些好長線的分配，你只要按你的年齡階段，慢慢變，即是年輕時進取，中年平穩，年長保守，咁樣就得。
你唔需要因為中短期大市問題，就改變策略。如果你的年齡適合均衡基金，過往表現（長期）又唔算好差，你只需要長期去供就得。
這刻大市處合理區，的確本算平，但我地無人知會唔會跌落去，因此，你唔好「預期」大市走勢，保持月供就得。
Q14039：
老師，我近排連閱讀既心情都冇 連去做gym 都提唔起勁 如何調節心情都係學問
龔成老師：
你要找出令你無動力的源頭，然後減少接觸這範疇，同時找一些對你來說會開心的野（每個人唔同，例如玩、聽歌等）
我自己每次跑完步，都會好有動力，所以就算點唔開心，都會逼自己去跑，跑完就會好D。
你完成上面後，之後就睇正書同做運動，這是有用的，是建立心情良性循環重要的一步。
Q14040：
老師，我想plan一個月供股票既組合，準備每月供$12000
想請你建議揀邊幾隻及如何分配更合適 2800,1177,1211, 0066, 0003 ,0386
另外0003每年都有10股送1股既派息，咁如果有足夠現金，係咪應該係佢派息前10手買入會更化算 求指點迷津
龔成老師：
你可以將每月$12000： 盈富（2800）$4500，其餘5隻，每隻供$1500，長期月供就得，這是較為平衡的。
就算佢晒上述的都無問題，如果想供少一隻，就放棄中石化（0386）。
至於煤氣（0003），其實前後是一樣的，左手數與右手數，唔好比這個因素影響。派股後股價跌1成，前後是無分別的。
Q14041：
老師，我是一個18歲的女生，18歲正值人生的黃金時間，也該是時候為自己打算打算前路，學投資是必須必要的事，我明白，但若連本金也沒有，憑什麼說投資，我實在有太多想不通的地方，才唯有打擾你請教一下。
在我看來，你算是相當成功因你已達至財務自由的情況，18歲的我，就如失去方向的小船，根本不知何去做從。
我想quit u retake dse ,我已加讀緊 XXXX,當初楝係因為分唔夠讀專科，而呢科又i近medical field。
但我最緊張係呢科究竟有無前途同將來可以做咩，就係因為覺得出路麻麻，人工又可能得萬幾，如果我retake dae 考翻好小小就可以讀nursing or social work
當然retake 係咪一定升分咁又當然唔係，但我無升分都應該入得翻city讀社工(成功率一半半)，同埋我quit u有一個因素都係唔想自己後悔。
因為人生得一次，但同時因為我本身係一個Active 既人，所以我有好多唔同geh活動係身，我仲未甩到所以我仲未focus 到落dse。
琴日，我啲中學老師就話我咁遲先開始一定趕唔切話我唔會升到分。
其實我retake 都係因為自己geh 執着同怕將來搵唔到工要揸兜，然後我成晚個心都好唔舒服，屈住屈住咁但又喊唔出。
我都唔知我應該點好，要投資首先都要有本金但根本無本金係手或者人地（我同屆啲同學揾3萬個月）咁我點追得到佢地既升福。
咁我咪整定一世都俾佢地搵得小同差過佢地？老師，求你指點一下我
龔成老師：
我地學習理財、投資，當然重要，但這是長期戰，你可以保持學習這些知識，要將財富滾大，你要有3大元素：本金、時間、回報。本金是重要的，但如何得到長期的本金更重要，所以，你這刻唔好太集中投資方面先，先著重如何令你做適合的工作，做到這點，長期的本金自然能解決。
這刻，你最重要是分析你當刻的前路問題。
我地希望得到本金，同時希望在自己理想的環境得到，所以，如果長期做不喜歡的工作，就並不是好事。
我建議你，想一個問題，你想10年後，自己做甚麼工作（你先唔好理投資方面），先想想自己如何覺得開心，你心底最想做咩？
我講我自己，我現時最大的滿足感，已經不是單單為錢，而是身為一做作者、導師，能夠幫到人，我每日都好開心，我唔會用「捱」去形容我的工作，我唔會話「好辛苦，快D到星期六」，而是「我一至五都好開心」。
你要想想，5年後、10年後，你從事那類工作，如果找到這方向，就要盡力去行。
你想好這一步先，至於先方面，其實可以慢慢改變，因為有唔少人，讀的科同做那一行，未必一樣，你唔好因為咁樣限制左你自己。
你將來仍有好多好多變數。
你細心問自己，自己的理想？想過的生活？想做的職業？想為社會帶來甚麼貢獻？
你只要清楚上面方向，你就知道自己下一步應點做？停一停，花小小時間想清楚。
Q14042：
老師，我有兩個年幼的小孩，想買樓，買樓其實主要是希望為他們準備。
香港人最搞唔掂的，就是國籍和住屋。我想為他們每人添置一層樓，就算他們他日不住，自己也會比較安心。
另外，因為現在居住的屋苑要進行大維修，所以也需要短暫搬出去。
所以現在來說，買樓自住的需要是比較短暫。
你認為，這樣買樓，是投資還是實際需要？我應該怎樣去衡量？
龔成老師：
如果你現在居住的屋苑要進行大維修，這當然是短期問題，你唔可以將這因素，列入你考慮買樓與否的因素之一。
你現在短租其他地方都得。
你要分析翻一些長期的因素、核心因素，例如是否想幫每個小孩準備一層樓，自己是否能夠應付，是否有這需要。
買樓，最重要不是分析樓價走勢，而是睇自己是否「供得起」，你一定要計好數，就算你買入後，首先放租，等日後小孩有自己物業，你都要計好資金情況，租金情況等。
Q14043：
成哥早呀。我想問下有關941 中國移動~ 我一直有睇你D 文, 不過最近中國移動D 新聞令我有點卻步 受到中國打壓同其他電訊公司既競爭
係咪巳經無上升空間啦, 因爲我75 入 買左8 手 睇住佢跌.. D 新聞同數據又好負面, 所以想問下你意見, 謝謝哦~
龔成老師：
中移動（0941）不是質素的，但質素比過往年代減弱，不過現時仍可算是有質素。因為政府唔想行業的費用太高，因此行「提速降價」政策，會影響佢長遠的賺錢能力。
其實佢之前出的中期業績，生意無增長，同時盈利有下跌，市場都視為不利訊號。
你預這股是收息，以及平穩增長的股，持有無問題，但就預增長力不強，暫時可持有先。
其實，5G會慢慢對佢有利好，但就唔好預有太大驚喜，因為政策唔想相關費用太貴，所以佢賺到的錢不會太多。
不過，以佢的情況，唔值得加注，同埋持有太多，對組合的增長力都會有影響。
Q14044：
你好! 我從未有股票或外匯投資經驗。想在今年開始，用3年時間儲點錢，打算在2020年開始，每月儲20000元。請問有什麼建議，謝謝你
龔成老師：
你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。
第二，了解銀行及證券行，去開一個證券戶口，並準備做月供股票。
其實兩者都可以，銀行就較方便，但手續費就較貴，證券行收費就較平。你可以先了解下不同的收費。
第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。
以你的情況，我建議你每月供$10000盈富，餘下就儲現金。
其實月供股票的原理如同儲錢，不過就不是儲現金，而是儲股票。計劃要長期進行。
另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。
當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。
Q14045：
龔成老師你好！我27歲，月入$22k，流動現金有12萬(再加3000歐羅)，冇家庭負擔，個人總資產大概40萬(股票佔62%，現金連外匯佔38%)。
