Q45880：
老師，你有無開網上班
龔成老師：
只有實體班，唔會開網上課程。
因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。
Q45881：
想問金銀升左咁多 銅有無投資價值
龔成老師：
長遠有，因為有唔少用途。
例如電動車、再生能源（風能、太陽能）與電網現代化對銅的需求量遠高於傳統工業。
另一個重要部分，就是AI 與數據中心，人工智能基建與數據中心的電力傳輸、散熱系統帶動了額外的銅消耗。
因此，長遠銅的需求正面，價格向上。
不過，近年銅的價格上升不少，而近期有部分人，心態就是炒金炒銀，之後到炒銅，所以短期已經有投機情況，所以，短期價格有機會波動，要留意這方面的風險。
Q45882：
若投資匯豐黃金代幣呢？
龔成老師︰
可以，其實佢係「代幣化黃金」投資產品，類似紙黃金。
以我理解，佢係唔可以換成實物。如果你純粹係投資，咁都可以。
但留意當中收費，會唔會太高。
如果太高，可能買ETF(2840/GLD)仲化算。
Q45883：
龔老師你好，首先真心非常感謝你願意抽時間認真同詳細解答我既問題，我收到你既message時確實感到驚訝，多謝多謝。
你提到既ETF其實我之前都有嘗試理解係咩黎，可惜我真係連你所講解既指數都唔識睇同分析，所以真係無從入手，所以先一開始問HSBC既股票。
我會根據你建議既link去用心study，盡量理解點去運作。
至少投資60萬港幣，其實呢60萬係可以用黎純投資。因為正如你既溫馨提醒，我地資產其實有120萬，我地已經預留左一半（60萬=1年既收入）作 emergency 之用。
所以當我睇到你呢個溫馨提示之後，我就更感謝你係真心以我地的family foundation 作考慮同建議，多謝多謝你。
我會以你所建議的月供方式去投資。我亦計劃用頭一年既時間去實戰，掌握同experience 真正用錢去投資既張力，從中學習得與失，第二年就可以更清楚點去touch呢個投資世界了。
至於investment course。因為我地唔係住係香港。因為老公工作關係，我地係住係大陸海南島三亞。所以之前我一直聽youtube既投資channel 。
但因為本人既資質關係，真係聽唔明。所以先諗住報讀有真人老師講解既online course。
我非常理解你所提及到偷拍等等既concern。但無奈我確實黎唔到上堂。真係唔好意思呀。
再次真心多謝你既時間，認真解答我既問題，多謝多謝。我會好認真去follow 同study你所建議既方案。
祝 身體健康 平安喜樂
龔成老師︰
其實指數ETF，好適合新手。
因為指數ETF係一籃子不同行業架組合，具放散風險能力。就算當中個別股票出問題，對成個ETF都唔會有嚴重影響。
例如美股追蹤標普500指數的（VOO）、追蹤富時全球股市指數（VT）、追蹤港股的盈富（2800），都係指數ETF類別。這些ETF有質素，適合一般投資者選擇。
我自己預未來10-20年，中美都會係全球最大經濟體，所以長線慢慢儲2800(追蹤香港股市)，和VOO(追蹤美國股市)的指數ETF，會係唔錯選擇。
除左開始儲指數ETF，同時要開始提升知識。
如果上唔倒堂，就睇我YT, FB, IG, Thread都會不時提供教學分享。
同埋，你可以睇相關架書，或者慢慢下睇公司年報，去了解下。
其實，真正投資成功架一群，唔係聰明。而係佢地掌握正確技巧，同肯比耐性，所以才會成功。
所以，你月供架時候，初時唔好預有明顯回報，一般要月供3年和持有5年，才會有理想效果。
同埋，最多人出事架位，係一見月供緊架股票個價跌，就停左月供。其實咁係好錯，因為咁反而錯過左平貴入市架機會。
我地停月供，只會係隻股票核心質素出問題，才會做。但指數ETF係一籃子股票，好少會話出大問題，所以長線月供就可以。
加油!!!
