Q24231：

請問以下如果跌咗一半仲守唔守，公司質素應該無問題

489 / 697 / 6993 / 709 / 2618 / 9959 / 9888

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

如果企業質素轉差，就要賣出。如果企業某些核心優勢減少左，就有機會減持，因此，我地要分析企業的核心因素，一些長期的賺錢能力，有無改變。

至於買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持有股票，都係有質素，可以守。唔會因為跌左一半就放棄。但如果你現時帳面，已跌近半，代表你買入價一定唔平。你要預整個市場環境轉好，才有機會回到你買入價。

東風集團股份（0489）、首程控股(0697)係當中質素較一般的2隻股。而聯易融科技（9959）、百度(9888)，則是風險偏高的股份。

若上述4隻，佔你組合比例較重，我建議你沽少少，去平衡風險。

如果你發現自己經常買貴左，我建議你以後入貨，轉為用分注模式，例如透過月供股票方式，每月買些少，去平衡買貴貨風險，會是較好的策略。

Q24232：

龔老師你好，我已買入2845ETF.在網上也查到他們的管理費用%。但是找不到他們具體是如何計算。可否指教一下如何計算?

龔成老師︰

其實你可以簡單，用你資產的規模去乘這個%，就是你的管理費。

但具體佢用邊一日的資產價值、取平均值，定係其他方法，但要問基金公司至知。

我地一般都會簡單點，用資產規模乘這個%就可以，一般唔會同實際支出差好遠。

Q24233：

其實我唔係好明白老師話大注小注姐係咩意思？幾多手先叫大注？

老師有無研究美股啊？

RIVN可入市嗎？

龔成老師︰

我成日講架「小注」，如果我係講個別股票「質素或風險度」，只宜小注。代表你只宜用總資金的5%左右，投資在這隻股票上。

若果係「大注」，以一般股票計，即係可以最多去到佔組合15%。但如果係風險高的類別，就是10%以內。

若我係講緊「買入價」時，現價只宜小注。就是想指出，此股現價水平唔平，建議你只能用打算投入該股資金，其中一小部份去入少少，到有明顯回調，才加大注碼。

如果大注，即係已經開始平，你可以用較大力度掃貨。

美股我都有研究，Rivian Automotive Inc（RIVN）有潛力的，當然，業務有不確定性，同時股價較為波動，要注意風險。

Rivian同Lucid，同樣稱為「TESLA殺手」，可見在產品上—定的競爭力，企業有長遠的發展。

佢算是一間新晉的電動車企業，而其中一個股票是Amazon ，相信這個關係對佢有利，因為過往佢試過從Amazon取得了10萬部電動貨車的訂單，為Amazon生產電動車作送貨用途。

企業長遠不差，但估值就十分難，這點令股價波動，初步分析現價唔算平，如投資只建議小注，投資要明白風險，買入後長線持有。

Q24234：

你好，老师，请问您哪本书是讲述成长股，潜力股，估值

我持续追踪了一家公司叫做BYND，最近股价距离高点221跌了很多，现在75块，PS 10倍左右，营业收入增长很快，而且负债很少，没有市盈率，也没有ROE，

所以我比较confused什么价格应该买这只潜力股。被热炒的成长股，出现回调，请问应该怎么估值，才能到达安全边际

龔成老師︰

《股票勝經》、《選股勝經》和《年報勝經》這幾本書，有講及一些選股至估值的基本知識，你可以睇下。

但一套完整的估值模式，點去計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

Beyond Meat Inc (BYND)是一家提供植物性肉類的食品公司，其產品包括Beyond漢堡、Beyond香腸、Beyond牛肉/肉球等等。

主打100%植物蛋白、無麩質、無基因改造等健康飲食元素。這類健康食品，相信會是未來一個趨勢，有一定發展潛力。

而且，集團以往主打美國市場。但見佢近期國際客戶部份，增長速度都理想。令集團產品發展空間，可以進一步拉闊。

不過，集團過往收入雖維持增長，但依然未做到收支平衡，而且都好波動。反映其成本控制，依然未穏定，所以投資不確定性較高。

這類股票，我地較難做到一個穏當的估值。只能說，投資係可以，但暫時不確定性較高，只宜小注。

Q24235：

有無建議邊個屋苑？

上車盤之類？

請問供得起係？

龔成老師︰

供得起，意思唔係單純過倒銀行和按保審批。而係你要判斷，自己長線加埋生活開支，長線家庭收入/開支變動等因素後，你是否依然有信心，長期供樓係無問題。

至於屋苑，我好難特別建議你。

因為如果你係自住，你係要先諗翻，邊個地區最適合你長線生活。之後，你再慢慢從你財務能力和家庭需要，去選擇合適的物業，這樣做會較理想。

Q24236：

龔sir，你好！想請問6185有貨，平均價$295，現在是否已沒上升希望？怎樣做才好？已跌了幾個月，28/10出咗業績仍勁跌，極失望

龔成老師︰

康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組

合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。雖然佢近期已有2隻藥品商業化(Ad5-nCoV及MCV2)，開始有盈利。但盈利始終都有一定不確定性存在，未來價值大部份都係靠「估」。