每個月並冇特定儲蓄目標，大概5年前第一次買股票，但從來只係買過一隻0005匯豐，完全冇投資策略，有閒錢同覺得匯豐夠低價就買下咁，近年來開始留意投資，試過短炒一陣，但而家想學番啱同sustainable嘅投資概念。
- 現持有股票如下：
0005匯豐 3200股 平均價 $60.45 788鐵塔 8000股 平均價 $1.89 19太古A 500股 平均價 $74.5
請問以上有冇應該要賣或調整嘅股票？要賣嘅話，應該等到咩價位先賣好？
- 想喺3年內儲到人生嘅第一個100萬，應該點做(唔傾向考慮月供股票，個人傾向一手買入)？我應該再買入咩股票先有一個全面嘅投資組合？
之前見你有推介過潛力股1211比亞迪，而家市價大概$37.3，係唔係買入嘅好時機？
- 之前曾經用閒錢買股票賺差價(因為用富途牛牛app買賣手續費好低)，曾經$87.3買1000股2318平保($90賣)，$76.75買600股1299友邦($79.75賣)。
喺個零月內都少少地賺到$3000，請問呢種買賣同長期投資同步進行，會唔會事半功倍？定係你唔推薦呢種手法？
- 現金流同股票嘅比例應該各佔幾多%？ 唔該哂老師專登撥時間出黎解答我嘅問題，無言感激！
龔成老師：
1）你持有的股票不是無質素。但匯豐（0005）增長力不強，只是收息股，未必適合你，你唔需要持有太多，可以轉部分去其他股。
太古A（0019）雖然有質素，但只是平穩增長型，增長力不強。
2）你要有一套策略，並不是只分析投資比亞迪（1211）與否，你先要從基本功開始，唔好心急。
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
3）短炒根本不會成功，我過往做了10年銀行及證券行，見到好多人都是短炒，的確，有時會賺，但長期總計，絕大部分都是蝕錢的，所以，唔好再做。
4）要睇大市的平貴，以及你自己的需要，以現時的情況，你預3-5成現金是可以的。
Q14046：
Hi，我想問其實牛熊證係咪唔應該掂？
龔成老師：
牛熊證係衍生工具，專比散戶短炒，長期計都無法幫你賺錢的，因此，我不建議再進行這類投資。
我做銀行、證券行10年，見盡散戶的投資成績，短炒者都是輸錢多，贏錢的是一群長線投資的人。
其實，我自己20年前經歷過，當時覺得好易贏，但最後都係輸多贏少，所以唔再玩。
當然，你可能會賺錢，但牛熊證的潛在成本好高，即是你「一開始已站於不利位」，要長期賺錢，好難，好難。
Q14047：
龔老師你好，我25歲 早一兩年剛出黎做野不擅理財，故現在只有五六萬現金係銀行，月入兩萬，每月供四千蚊保險。
另有一萬蚊固定洗費，上個月睇左你著作，開始月供股票四千蚊，買左領展，電能，港鐵以及載通，想請教依個組合洽唔洽當，定係應該轉買盈富？老師可唔可以指點一下？
同埋月供股票 由上個月剛剛開始，但所買既都係跌左，雖然跌幅唔多，但心中始終唔好受
有少少壓力會每日去望去升定跌，同埋月供股票既目的應該係長遠持有？而唔需要考慮邊個價位賣出？ 謝謝
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。
你利用月供股票去累積財富，可以。
上述都是有質素的股，不過，電能（0006）、載通（0062）的增長力不強，只是收息股，未必最適合你，又或者你供一段時間後，轉供其他股。
你可以保持月供$4000月供，至於現金，就繼續作備用及等投資機會。
記住，月供股票是長期進行，完全唔需要擔心中短期的股價下跌，只要長期不斷儲貨就得。月供本身已經有分散風險的能力，減少左一次過高位買入的風險，更由於我地不斷進行月供，因此我地反而希望股價跌！
我地買股票，就是買企業，我地只要分析企業的質素，在質素不變的前提下，我地希望股價不斷跌（就算我地有貨），因為咁樣可以令我地以更平的價格儲到更多貨。
當股價中短期跌，我地可以入到更多貨，只要企業優質，長遠會慢慢升翻，我地的獲利會更多。
甚至，我地會希望月供股票時，中短期股價下跌（只要企業質素無變就得），然後股價長期向上，就會有最大的獲利。
Q14048：
老師，香港的局勢，係咪會影響大市，唔好入市住？
龔成老師：
我地買股票就是買企業，香港的情況，根本唔會影響到企業發展，只會影響中短期大市表現，因此，完全不用擔心。
Q14049：
龔成老師你好，本人24歲 月入2萬 手持以下股票及現金10萬
想係30歲前儲到筆錢買樓 請問有咩投資組合推介一下
1211 比亞迪 @$40.6/500股 823 領展 @$86.4/500股 388 港交所 @225.6/200股 302 中手遊 @$3.45/8000股 1876 百威亞太 @28.7/1000股 9988 阿里巴巴 @$176/200股
另問302中手遊不斷插水 應否斬倉？
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股則小注就得。
上述不少股都是有質素，但要留意潛力股的比例會否過多。
領展（0823）、港交所（0388）、百威亞太（1876）都是有質素，長線持有無問題。
比亞迪（1211）可長線，只要控制投資注碼就得。阿里巴巴（9988）都是有潛力的股票，只是現價未算平，小注持有無問題，可長線。
至於中手游（0302），業務不確定性較高，股價波動大，佢有可能有潛力的，但就不易分析，佢可能升得勁，亦可能跌得好多，這是佢的本質，如果你要明白這風險，就持有住先，只要不過多，都不用太擔心。
另外，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
Q14050：
成哥，前幾日手快快心急，$86 入左2688 依家洗唔洗走左先
龔成老師：
新奧能源（2688）主要在中國從事投資及建設、經營及管理燃氣管道基礎設施、車船用加氣站及泛能站、銷售與分銷管道燃氣、液化天然氣及其他多品類能源、能源貿易業務，以及提供其他與能源供應相關的服務。
佢本身業務不差的，這年的生意都有一定的增長，盈利與派息都保持增長，這支持了企業價值向上，這股可以長線投資的。
企業本質無問題，只是買入價少少貴（都唔算好貴），唔需要太過擔心，這股有得守，唔好理中短期股價。只要不持貨過多就得。
Q14051：
老師，我係你舊生，領展的增長動力較以前慢 我應否調低預測市盈率? （過往是大約20-23，我已經自行扣除物業重估，調整左）
龔SIR，我正等待你的進佳班^_^
龔成老師：
領展（0823）你以股息率，以及你上述的調整物業重估的市盈率方法，都可以。
佢增長的確比過往慢，所以當我地利用數據時，都會調低少少，你的方向正確。但佢不是無增長的，年報見佢仍然話好多商場會翻身，這都是釋放價值，提升增長的方法，長遠仍正面。
進階班，努力中，目標是第二季出街。
Q14052：
龔成老師，請問405，778 投資哪一個更好？
謝謝！忠實讀者
龔成老師：
兩個都是不差的房託，都有長期收息的作用。
置富（0778）持有的，是屋苑商場，比較民生的，對經濟週期的影響較少，股息因此會比較穩定。
陽光（0435）則有一半是寫字樓，對經濟敏感度，會較置富高，因此，波動會大少少。
如果你想穩定收息，就置富，如果想潛力多少少，就陽光。
Q14053：
龔生: 你好, 我在中銀參與月供股票, 發現股息儲存到儲蓄帳戶而非股票帳戶, 即無法做到複息滾存, 該如何是好?