Q45884：
龔sir，你好，我係投資新手，想請教你，我每月有34000穩定收入，如要製造被動收入，我適合買月供股票，定係都係買返籃籌股，如滙豐，中電等呢？
龔成老師︰
如果你想製作被動收入，可以(分注慢慢)買一些收息股。
以下是一些值得考慮的收息股，你都可以參考下︰
目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。
[各類收息股比較] https://www.youtube.com/watch?v=t1VSoLLtpic
[避開"假"收息股方法] https://www.youtube.com/watch?v=3bf4bhV-f-g
但我一般建議你這年紀，應以增值為主。
先用增長股去累積大個本金，到退休時才換成收息資產，去支援退休生活。
Q45885：
老師2899 VS 2259 可分析一下嗎？
龔成老師︰
紫金礦業(2899)屬於綜合礦業性質，業務包括金、銀、銅等多元金屬，相對是較穩健增長型。
而紫金黃金國際(2259)則是專注黃金業務，所以近期股價波動會相對較大。
2者都有長線投資價值﹐但始終係商品類，質素未算最高，再加上已經唔平，只宜小注。
紫金礦業是母公司，紫金黃金是子公司，於2025年9月分拆出來。
紫金礦業是綜合礦業巨頭，是全球領先的綜合性礦業集團，業務除了黃金外，還擁有大規模的銅、鋰、鋅、銀等礦產資源。當中的資產遍佈中國國內及全球，是一家涵蓋全產業鏈的礦業龍頭。
至於紫金黃金，是專門整合紫金礦業在中國及海外所有黃金礦山資產，業務較專注於黃金的勘探、開採及銷售，資產屬性更接近「純金礦股」。
資產位於南美、中亞、大洋洲及非洲，包括塔吉克斯坦、澳大利亞、蘇里南、加納等地的8座核心金礦。
簡單來說，紫金礦業適合看好整體有色金屬市場，如銅價、金價等的投資者。
至於紫金黃金，較適合尋求純黃金標的的投資者，其股價與國際金價的相關度會較高，同時更波動。
Q45886：
你好龔SIR ! 剛在IG舉報了你的假ACC，最近詐騙還是無處不在！
呢1年我又再重整手持的貨，怕未來工作及身體不穩定，想再保守一點，暫不考慮美股下，
6823 25.19%
778 22.87%
3190 31.72%
1810 20.22%
如想再加一隻，會建議2388定3110?
謝謝回覆，祝身體健康！
以上大約投入了10萬港元~
龔成老師︰
做得好，最近又多左騙徒，大家要小心。
如果你想穏陣D，3110係收息股ETF，會較適合。
你現時組合持股，除左1810係潛力股，其實都係收息股，算係保守。
不過，個股建議長線唔好高於15%(3190和3110係ETF，所以無問題)，所以你最好加多1,2隻去分散下。
以下是一些值得考慮的收息股，你都可以參考下︰
目標是5%以上股息率的收息股，例如高息基金（3110）、港燈（2638）、深高速（0548）、香港電訊（6823）、工行（1398）、置富（0778）等都可以，你可以了解下，並從中選股。由於收息股股價都會有上落，因此要控制每一隻佔股票組合的比例，不能超15%，最好在10%以下，而3110由於是一個組合，比例可比個股高。
另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、偉易達（0303）（記住，股價略波動，不能太過大注）。
[各類收息股比較] https://www.youtube.com/watch?v=t1VSoLLtpic
[避開"假"收息股方法] https://www.youtube.com/watch?v=3bf4bhV-f-g
Q45887：
老師，再想請教關於賣黃金的問題。
-
飾金應該在香港哪裏賣會較高價？
-
餘下的飾金打算留比囡囡的，我哋應該將飾金買回金條/金幣/金粒/其他再存放，還是保留現狀較好？哪種形式的金會有較大通用性？