因此，佢係有長線投資價值，但風險度都唔細。如果持有係可以，但一定只能小注。

Q24237：

龔成老師，你好。自從閱讀你的專頁、文章後，我開始投資股票，希望可以透過額外投資實現財務自由。希望你能對我現時的投資組合和投資方向，可以指點一二。

我今年27歲，月入31K，每月抽$6000投資儲蓄保險（50%科技基金、50%大中華基金），另外計劃每月抽$5000做股票投資。

本人現有股票組合如下：

01177 中生 4,000股 (平均價 $6.4775)

01928 金沙 800股 (平均價 $31.05)

02382 舜宇 100股 (平均價 $125.4)

02388 中銀香港 4,500股 (平均價 $27.47)

02638 港燈 2,000股 (平均價 $8.02)

00270 粵海 2,000 股 (平均價 $13.30)

03067 安碩 500股 (平均價 $16.57)

00778 置富 5,000股 (平均價 $7.666)

00823 領展 200股 (平均價 $52.55)

09988 阿里巴巴 300股 (平均價 $212.93)

想問以上組合需要重組嗎？未來投資上，有沒有建議的股票？

謝謝你！！！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，應以增值為主。你現時持有股票，都係質素，可長線持有，雖然短期股價較弱，但長遠能慢慣守到的。

但港燈(2638)和置富(0778)只係收息股，增長力不高，唔適合你年紀。建議你沽少少，換至較有增長力股票。

未來投資策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗和知識，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資知識﹐潛力股比重可以相應調高，佔組合約3-5成，視乎你投資知識多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

至於投資儲蓄保險的選項，都係合適。但由於這類保險，會有一定收費。除非佢長線都明顯跑嬴大市，否則你直接月供股票，效果應該會更好。

除了透過以上月供方法，去累積資產外。同時間，你要把握年青優勢，去努力增進投資知識，來提升你財富增值效果。你要多讀投資相關書本、年報，新聞和報讀相關課程。

書本上，你可以睇我寫架《80後千萬富翁》、《財務自由行》和《股票勝經》，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

Q24238：

龔成，你好，想問886 呢隻股票，因最近跌好多，非常擔心

龔成老師︰

銀基集團(0886)主要從事經銷酒、糖、中國香煙及日用品。

集團本身規模好細，業務都無明顯獨特性。過去多年，集團持續虧損，而且核數師多次"修定報告"，我對這類股票較有保留。

暫時睇唔倒佢有明顯的投資價值，建議沽出。

Q24239：

老師你好，我想問一下我現在持有hkg 0001 長和的2手股票，請問我應不應該放

龔成老師︰

你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

長和（0001）有質素的，這股長線持有，唔需要太理會中短期股價上落。

由於歐洲弱，相信佢中短期仍會較一般，不過，長遠會慢慢好轉。

但這股並不是高增長，收息及少少增長力。現價合理。

記住，我地投資唔好太過受大市氣氛影響。著眼點應放在企業質素，而非中短期波動上。若優質度不變，就算中短期跌都無問題。

Q24240：

阿Sir, 一直有睇開你既專欄，請問你點睇「力勁科技」（0558）呢隻股？

龔成老師：

力勁科技（0558）主要從事熱室及冷室壓鑄機、注塑機以及相關配件之設計、製造及銷售。亦從事鑄件業務。

近年佢成為Tesla的壓鑄機供應商，成為增長動力。

佢主要生產兩類產品，分別為壓鑄機（熱室壓鑄機及冷室壓鑄機），以及注塑機：

壓鑄機：用作壓鑄有色金屬成汽車部件及元件、電腦、通訊及消費產品以及家用電器等不同類型的金屬消費及工業產品。

注塑機：用作生產玩具、電訊設備、電腦及電腦周邊設備、消費類電子及其他家用或消費產品等塑膠產品。

近期業績理想，帶動企業價值向上，股價亦上升，其中一個原因是電動車產業，開始利用相關技術，佢長遠亦會受惠。

現價算是合理區頂至略貴，但暫時股價上落大，現時估值唔平，因此投資最多小小注好了。