龔成老師：
這是正常的，股息會以現金派發比你，你要自己將股息再投資先得。由於初期月供時，你累積的股數不算多，因此，股息都不會太多。
所以，你可以先將這些股息儲起，到一定的數量後，才以一手手的模式，買入心水股。
到你過數年後，股數有一定數量，派息自然多，到時每次收到股息後，都可以立刻再投資。
Q14054：
成哥，我今年22歲，月入20,000，需要給4000家用，其餘使費，每月大概儲蓄一萬，暫時有150,000的儲蓄，未有任何投資經驗。
經朋友極力推介下，希望可以獲得投資意見，有什麼穩陣的投資心水，每月可能多幾百蚊的洗費
龔成老師：
你這個年齡，是財富增值的黃金時期，要好好把握，盡你一切的力量去儲蓄、投資、學投資知識。
你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$7000 。
你可以考慮盈富（2800）$3000。
另外再加2隻（每隻$2000）： 銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。
如果你不懂股，就集中供盈富$7000。
至於你手持的$15萬，由於你這刻未有投資經驗，我想你先做上述的月供3個月先，同時，好好在這段時間學好投資，睇書、上堂、留意經濟及企業新聞。
到3個月後，如果你有信心，就可以動用$5萬，分注投資股票。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
Q14055：
成哥，想請教有貨可唔可以長擺住788中國鐵塔平均1.74及2342京信通信1.97等番家鄉 定係咩位要止蝕？謝謝你
龔成老師：
我地繼續持有一隻股票與否，最重要是企業質素、前景，買入價只是一個心理因素。
中國鐵塔（0788）有質素的，你買入價不算貴，而這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。
佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。
考慮到佢的質素、發展能力，這股算是合理區中上部。由於這股有發展力，可長線，只要你貨不過多，持有無問題。
至於京信通信（2342），本質不過不失，但唔算好高質，增長力唔算強，但不是完全無前景，但就要耐心D。你買入價合理，有得守的，不用擔心。但就不建議持貨過多。
Q14056：
老師，現時税季有低息貸款 可否借4-5萬去投資，如果月平息0.22% 你覺得值得嗎？如值得，有咩投資可做？
龔成老師：
一定要以「實際年利率」去做比較，否則無意思。你要比較實際年利率，以及你預期得到的投資回報率，睇下有無息差，要有一定的息差，先值得借。
另外，借貸投資，不是不可，因為這都是創富的其中一種方法，但當中一定有危有機，你要明白這點。
同時，我地一般只會在「有明顯機會」的情況，在會進行借貸投資，而現時大市只在合理區，你好難保證投資後不會出現「賺息蝕價」的情況，因此這刻的值博率只算一般。
如果大市跌到24000，到時投資，「賺息蝕價」的情況相對減少左，這樣投資值博率就較明顯。
Q14057：
像工行的一手不太大的優質股還有什麼推介
龔成老師：
記住，入場費低，與平貴、優質度無關。不過我都講幾隻。
置富（0778）、港燈（2638）、灣區發展（0737），都是有質素，而入場費又不高的。
Q14058：
老師，我打算在中銀25-26元左右買入1-3手(資金有限)，另外在$26-26.5左右買入1-2手盈富。餘下的資金則再等一下再買。
現時我只持有阿里巴巴(可惜在高位買入，現時仍在蝕錢的狀態。)
我是投資新手一門，剛剛進入投資市場，希望能求教。不清楚該從那裡開始。對選擇股票方面的認知很淺薄，不知如何估計該股票的潛力(或將來的價值)。 再次感謝老師
龔成老師：
阿里巴巴（9988）有質素的，不過上市至今都仍有少少貴，但如果你持貨不多，無問題的，長線持有就得，唔好理會中短期股價。
至於盈富（2800）、中銀香港（2388），都是有質素的股票，你都可以投資，你設定的買入價，都是合理價，照計劃進行就得。
簡單來講，現時大市大致處合理區，你可以部分資金入市，部分則留現金。而你最重要學習的，就是選股、分析企業質素、評估企業價值平貴的能力，你從這方向學習，睇書及上堂都可以。
你的知識，與你的投資回報，成正比的。
Q14059：
老師。睇返自己原來持有四環醫藥460。於3.32買了200000股。而家0.85。 蝕了40幾萬。 我應該如何做。 因為之前本身有1百萬股。原來於2.2放左80萬股。 仲有20萬股係度。 我點可以返身。 謝謝
龔成老師：
我地繼續持有一隻股票與否，最重要是睇企業的質素、前景，買入價只是心理因素。
四環醫藥（0460），如果你睇翻佢2015年、2016年的核數師意見，就會見到「保留意見」這字眼，反映核數貊對佢盤數有保留，而我地見到這字眼，都知這企業「有古怪」，賣出最好的方法。
雖然佢近年的核數師意見，已正常，但基於一次不忠百次不用的原則，我對這企業仍好有戒心。
你長遠，一定要賣出這股，因為質素不佳，問題是如果賣出，你可以等佢有較多反彈時，分注去賣，這是最理性的決定。
Q14060：
成哥，請問941點睇？
龔成老師：
中移動（0941）有質素的，但賺錢能力就比過往略有減弱，因為中央對電訊業行「提速降費」的政策，對佢長遠的賺錢能力將有影響。
這股可投資，但只是平穩增長型，以及有股息的類別，增長力不算強。同時投資注碼不建議過多。
Q14061：
龔sir, 2019年最想多謝既人係你，由年初谷底的我，直至年中留意到你的文章，依半年多得你的啟發，幫了我一家走出困局，帶領我哋由谷底走到積極！
有時當一時低落時再看看你的文章，即時好像差了電，積極起來。希望2020年除了更積極外，還有大躍進啦。預祝龔sir 2020年新年快樂，繼續作育英才。我報左班，上堂見！
龔成老師：
可以幫到你地，實在太好！
人總有高低，這是好正常，但成功者與失敗者最大的分別，就是面對高低時，成功者能沉著應戰，明白中途的挫折好平常。
我過往都有上落，這好正常，但我睇翻，每次我面對最大挫折時，就是我最大突破的時候！每一次都是！
所以，你要保持動力，更進一步！上堂見！
Q14062：
龔成老師你好，本人37歲 月收入大概3萬 有2個估值300幾萬細單位 銀行貸款有350萬 2個物業 一個出租用途 一個自住
由於加按 手持現金有200萬 近期開始買入股票目標買100萬左右 請問而家入市股市是否一個合適時機？
另外本人新婚太太沒有收入但想換一個大單位 ，這樣的情況是否現在可以換樓還是繼續持有單位並且增持資產類股票 有足夠現金流去租比較大的單位 ？ 謝謝！
龔成老師：
如果從理財的角度出發，持有現時的2個細單位，是較好的，因為當你換入一個大單位，你每月的現金流自然會減少左，你好易進入了「無法儲錢的循環」，要小心。
因此，要睇你換樓的逼切性，如無有太大逼切，就唔好換住。
所以，現時應好好運用手上的$200萬，當增富增值後，再換樓，這樣會比較好。
現時的$200萬，暫時只能動用$80萬，因為大市唔算平，你要分注投資，同時留下一半資金。長線投資。
你可以分注投資平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。
另外，你在這段時間，要多增加投資知識，在選股、企業估值、投資時機上落功夫，對你長遠財富有好大影響。
現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。
Q14063：
你好呀龔成 我冇乜股票經驗 我想問下收息股每月供款平均係幾多？
借錢買收息股好吾好？ 我見而家息好似好低
龔成老師：
你月供股票多少，好視乎你的個人情況。
如果你現時每月能儲到$10000，你供$5000-$8000都可以，只要保持每月長期進行就得。
至於供那些股，這要睇你的年齡、風險承受能力，如果是年輕，可進取少少，中年則平穩，年長則保守。所以，如果較年長，收息股會較多，若較為年輕，收息股較少（或不供）。
如果你未有投資經驗，不建議你借錢買股。
Q14064：
成哥你好，經常睇你嘅Facebook 覺得你對投資嘅理解非常有見地，有少少野想請教你，想問下你點睇未補地價嘅居屋？
其實算唔算係資產呢？定係純粹只可以滿足自住需要？同埋建唔建議補地價呢？因為其實唔補地價係加按唔到。。。多謝解答
龔成老師：
未補地價居屋，因為無法出租，因此只能自住，嚴格來說，這不是資產。
因為這項目無法為你每月產生正現金流，不過，居屋有自住的價值，因為我地每個人，都要有地方住的，這是每月無法避免的支出。
比起租私樓，往居屋就可以用較少的現金流支出，去解決到住的問題，因此，都有當中的價值。
Q14065：
你好，想問－下，香港社會動盪，會否不適合買股票？ 另外，應否避開大陸股呢？ 是否仍可做月供股票？ 謝謝老師啊
龔成老師：
如果你短炒股票，當然不適合，不過，我一向不建議短炒的。
我地長線投資，原理就是買入企業，著眼於企業多年後的發展，香港的情況只是中短期，因此只會對企業造成中短期的影響。
只要我地投資優質股，長線投資，現時仍可以投資的，同時，不用刻意避開大陸股，只要這股優質，長遠有發展，就有投資價值
而月供股票，更是可以保持進行。
Q14066：
老師，咩叫「投資價值率」，係什麼?
龔成老師：
這是一個機會率、回報率等的問題，原理就如同賭錢，如果你去買大細，買「大」或「細」，買$100賠你$100，這就無投資值博率，因為有圍骰，根據數學的「期望值」計算，你長遠只會不斷變少錢。
但如果經過計算，有一定的回報率，而當中的機會率顯示在長遠理論上，我地能贏多過少，這就是有值博率。
我在股票進階班都會有講的，因為涉及一些期望值、機會率等的計算。
Q14067：
我參考你的建議暫時入了 2000股(2800) 6000股(0778) 800 股(0005) 1000股(0066)
龔成老師：
上述的4隻股票，都有一定的質素，你可以長期持有，唔好理中短期股價上落。匯豐（0005）增長力會較一般，你要著重收息，唔好對股價有太大期望。
Q14068：
我在2x歲的時候是已經打算一邊打工一邊投資去達到財務自由的，但我現在發現除了要早起步，都要有知識，勇氣，恆心等等先會有機會成功。
在適當時機買入好股，還要長期持有才能賺錢。
我持有過最長的股票亦不過3年，可能就係賺唔到錢的原因之一。
龔成老師：
在香港，要財務自由並不容易，因為物價指數高，而單靠打工，根本好難。
不過，香港仍有好多機會，睇下有無把握的能力，知識、勇氣、堅持，的確都是重點，這條路並不易，但就要睇你會唔會相信自己行到。
我唔知你的決心有幾大，但我打工時，就是一邊打工一邊建立資產，基本上一星期7日都工作，亦試過為慳錢，一個月只用$700，我將財務自由視為極重要的目標，我會因這目標而付出最大努力。
加油呀！
Q14069：
龔成老師你好,本人今年42歲, 希望可以 提早退休和達致財務自由( 目標 希望每月被動收入有三萬或以上) 但是不懂投資, 但有儲蓄習慣.