-
抱歉老師，我打錯了股票，我是買了ARKX不是ARKK
謝謝老師
龔成老師︰
- 唔肯定(因為我唔會賣)，你要自己去睇下。
如果你在某金鋪買，最好去翻該金鋪賣，價位有機會較好。
- 我不太記得你黃金現狀，其實係如果係主流金舖架飾金，或者知名品牌的金幣之類，市場認受性高架話，你照保留就得。
我不建議變來變去。
- ARK Space & Defense Innovation ETF(ARKX)主要投資於與太空經濟、國防科技、衛星、航太工程及相關創新領域的公司。
主要持股包括ROCKET LAB(RKLB)、L3HARRIS TECH.(LHX)、TERADYNE INC(TER)等。
此ETF是高風險的潛力組合，發展得好，可以升好多。但如果發展不似預期，同樣可以大幅回調。
你投資佢係可以，但明白佢會好波動，因為不確定性好高，只宜小注。
Q45888：
早晨阿Sir
想請問coinbase近期大跌係有啲咩因素導致？
同埋公司嘅核心價值有冇改變？要唔要轉變投資策略？thanks
龔成老師︰
主要係幣市弱，同埋之前炒得太高，令到佢出現明顯回調。
Coinbase Global Inc（COIN）雖然有獨特性，但真正的長期價值有多少，根本好難估。
Coinbase已經比上市時，成熟左好多。但現階段依然好受幣市影響，所以你預佢中短期會好波動。若持貨不多，又預長線持有，咁就無問題。
此股依然有長線投資價值，其實佢股價較高位有明顯回調，但長線潛力依然係有。佢現時不停開闊緊自己架業務，由幾年前只係做買賣交易，收下買賣交易費。到現時已有託管、集資、鏈上抵押借貸(BASE公鏈)等能力。(當然，暫時仲係手續費收入為主。)
長線佢發展，有機會慢慢變成類似港交所(0388)模式，即係一個全功能架集資交易平台。甚至長線有機會蠶食部份傳統經濟架金融業務。
當然，這個只係"預測"，唔係一定做到，但佢現時相信是向這方向發展，故具有潛力，值得持續觀察佢發展。
投資此股係可以，但要明白佢係高風險類別，只宜小注。若你本身投資經驗/風險承受力好一般，此股就未必適合你。
Q45889：
老師你好，本人手持白銀ETF
SILJ 平均價9.79 x 450
MUX 平均價 7.93 x 600
PSLV 平均價 8.766 x 500
SLV 平均價 23.157 x 350
應該點部署？求指教
龔成老師︰
首先，你要明白持有貴金屬架主要目的。
我地可以在整個財富組合上，持有一小部分貴金屬，如黃金、白銀。
因為現時用的紙幣不斷發行令其永遠貶值，金銀就會不斷升值，投資者只要投資紙黃金、黃金ETF等，已能簡單地享受到當中的升幅。
同時，當環球出現一些重大事件，如發生一些極罕見但影響極大的不利事件時，就會對全球財富定義造成極大震盪，如大型戰爭、超級天災、大型人為災難等，我們現時所認知的貨幣系統就有可能崩潰，甚至連法律也沒有作用。而人們唯一仍視為有價值的，除了糧食外，就是金銀了。
不過，這類極端事情發生的機會率極低，大量持有金銀令財富組合變得無效率，由於沒有現金流，會損失了當中的機會成本。
因此，投資者只需在財富組合中持有少量已可以，作用就是平衡組合，基本上佔組合的2%-5%已足夠。
持有時，最好係用實金，如果你覺得唔方便，可以考慮SPDR黃金ETF(2840)或者SPDR黃金ETF（GLD）而類黃金ETF。
以下是黃金白銀分析影片，你可以睇下︰
https://www.youtube.com/watch?v=35UjiuLJKT8
所以，如果佢地佔你組合好多，咁我建議把握而家機會，去"慢慢"減持，令組合更平衡。
你組合當中SLV和PSLV質素會較好，同埋較同銀價一致。
SILJ係小型銀礦公司股票ETF，風險較高。因為走勢未必跟銀價一致。
McEwen Inc(MUX)係金礦股，同樣走勢未必跟金價一致，而且個別年份都虧損情況，投資價值較一般。