現時資產與資金 : 一層自住物業 ( *還有120萬要供) 股票 : 20萬 現金 : 500萬 人民幣: 135萬 收入 : 5 to 6 萬元 基本開支 : 3.5萬~
見到很多投資分析師都建議賣一些穩陣嘅eg 美國三大指數基金:
- S & P500 ( 標普500) > SPY 2 )Dow Jones ( 道瓊斯指數) > DIA
- Nasdaq納斯達克指數 > QQQ
每年7% 回報率 ~ 如果把我這些現金平均放在這些美國指數 可以達到財務自由嗎？ 希望 老師可以指點一下
龔成老師：
以你的收入及財富情況，我相信你可以在50歲，做到財務自由這一步。
你現時42歲，財富仍有增長的能力，這刻要好好運用你的財富，唔好單單持有現金（除非你好怕風險），否則，只要投資穩健、優質的股票，建立一個平衡組合，咁就得。
你可以利用$350萬，以一年時間，分注投資一些指數基金，你上述所講的美股基金，可以投資。
不過，你唔應該只集中投資美股，應該同時投資港股及中國股市，你唔需要擔心中短期股市不太好，因為目標是一個8-10年的投資，到你50歲時收成。
你可以考慮加上盈富（2800）、南方Ａ５０（2822），去平衡你的組合。
至於餘下的現金及人民幣，就留作等機會，如果股市、樓市車位市場大跌，你就可以動用這些資金，去買平貨。
另外，你每月可以儲到$2萬，你可以每月$2萬去做月供股票（如你不想月供，就自行分注，久不久入市）。
平穩增值股，例如金沙（1928）、長建（1038）、中銀（2388）、港鐵（0066）、恆基（0012）、港交所（0388）。都適合你，如不懂選股，就買盈富。
只要你保持上述的儲蓄，加上投資的合理回報，你到50歲時，會滾存到大約$1000萬總財富（未計物業）。
到時，你可以賣出上述的基金及股票，集中建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）等，到時再建立。
每個月平均會收到$50000的股息，相信能完成到你的目標。
Q14070：
你好，如果現在每月可儲12000元 應該拿多少作月供股票比較理想？
龔成老師：
要睇翻你的個人財政等情況，例如你本身現金較多，可以將$12000全部用作月供。
另外，我地都會睇翻大市平貴情況，去決定點入市。現時大市處合理區，而我假設你本身現金適中，你可以用「一邊月供，一邊儲現金」的模式進行，例如月供$6000-$8000。
至於餘下的現金，就會先儲現金，同時等投資機會。
Q14071：
您好！本人55歲，有1間細屋1房1廳舊屋自己住，不用供樓。另外，有大約＄380萬現金。
有一份工作月入約2萬5千元，但是由于我年大，這份工作對年紀大的人風險極大，因為有好多高級經理想＂整＂走咗的年紀大的人，然後呢就安排佢地自己的人來坐我們年紀大的位置＂……
我這$380多萬元放在3間銀行，我想買穩陣的收息股收息，請教您我應該如何分配這些錢去買穩陣的高息收息股呢？
我應該先睇咗你寫嗰本50高息收息股先～
龔成老師：
以你現時的情況，投資上一定要保守，投資收息股是其中一個策略，你可以考慮，同時間投資其他穩健資產，以建立一個平衡的組合。
你可以將這$380萬，分成5部分。
第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。
（你可睇下《50穩健收息股》當中仲有好多）。
你平衡的投資這些股，除了可以得到穩健的收息收，同時可有效的分散風險。
第二，投資債券，你可以選擇A評級的債券，年期較長都可以，但利息卻不高。你可以到銀行問問。
第三，投資年金，你可以睇睇，這是適合你們的產品，零風險，可以有穩定回報。
第四，你亦可投資銀行低風險類的產品，你可自行到銀行了解下，總之是「低風險，持續現金流」的。
第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。
你可以將$380萬資金，平衡地分配在上述的項目上，對你來說是最好平衡風險，同時有穩定的現金流。
Q14072：
龔成老師，想問一下中國聯塑現價適合買入嗎？還是佢仲有回調空間，再等到時先入？
仲有一隻長飛光纖值得投資嗎？（現黎緊相信會受惠於5G） 如果想買入，要等佢去到再平啲（14左右？）還是現價可買入？Thanks much:）
龔成老師︰
中國聯塑（2128）有一究的質素，這股在我的《50值博倍升股》都有推介，但推介後已升了一倍，投資值博率大減，不過，這刻仍未算貴，仍有投資值博率。
但會否回調，無人會知。我地投資唔會去"估走勢"，而用策略去做"資金配置"。現時佢已經唔平，如果無貨，可以買入，但注碼就唔好咁多。
長飛光纖光纜（6869）有質素的，因為全球光纖光纜市場，仍會保持向上，智能手機、互聯網、大數據等科技，成為了行業的推動力。
長飛光纖之前受惠三家國有電訊營運商發展網絡基礎，所以生意不錯，但這亦令這公司出現風險。之前中移動的中標結果，佢排名唔算前，這反映市場競爭有所加劇，佢的賺錢能力有可能略有減弱。
整體上，佢仍有質素，但增長與賺錢能力就有可能略略減，投資價值仍在，但這刻只是合理區較低位置，你可以投資，但由於未到平宜區，故只能分注，不要大手。
Q14073：
Hello龔成老師～～比起月供股票，我比較傾向慢慢儲錢一手一手買，想問問0012同1211現在算是平宜區嗎？值得入市嗎？
謝謝您的解答！
龔成老師：
其實月供或分注都得的，重點是「平均買入價」，所以，如果你可以造到自行分注，將買入價平均，有效將風險減少，咁就得。
恆基（0012）現時處合理區，分注投資可以，至於比亞迪（1211）可以話初步進入平宜區，小注投資可以。
其實佢早前出左業績，有點弱，除左中國車市競爭大，中國經濟轉弱，補貼減都是其中一個因素，相信佢業績、股價中短期仍會弱。
但要留意，我地分析時，唔需要太著重中短期的數據。佢出來的數據的確有點失望，但一年前，都開始預中國車市有不利情況，因此都是預期之事。
中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。
長遠來說，企業仍有潛力，發展仍是正面，因為這企業正在靜靜起革命，好多大型投資仍在進行中，例如超大型的電池廠等。加上中國政府對行業仍支持，佢長遠會慢慢有野睇。
可能你會問，補貼減，仍是支持行業嗎？
其實，中央的政策只是有所調整，而不是全面改變，減補貼是希望行業不會永遠依靠政府，而可以自己出到「市場化」的產品。另外，中央將來政策方向，會調整至補貼一些「有技術」的電動車企，而不是胡亂資助，簡單來說，就是希望行業發展技術，這是令行業長期更健康發展的方法。
同時，中國因為能源問題，長遠一定要發展電動車，這是大方向，行業成功是遲早的事，只要技術不斷提升，行業發展一定會更強。不過，一切都是長期的，而比亞迪這類潛力企業，總存有不確定性，所以，這企業長遠雖然正面，投資亦要注意風險，不能太大注，這是一直所強調的。
股價波動，如投資要分注（最好是小注月供），不能大注，同時一定要長線投資，車市要慢慢才好轉為這股要好長線先有野睇，所以要著重分析長遠的因素，唔好太理會中短期的情況。
同時，潛力股存有風險，你要衡量自己的風險承受能力，年齡較大的投資者亦不適合。
預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期3年、5年、7年，後先有真正的爆發情況。
Q14074：
想問880澳博，點睇？
澳博還是美高梅好？
龔成老師：
兩隻都有質素，但質素不及金沙（1928）、銀娛（0027）。
如果是上述兩股，澳博（0880）會較有投資值博率。
相信「上葡京」是佢的最大增長力，項目會令澳博的酒店客房接待能力增加約五倍，購物、餐飲、娛樂，以及活動設施，將提升澳博的地位（過往澳博較集中在賭場，較少發展這類大型渡假村項目）。
「上葡京」將提供一座總樓面面積達521,435平方米的綜合建築物。超過90%的總面積將提供一系列的非博彩設施，包括具有「上葡京」、「Palazzo Versace」及「Karl Lagerfeld」標誌的酒店大樓，合共提供約2,000間房間。還有會議、購物、餐飲及娛樂休閒設施，以及一個娛樂場，總項目成本約$360億元。將是澳博的潛力所在。
以過往的發展布局來說，澳博的確只屬一般，市佔率近年由31%跌至16%，正是布局的問題所在，第一，太集中在澳門半島的發展，忽視了路（乙水）的發展力量，因此錯過了市場增長的份額。
第二，太過集中賭場，沒有發展大型娛樂設施，其他競爭者不斷發展「娛樂+博彩」模式取得成功，因此令澳博市場佔有率不斷減少。
「上葡京」將會成為澳博重要的資產，之後的市佔率，收入及盈利，都將會出現明顯的改善。
Q14075：
龔成老師你好！本人36，月薪2萬左右，先生44自僱不穩定收入，有一小孩讀幼稚園。
有一按揭供淨100萬，月供6000，現值550萬的物業，本來自住，但兩年前租出，自己則租大些少及近工作地點樓住，補租金差價5000。近日有感香港樓市升幅已達不合理level, 想賣出吐現，但又怕做錯決定
請教現況應該點好？
方案1. 賣出物業，換兩至三間外國物業，外國租金收入抵香港租金收入
方案2. 賣出物業，換一間外國樓，其餘資金投資穩健的債券/基金等收息，補香港租樓費用
方案3. 保持現狀，keep住租出租入補5000 方法
方案4. 換樓，心水換的單位預計補150萬，按揭多100萬另用現金50萬，每月供款同現時差不多供樓加補貼租金差額差唔多
好擔心做錯決定，因為以我人工如果落左車應該好難再上返車
希望可以幫我分析下，謝謝
龔成老師：
唔建議賣樓，因為這會令你處於「無樓」的狀態，如果之後的樓價與租金不斷向上，對你會處於不利（記住，無人可以正確預測樓價，而我地只能以平衡資產的角度，進行配置，減少自己的風險）。
如果你賣出香港樓，買入外國樓，的確在租金上會多左，不過，如果外國樓租金唔升，而香港這邊租金不斷升，就會對你不利。
除非你打算日後會到外國長住，否則，未必是最好的做法
至於換樓，除非你換樓有好明顯的生活改善及需要，否則，當中的一買一賣成本，已去到幾十萬，未必值得。
因此，暫時都是保持現狀先，就算香港樓不合理，你都要有自住的需要，你持有一個香港物業，這是最穩陣的，因為你有基本的住需要，無論香港樓平貴，你都要解決這問題的。
Q14076：
你好呀！ 成哥 請問港股 1316，288，941 可以作長遠投資嗎？ 謝謝
龔成老師：
耐世特（1316）近年的業績，的確有點弱，但又唔算好差。我相信佢中短期仍會面對不利的經營環境，見佢生意並無增長，盈利都是。
相信要過一段時間，先會慢慢進入正常少少的時期。這股都算有投資價值，股現價合理，但就未必值得投資太多，因為質素始終不強。
萬洲國際（0288）有質素，但增長力不是好強的類別，長線投資可以。
中移動（0941）有質素的，但賺錢能力就比過往略有減弱，因為中央對電訊業行「提速降費」的政策，對佢長遠的賺錢能力將有影響。
這股可投資，但只是平穩增長型，以及有股息的類別，增長力不算強。
Q14077：
龔sir你好，之前睇你介紹月供股票覺得好岩自己，唔駛日日睇住個股市，跟住就去左做月供，揀左中銀黎做，因為可以用信用卡儲分，暫時月供$3000盈富（2800）。
但問題係，中銀每個月要收$50手續費（係最低消費），然後每半年要收$150存倉費，呢的都係做左幾個月先知（因為佢全新客戶係免一年手續費，之後會扣返，但之後第二年就要收），咁計既話，一年既手續費係$600，加存倉費$300，一年要收$900。
咁月供$3000，一年$36000，$900手續費等如2.5%，而盈富派息都唔知有無2.5%既情況下，係咪等如利息都只夠交手續費？
咁既話，係咪儲埋幾個月既錢去證券行買一手股票比較好？因為買一手股票，計哂佣金都係$100蚊到。
龔成老師：
月供股票的確有一個缺點，就是手續費，如果手續費佔你本金比例去到1%，就開始多。
銀行的收費會比證券行大。你有幾個方法，第一，如果你資金可以的話，可以加大月供金額，去到$5000每月，我相信手續費的比例就會較合理。
第二，你可以改為一手手買，這樣的手續費會較低。
第三，你轉去證券行，有些證券行有得做月供的，你問問，這樣的手續費仍比銀行平好多。
Q14078：
本人42歲，己婚，有兩名小孩。二歲和五歲！太太要照顧小朋友沒有工作！
但上年不幸有類風濕關節炎，不能工作半年，漸漸康復工作能力也大不如前！現在只有之前人工1/3左右！大約$23000左右！
我相信本身工作在未來也未能回復之前收入！ 現在感到前路茫茫！
我擁有兩層物業一層現價4.5M..欠2.8M 供$12000 收租$16000
另一層現價6.5M 欠3.9M 供$17000 現父母住 沒有租出！
我自己本身租屋 $14000
我除供樓外沒有欠債，本身也沒有股票 ，現金大約有1.2M！希望能找出路應付將來生活！
幸好本人的類風濕關節炎並不是太嚴重！未至於手指骨變形！但因為患病不能活動太多！工作能力也大不如前 現在每月也入不敷支！
我工作本身最重要就是一雙手，現在每日也服食類固醇控制病情，工作能力也大不如前！ 謝謝你
龔成老師：
你42歲，其實仍可以想想一個問題，有無轉行的可能，人要跳出去的一刻並不容易，但有時我地就係要有突破。
你仍退休年齡仍有20年，如果你預期工作能力較難有好表現，甚至有可能慢慢下跌，這刻，其實是想想這個問題的時候。
我希望你可以闊一點去想，所有的可能性。
如果你現時人工$23000，其實就算轉行，都唔會損失好大，但如果從長期的角度，可能中短期人工減少少，但長遠能有更好收入，同時對你身體更好，這可能是更好的方法。
你可以從一些較少用手的工作去尋找。
至於你現時的物業，你父母住的那一層，如果能配合的話，佢地往4.5M的一層，而將6.5M放租，你會有較大的現金流，甚至，有無可能你地家庭與父母同住（當然可能不易，但如果成功，現金流就會大增），但在這段時間，希望你想想任何可能的方案。
我始終認為，你這刻要想一個長遠的工作問題，這是比較核心的，有D野已經是事實，我地就要想想，點樣做最理性的決定，對你地長遠是最好的。
Q14079：
你好龔成老師，我是澳門讀者，請教以下問題：
1）2018年 買入 應否放，再買其他股 255龍記 8,000 $4.8 1812晨嗚 2,000 $12.1 ，後來 10股送5股
2）每月在保險公司供 FTEBU 富蘭克林鄧普頓投資基金 每月保費 USD191.67 此基金是否值得繼續供款 或是 改供其他基金？
謝謝！
龔成老師：
1）我地繼繼持有一隻股票與否，重點是企業的質素、前景，買入價只是一個心理因素，唔好比這因素影響。
龍記集團（0255）業務不算差，但近年就有業務下跌的情況增，長遠的增長力都不強，投資價值算是中等，如果你持貨不多，可持有，但建議部分貨在有較大反彈後，減少少先。
晨鳴紙業（1812）正面對不點經營環境，相信中短期仍會弱，而最不利是佢有一定的負債，這會提高了佢的風險。
現價處合理區底，這刻賣出有點不值。長遠來說，這股都應該賣出，但建議在反彈後，先賣出部分，餘下再守，到上升到一定水平後就要放，較難上翻去買入價。
2）我無特別研究這基金，因為坊間的基金太多。而富鄧普頓相關基金，一般都不差的，你長期持有無問題。
Q14080：
老師 請問你在篩選優質服中所提及的篩選有使用甚麼程式嗎
龔成老師：
在我的選股過程中，會運用「篩選3步曲」，第一步就是利用選股程式（免費的），去從2000間上市公司中，選出基本的優質股，我會在程式中用一些簡單的財務指標，用程式已可快速找到表面的優質股。
整個過程會在課堂中示範的，到第2步，較深入去找股票，到第3步，會再仔細分析。
Q14081：
阿sir，我係你股票班學生，以下是我對1317的分析，我d野要請教。
企業優勢： 有良好品牌，網絡及課程完成後的雙重畢業認可（中國及加拿大），各項財務數據亦不錯
企業弱項： 要先有學校、老師、教育器材等才能提升或產生盈利，想提升盈利要不斷興建或收購其他有質素學校以吸納學生，在資金上要控制得宜。而且行業中亦有其他不同類型的對手競爭
機遇： 中國日漸富裕的中產家庭，如年報所講，雙語國際需求日益增加，於2018年約有60萬學生送往海外讀大學，另外是近年的二孩政策。隨著政策，中國人口年齡層結構可能漸有改變，雖未知將來中國的中產家座會否持續上升，但長遠對企業是正面
威脅： 課程修畢後的認可性，某些學校有其他的畢業認可，相信如有其他更好的國際性認可資格，相對楓葉的中加認可，或會令學生偏向入讀較好的學校。
5年平均每股盈利：0.13 預算每股盈利：0.15 合理市盈率 ：15-20倍 推算估值：$2.3-$3
問題
1.這個行業分好多類型的學校，如盈利性或非盈利性，民辦學校或國際學校等，有時在基本面上未知能否作出比較。而我以上對企業的是否正確？
2.這個行業的風險還有其他因素嗎？
3.預算估值合唔合理？ 謝謝
龔成老師：
1）你上述所講的分析，大致正確。當我地會分析一個企業的競爭情況，以及企業價值時，會從兩方面著手。
首先，當投資者分析一間企業時，就要以行業的情況去分析，行業的競結如何，競爭對手如何，你可以從消費者的角度出發，即是從學生、家長的角度分析。
我相信楓葉教育（1317）在行業間有優勢，中國人生活水平提高，自然會偏向這類學校，香港的情況都類似，國際與校不斷增加。
行業的主要競爭者為其他國際學校，其他學校影響相對較細。
2）這行業其中一個因素是政策因素，這間企業的市場估值過往被大減，其中一個原因就是中國的政策風險。
其實，教育行業近年增長快速，業務增長理想，加上有相當的賺錢能力，本質不差，因此市場一向對這類股都有較高的估值。
但在2018年，中國政府推出了一些行業的指引： 「實施集團化辦學的，不得通過兼併收購、加盟連鎖、協議控制等方式，控制非營利性民辦學校」條例。令教育行業的股價大幅波動。
這的確加強了對行業的監管，影響了對非營利性學校的併購，影響了這企業增長的潛力，對企業估值都略有影響。
這企業本質無問題，但前景方面，就因為相關因素而有不確定性，這點你要加強分析。
3）大致合理，在推算的盈利中，我會比高少少，這會更能反映到佢的經營情況，你在盈利方面的估值保守左。如果以最新年度的每股盈利計，去到$0.24港幣，因此，考慮到較合理的預測，以$0.2-$0.24作基礎會較合理，同時亦不進取。
不過，但市盈率上，由於佢潛在的增長力，有機會減少左，所以這方面都要略為調低。
整體來說，你最終的企業估值，保守左，可以調高翻。而現價大致處合理區中間。
Q14082：
好奇一問，如果特朗普真係大選後先同中國傾，對同內需有關嘅企業影響大嗎？如福壽園、中生咁。
龔成老師：
這會對中國的經濟有影響，如果佢咁樣做，關稅方面不會減少，首先最受影響是出口與貿易。
由於中國經濟受影響，內需都會受影響，福壽園（1448）、中生製藥（1177），都會有少少影響，但不是最影響大的類別。
Q14083：
你好，一年前聽從你的意見，開始了投資股票。
我25歲，月入約3.7萬，可儲蓄25000，當中8000用以月供股票。有三十多萬現金，十萬股票。
年多後，現投放在股票的資金大約有12萬，但現貨估值為11萬。（明白這是市值上的升降，我們應該重視企業的長遠質素）但想問，香港現時這種狀況，受社會運動影響下，會否同時影響企業的質素呢？還是你覺得可以繼續月供？
我的投資組合如下： 2800、2388、66、1211、1928
龔成老師：
你持有的都是有質素的股票，可以長期月供，唔需要擔心中短期股價問題。
我地做月供，一定要長期先有效，最好5年以上，因此中短期股價，根本唔會影響結果。
反而，我地會希望中短期股價下跌，令我地可以買到更多平貨，只要長期向上就得（因此一定要供優質股，長期）。
Q14084：
龔老師，請問可否分享一下您對以下項目的睇法？值得進行嗎？
1）可扣稅延期年金 2）可扣稅MPF自願供款
謝謝
龔成老師：
1）延期年金原理是在你係年輕時以分期儲蓄方式累積資金，並係退休時把資金轉化為穩定年金收入，以供退休生活之用，而合資格的延期年金產品保費更可享稅務扣除。
2）至於自願供款扣稅強積金，有好有壞，好處是稅項的優惠，但要留意，佢都會有個上限。
如果你原本都是儲蓄投資，比起自己做，參加自願可扣稅，這的確是好處。
當然，都有壞處，首先是管理費，盈富（2800）的管理費只是0.1%，但坊間的強積金，就算是追蹤指數的基金，管理費都唔低，你要計下數睇下有無著數。
另外，你要到65歲先可以取到，靈活性會大減，因為你人生裡不同的階段，都可能會需要資金，而不一定等65先，所以，這方面你可以留意。但如果你本身都想這筆錢65歲作退休先用，咁都可以考慮。
Q14085：
17新世界@10.34買入小注3000股 需不需要止蝕?想長線持有的 現時10元左右，曾跌穿10元
龔成老師：
新世界發展（0017）本身有質素的，不用太擔心。
佢本身業務廣泛，從事物業投資及發展、合約工程、服務提供、經營基建項目、電訊服務、百貨、酒店及餐廳、電訊、媒體、科技等業務。
但要留意，這類綜合企業，一般的增長力都不會太強，佢近年的生意亦只是平穩，不要預佢有好大的增長力。
這股有長線投資價值，你唔好因素中短期股價上落就賣出這股。
Q14086：
成哥，我有些問題，2800盈富，如果佢冇市盈率，咁我可以點樣計算佢抵價，中間價同高價~?
龔成老師：
你要找翻佢的代表指數先得，例如盈富（2800），追蹤恆生指數，你就要找翻恆指的市盈率，你可以上恆指服務公司的網站找得到。
現時大約11倍，你預去到10倍就開始進入平宜的區域。
Q14087：
老師好，最近收到古怪微信，話01787HK抵買 敢問你可否作分析?
龔成老師：
基本上，微信推介得的，都要好小心好小心，如果是美女頭象就更小心，同埋我地投資最緊面自己的分析，唔好靠人。
山東黃金（1787），業務上算是不過不失，但從估值上，現時見唔到平，反而有少少貴，市盈率50倍，市賬率約1倍，唔會用平去形容，除非佢增長力好強，之後盈利爆升得好勁。
Q14088：
老師，我今天終於買到了你的書籍，不過由於都有好幾本，教人眼花撩亂，我最後買了4本書，分別是「80後百萬富翁第7版MOP132」，「80後百萬富翁2第3版MOP132」，「百萬富翁3第2版MOP132 」和「股票勝經MOP194」，合共MOP590。首先把這$590給賺回來先，哈哈，謝謝老師。 我目前改了月供計劃，沒有加入「盈富」，最後加入了「港鐵和領展」，現如下操作：3中華煤氣$3000，12恒地$4000，66港鐵$3000，823領展$3000。
龔成老師：
其實我書的「第X版」，分別一般都不大的，例如《80後百萬富翁》的第1版同第7版，基本上都是一樣，只不過有些內容更新左，你買最新的版就得。
至於《80後百萬富翁》《80後2百萬富翁》《80後3百萬富翁》，則是3本不同的書，你可以視為1、2、3集。
你上述的月供計劃，所供的都是有質素的股票，長期進行就得。
Q14089：
龔Sir 想請教而家市況仲適合投資落股票市場嗎 因香港股市大部分都係中資 而中國又比其他國家夾擊
我自從認識你後跟你投資方法 慢慢儲股票 等將來退休 但眼見而家香港市況 失業率將會高企
還適宜每個月 月供票嗎？本人只有四十多歲 仲要起碼10年才退休 想請教點做
龔成老師：
中美貿戰，的確會影響中國經濟，加上香港社會運動，對香港經濟更加不利。
但我地投資企業，一定是長期，而經濟有週期好正常，反而因為上述因素，令股價受壓，以一個長期的儲貨角度，反而是更有利！
只要你打算投資5年以上，中短期的不利，反而對你買平貨有利，你現時40歲，雖然不是進取模式投資，但財富仍有基本的增長力，你以儲股票的模式，分注投資，其實是不差的策略。
所以，你可以月供盈富（2800），長期進行就得。如果你唔想過份集中在中港股票，可以加入領航標普五百（3140），這是追蹤美股的基金，你同時投資，可以令你的組合更為環球。
Q14090：
hello!龔老師, 我係超級菜鳥,學習緊投資無耐,睇過你D留言問答信箱學識吾少! 想知道盈富基金(2800)其實同我地現時既5%供款 MPF有咩吾同??
同埋我打算月供(2800)每月$4,000, 佔左人工收入既24%...可行嗎?? 謝謝!! 期盼你回覆!!
龔成老師：
強積金可以選擇好多不同的基金，如果你在當中選了「恆生指數基金」，或類似的基金，就會與投資盈富基金（2800）類同。
所以，有無重覆要睇你本身強積金的選擇。
至於盈富，本身是一個50隻股票的組合，已有分散風險的作用，所以，就算這基金佔了你人工比例較多，也不用擔心。你保持月供就得。
Q14091：
龔sir, 想問優質股之間的”換馬”問題：
-
我手上揸住優質股941，想把它換成優質股1211增加增長力，兩隻都是有點兒被低估的股票。我應該立即換馬，還是等1211的安全邊際比941大才換馬？
-
假設我有一堆很優質的股票在我持有名單和關注名單內（假設優質程度不相上下），但我資金有限。我應該每隔一段時間（如半年）就跟據它們的平貴作計算，然後作出「換馬」的行為嗎？
龔成老師︰
1） 其實我地財富增值是睇長線，唔會理會中短期波動，換馬與否，這問題重點應該是"你是否需要換馬"?
我地進行財富增值時會運用「先增值，後現金流」作方法，初期投資較有潛力的股票，後期會轉至創造平穏現金流的收息股。所以要否換馬，是睇翻你在那個人階段，需要增值，還是平穏收入。
中國移動（0941）是有質素的股票，不過增長力不算強，長遠可以慢慢平穩增長，你視為收息股都可以。
比亞迪（1211）主要受惠於電動車發展，但中短期會因經濟和中國車市等因素造成波動，此股要較長線持有才有理想回報，增長潛力明顯優於中國移動。
2者價格都合理，要換碼可以即時和同時進行。
2） 你概念上有少少停流在賺差價和短炒的層面，我之前做銀行、證券行多年，見證大量客短炒全部都蝕錢，只有長線持有才能有錢賺。
其實我地持有一隻股票與否，關鍵位是企業質素、前景，而非價格。策略上，我地係找出有質素股票，待其回到合理或平宜位時買入，之後長期有讓其自行增值。除非企業核心出現問題，不如以往優質，或者市值已嚴重被高估，否則我地唔會去賣出持有的優質股。
所以，你所講的換碼策略，我唔建議你咁做。
Q14092：
老師，1830近期跌左d，係因為不派息同回購消息嗎？你點睇呢？現持有2手hkd3.19買入。
龔成老師：
必瘦站（1830）有質素的，佢生意穩定，同時有平穩增長的情況，佢盈利都不錯，保持增長。
佢之前突然話唔派息，這有點奇怪，因為過往是好高息的，這當然會令股價受壓。（這點反映管理層比較有自己的一套，其實這會有少少企業管治的風險）。
我相信佢想加強發展力度，將更多資金用作投資之用，其實業務上佢是正面的，現價合理（但不是特別平），可長線投資。只是風險度比過往略增，不過，如果管理層正確，相信前景正面。
而我從佢的業務面分析，這股不差的，有長線投資價值，不過不能大注。
Q14093：
成哥你好，我是你股票班的學生，有個問題想請教，我在分析銀河娛樂（0027）的時候，發覺佢最近每個月都有配售/發行股份，其實這個動作跟供股有什麼分別？在配售/發行後股價會調整嗎？
龔成老師︰
"供股"就是企業根據你現時持有股權，要求股東注資，買入新發行股份。如5供1，即股東每持有5股就要供1股，唔供的話你股權會被攤薄。
而"配股"是上市公司會選取某些人士，向他們發售現有或新股份，以達至集資目的。由於出售的可能是現有股份，故不一定會出現股權被攤薄。
如配股是透過新發股票來集資，則在發行後因總發行股數增加，故股價會出現相對調整。
但我相信你見到銀娛的是"股份獎勵計劃"，這是集團透過股份去吸引及挽留優質人才，而非作集資之用。
一般來說，配售的股份數量不過多，我地都會接受的。
Q14094：
老師, 請教一個問題，就係係咩情況下或者考慮咩因素而決定停止月供股票？
除左隻股票不再優質之外, 假設隻股票無變質, 咁要考慮咩而決定繼唔繼續供落去呢？股價太高會唔會係其中一個因素？
龔成老師︰
基本上，我地月供股票係唔會停止佢供款。除非已確定買入的股票其實唔係優質、又或者質素已開始變差，我地先會作出調整。
另外，我地會因應整體大市的平貴，在現金與股票間的比例作調整。所以，當大市去到一個很貴情況，我地會加大現金水平，這時可能會在股票沒變質下減少供款。
不過，除非平貴的幅度好明顯，否則在月供股票的層面，一直進行都無問題。
Q14095：
龔成老師，你好，多謝你無私的分享
有幾個問題想請問一下老師你 現金10萬，股票約30萬（有部份想轉換或套現），另月供7000。詳情如下
手持： 9988@ 197， 400 股 388@244， 200股 [email protected]， 10000股 [email protected]， 20000股 [email protected]，10000股 6869@37， 1000股 [email protected]，50000股
月供每月$7000 （12供$4000， 1211供$3000） 大約值 $20000 12@40， 300 股 1211@ 45， 200股
現時大市段覆，上述股票應否減持/增加？特別有部份股票高位入貨，應否增持？
年紀38，每月可儲4000， 想在兩年後置業，月入32K, 想買500萬嘅樓，唔知能否在兩年內用呢40幾萬升值至60萬？ 連儲蓄約10萬
另想提升自己股票分佈，可否增加注碼利用剩餘10萬 買2800，或2388？當分散風險， 因為之前買地產股16， 都有小獲利，但銀碼大，買得唔多股數
3個水桶，最潛力的反而入得小貨，是否應增加大注碼？ 謝謝老師
龔成老師︰
你先要清晰一個概念，就溝貨與分注的分別，溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。
你所持股票跌了，如果未用盡你預定投資此股的資金，你可以考慮加注。但若果你加注純粹只是想拉平均個股價，而非事前有計劃下進行，咁就唔應該咁做。
另外，我地投資是買入企業，讓優質股慢慢自行升值。2年是一個很短的時間，中間會有很多不同因素影響，令回報變得波動。我地投資一般都講緊係5年或以上，這樣才可以有效讓股價反映出企業價值。
由於你明確2年後置業，故資金應該投放在較保守的項目上，如定期存款或一些收息股港燈（2638）、香港電訊（6823）、工行（1398）、匯豐（0005）、置富（0778）、陽光（0435）。
你現時持有的股票都是增長型，由於你置業都會需要套要以上股票，故建議你將一定比重換碼至波動較低的收息股上。雖然這些增長型股票升值能力強，令你資產增值較快，但同時間波動性也很大，你要明白這個風險。
同埋你持股中的茂業國際（0848）此股市值細，盈利波動，加上負債不輕，建議反彈沽出。
Q14096：
龔sir, 我今年29歲，現在有154萬現金， 我是護士（月入4萬5） 另外仲有兼職（平均月入1萬）。
現在搬了出來，租屋連日常駛費（計埋飲食車費家用）每月支出要2.5萬。
但現在打算買荃灣的半新樓（~600萬左右），但睇了半年也未找到合適的盤，現有的現金一直放在銀行，未有作任何投資已經有10個月，原因是怕睇到合適的樓盤沒有錢買。
我沒有父幹，買樓完全要靠自己，所以不能問父母借錢。 現階段我是否應該繼續keep 現金，不作其他投資，或有更好的方法去運用我的現金嗎？
我之前有試過投資股票，但只係買盈富基金的穩陣股票， 另外想問你現在港鐵， 煤氣好似價位都低，值得買嗎？ 另外中銀，恒基地產，中石化值得買嗎？
龔成老師︰
一直保留現金，完全不作任何投資，這個狀態唔係咁理想。
由於你有明確住屋需要，短期有機會動用這154萬作首期，故唔建議你去動用這筆資金來投資。反而你可以用你現時每月可儲蓄資金，透過月供去創造個升值組合。
先將你每月儲到的錢5成去做月供，其餘先儲起，用"一邊月供、一邊儲蓄"的策略。
月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
同時間，如果你中途成功找到理想單位的話，這筆儲蓄也可以幫補你買樓上的開支，我相信這樣的資金安排，對你會較理想和有彈性。
而你想了解的5隻股票，中石化（0386）和中銀香港（2388）都在合理偏平位置，煤氣（0003）和恆基（0012）在合理區，而港鐵（0066）則在合理區最頂部。
要留意翻中石化（0386），質素算是不差，但又未到好好，始終這只是商品企業，沒有一些太大的優勢，不宜太大注。
Q14097：
龔成老師，有兩個問題想問：
1.比亞迪1211近年股價下跌左唔少，政府減補貼、同行競爭加大都好影響到呢間企業既發展，老師你覺得比亞迪既優質程度有無改變？宜家係掃貨既好時機定係要再睇定啲先？
2.老師你覺得阿里巴巴9988算唔算係好優質既企業？值得長線持有嗎？
龔成老師︰
1） 比亞迪（1211），早前出左業績，的確有點弱，除左中國車市競爭大，中國經濟轉弱，補貼減都是其中一個因素，相信佢業績、股價中短期仍會弱。
但要留意，我地分析時，唔需要太著重中短期的數據。佢出來的數據的確有點失望，但一年前，都開始預中國車市有不利情況，因此都是預期之事。
中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。
長遠來說，企業仍有潛力，發展仍是正面，因為這企業正在靜靜起革命，好多大型投資仍在進行中，例如超大型的電池廠等。加上中國政府對行業仍支持，佢長遠會慢慢有野睇。
至於補貼減，其實只是中央政策有所調整，而不是全面改變，減補貼是希望行業不會永遠依靠政府，而可以自己出到「市場化」的產品。另外，中央將來政策方向，會調整至補貼一些「有技術」的電動車企，而不是胡亂資助，簡單來說，就是希望行業發展技術，這是令行業長期更健康發展的方法。
同時，中國因為能源問題，長遠一定要發展電動車，這是大方向，行業成功是遲早的事，只要技術不斷提升，行業發展一定會更強。不過，一切都是長期的，而比亞迪這類潛力企業，總存有不確定性，所以，這企業長遠雖然正面，投資亦要注意風險，不能太大注，這是一直所強調的。
股價波動，如投資要分注（最好是小注月供），不能大注，同時一定要長線投資，車市要慢慢才好轉為這股要好長線先有野睇，所以要著重分析長遠的因素，唔好太理會中短期的情況。
同時，潛力股存有風險，你要衡量自己的風險承受能力，年齡較大的投資者亦不適合。
預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期3年、5年、7年，後先有真正的爆發情況。
現價已有長遠投資價值，到$35以下入貨會更理想。
2） 阿里爸爸（9988）有質素，阿里巴巴主要包括4大業務部分：
1）商業業務 2）雲計算 3）數字媒體及娛樂 4）創新業務
整體來說，阿里的業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。
以企業的長期發展計，這股的確優質，但在現價略貴的情況下，投資值博率只屬中等。
當然，這股增長力強，只要業務與盈利大增，之後就算股價不變，都會慢慢調整到合理的估值區域，所以，這刻不是全無值博率，只是值博率不算好高。
對於這類優質、有發展，但現價略貴的股票，小注投資是較好的方法，算是平衡了風險與增長的考慮。這股可以長線投資的。
Q14098：
老師你好,一直有留意你的FB,想問下港鐵現時價位值得再追嗎?本人一直睇好港鐵
龔成老師︰
港鐵（0066）此股有很高質素，ROE方面則大致約在10%，只屬一般的水平，這是由於港鐵本身的資產龐大，例如鐵路系統，當中所能創造的回報率不高，鐵路的客運業務賺錢能力有限，而由於當中資產龐大，故必然令ROE 受拖累，此部分的再投資回報率必然不高。
不過，鐵路系統是重要的一環，因這是創造高利潤的地產項目的先決條件。由於以鐵路加物業綜合發展模式運作，故將來的ROE 亦只會是相約水平。
綜合而言，由於港鐵有獨有優勢，而且在長遠仍有發展空間，雖不會有太快的增長，但平穩發展絕對沒有問題，故港鐵絕對是優質的企業。
更重要的是，香港的長遠發展必然是向著新市鎮，鐵路系統必不可少，故將來對鐵路的依賴必愈來愈多，政府亦表示這會是發展的重點，故無論是鐵路以及相關的物業，都會保持增長，長遠計必然向好。
雖然港鐵在多方面都甚為理想，但由於再投資的回報率一般，故發展只能平穩，由於城市發展、鐵路與物業都是很長期的項目，故中短期港鐵增長動力只會一般，因此投資必然是長期或超長期的，因為港鐵的長期潛力仍在。
港鐵的股價由高位回落，現時在合理區較上部的範圍，不過已比之前較有投資價值，由於這類優質股，市場對其估值甚高，投資者很難等到平宜價，因為市場會認為「貴得有道理」，因此，最好的方法就是分注投資、月供投資。
現時已在合理區頂部位置，如果你本身有貨，就不要追入太多。投資後長線持有，慢慢等企業發展，耐心等回報出現。
Q14099：
你好 我係大學生，經過兩個月時間搵補習pt 成功將自己收入提高 宜家可以提高月供至每月六千 打算月供平穩增長+潛力股
岩岩開始左第一期月供股票 分別係00270粵海投資 $3000 03918 金界控股 $3000 希望用公用股平穩增值 金界潛力增長
因為有睇過兩間公司既年報/財政報告 都覺得前景良好 先選擇投資 希望做到穩定增長
如果維持呢個組合5-10年可以嗎？ 定應該降低金界既月供金額 例如1500金界 1500盈富/港鐵/領展/港交所之類既增值股 都有諗過抽$2000出黎月供美股ETF（VTI VOO QQQ） 但係本金細 勁增長好慢
希望四年後畢業可以將$288000既資金滾存至大約$350000-$400000 未知投資策略應否改變 還望指教
龔成老師︰
金界控股（3918）有質素的，佢是柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照，NagaWorld僱員人數超過5500人。
賭業本身是高毛利行業，而金界壟斷了金邊的業務，加上業務平穩，財務穩健，沒有未償還借貸及債務，企業有一定的質素。
但要留意，金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白。
作為長線月供選擇，我有些保留。如果你很想供此股，建議你將組合轉成$1500金界、$1500粵海、$3000盈富，風險會平衡得較好。
係長遠投資策略殷講，我地會運用「先增值，後現金流」方法，即初期應投資較多增值類資產，較後期則應投資較多保守類項目。故你未來10年都會以增值為主，策略上都係主力投資在平穏增長股和潛力股上，以下這些都是合適選擇。
盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）等。
以恆指年平均回報10%計（連股息再投資），4年後應該可以增值至33萬，當然要視乎實際市況。
一邊讀書一邊兼職，可能有少少辛苦的，但將來一定可以累積到相當的財富，將來的你一定會多謝今日的你，理財是長期戰，儲蓄、投資、知識都重要，加油！
Q14100：
龔成老師你好, 我是你學生 我想請教下 我同太太剛結婚樓價太貴 我們唯有租樓, 月租13000 而我地夫妻收入共$42000 儲蓄有約50萬 其中有16萬是股票
1211 1手 $75 823 1手 $47 1038 1 手 $57 285 2手 $11.9 66 1手 $37 6823 2手 $9
Q2 現在我應該如何增值 現時買哪一隻股票比較適合 我們年齡27及26
龔成老師︰
我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。
以你2位年紀計，應以增值為主。你現持有股票都有增長力和質素，都合適你們。除了香港電訊（6823）為收息股，增長力不高，你可保持持有，但不要加貨了。
現在你可以用每月儲到的錢5成去做月供股票，其餘先儲起，用一邊月供一邊儲蓄的策略。
月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）等。
至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。
而現有30多萬資金，一半可用分注形式買入上述股票，其餘同樣等待大跌時機才行動。
多謝各位提問，若然你有問題想向本人發問，可在龔成的fb專頁中（www.facebook.com/kungshing80）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。
另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。