Q23751：

龔成老師，我26歲每月3000左右月供股票投資，選擇邊類型既股會安全又增長到？

龔成老師：

如果你能承受風險：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區中間，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。（但如果你承受風險程度不高，3067就不要投資太多）。

Q23752：

老師你好，因為自己做IT既關係，一直選股時都較傾向新經濟股，但一直都控制住個比例，但最近review自己既投資組合就發現因為科技股一直上升，不經不覺已經dominate左個組合

最高峰時期一隻1211已佔據組合超過60%，後來我減持左一半（其實有啲後悔），同時買入債券基金（約10%）平衡風險，現時比亞迪佔成個投資組合約30%，

但因為我同時都持有700, TSLA, NET等股票，所以組合入面仍然有50%係科技股，但因為自己深信呢啲股票潛力仲好高，又唔捨得再減持，老師建議可以點做呢？

龔成老師︰

其實個別行業佔3成的限制，我地會用過往一段時間的股價計算，如6-12個月平衡價值去計(唔係只用當刻)。好似比亞迪(1211)咁高波動性企業，我地可能要拿1年平衡，才會較準。

但你減持的動作，是一個風險管理，因此你不用後悔。

另外，這個3成水平唔係限死的，如果你自問真係對相關企業或行業，有好深厚的認識。同時，願意承受較高風險，你係可以佔多少少比重。

但作為一般投資者，個別企業和行業，最好保持翻15%和30%比例，咁就會較為穏當。

另外，以你2X歲年紀，應以增值為主，債這類收息產品，主要係收息，唔適合你。而你年輕，可承受風險較高，科技類都有好多種，只要不是太過重覆，就得。

Q23753：

老師，現時持貨如下，是否可以守住？

阿里巴巴$222.7x500

建行$6.58x5000

中國平安$75.5x1500

安碩$15.97x6000

阿里健康$20.85x4000

小米$24.67x3000

和黃$$69.1x2000

金莎$27.25x2800

福壽園$7.02x4000

龔成老師︰

你唔好用買入價或帳面賺蝕，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持有的股票，唔見質素上有明顯轉差，可以照長線持有。

不過，你而家太偏重左係潛力股(9988,3067,0241,1810,0013,1448)，佢地雖然有增長潛力，同時風險都較高，不宜持有過多。

以你4X歲年紀計，潛力股可佔約3-4成，餘下應用以下平穏增長股。若你投資經驗較淺，潛力股比重，要再調至2成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)。如果有投資美股，可投資VOO。

Q23754：

龔Sir,你好，見最近很多網友問在那裡開股票戶口。

我今年7月在南洋開了月供股票戶口，免兩年佣金，每月限額最高$20000，月供的股票還免代收股息費用（不單是兩年，還以後的），唔知現時仍有冇推廣，

不過南洋有些股票沒有提供，如3067!

龔成老師︰

如果可以免佣，而本身你用起黎都方便，咁就用南洋。

其實好多銀行，都係無得月供安碩恒生科技(3067)。不過佢1手銀碼好細，你每1,2個月就直接入一手，咁就可以。

只要你係定時定額(例如每2個月架1號，就去入1手)，基本上都可以做到月供的效果。

Q23755：

老師, 我想問如果我月供，供5-7年, 呢個組合可以嗎？

目標係增長收息，港鐵，領展, 中銀香港, 中電, 煤氣, 加多一隻, 置富,長江或陽光邊隻好D？

我可承受中度風險，謝謝

龔成老師︰

若你以增長+收息作為目標，你這個月供組合係可以。

至於餘下一隻，我會建議用長建(1038)。因為你本身組合已有2間地產相關企業，再加一間，就會有 少少過度集中係地產類。

記住，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

另外，你現時只是40歲，本身你月供組合已經有少少保守。長建(1038)會係3隻中增長力較好的一隻，所以加入佢會係較理想。

Q23756：

龔成老師你好，想問下航運股營利最近一年上升好多甚至幾倍，來年可能都有相當增長，佢地既股票例如00316，1919現價值博率高唔高？值唔值得持有？

龔成老師︰

近一年航運股盈利大幅上升，主要係因為供求失衡，令其收費大升所致。

但長線計，這個失衡情況會慢慢回復正常，故未來增長潛力，未必如你預期一樣強。

東方海外國際（0316）質素都有，但賺錢能力不算好強，增長力都不算好強。

航運股對經濟週期較敏感，之後經濟好轉對佢都有利，不過股價已反映。預佢之後平穩增長，但現價偏貴。

若你持貨較多，可以先減持部份，餘下長線持有。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

現價算回到合理區頂，此刻值博率唔算好高。若你係有持有，照長線持有，係無問題。

Q23757：

國泰航空，你能否分析下。

雖然近年好垃圾，但終究係一間老牌公司，我去美國/英國都係靠國泰

龔成老師︰

國泰（0293）的質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算比佢「捱過疫情這一關」，但相信賺錢能力都唔會有太大改善。

你可以睇翻係疫情之前，其實佢賺錢能力已經係弱左。就算回到正常環境，佢投資價值都只係好一般。

Q23758：

龔成老師你好 小弟是投資新手 最近在看一些投資書籍 很多書也提及到再做資產配置的時候要預留一部份去買入債券/債券ETF作防守 以減低風險和製造現金流

其實這概念與購買收息股差不多 相比之下收息股帶來的現金流比起債券好像更吸引

若我打算購買資產作長期持有 老師你推薦是購買債券或是收息股呢

謝謝

龔成老師︰

其實2者性質上好唔同，收息股是一種資產，如果你投資的收息股係有質素，佢除左可以幫你跑嬴通漲外，更可以帶來一定程度增值。(當然增值能力，不及平穏增長股和潛力股好)

而「債券」只是產品類，從財富本質上，我地應較集中持有「資產」(如優質股、物業等)，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

所以，如果你目標係收息，長線計會係收息股較好。但由於佢始終係股票，會有價格波動性，風險會高少少。

若你已是退休人士，可以將部份資金配置在債券，去平衡風險。

但如果你係偏年青，你就應先做好財富累積部份，債券和收息股都增長力欠奉，故太適合你。

Q23759：

請問1359 中國信達/1638 佳兆業集團 適合長線投資嗎？

龔成老師︰

中國信達（1359）質素只是一般。

睇翻佢前身，係中國信達資產管理公司，係在中國成立的國有金融企業。集團的主要業務如下：

（１）不良資產經營：收購及受託管理、投資及處置金融及非金融機構的不良資產經營、債轉股資產經營、破產管理、發行金融債券等。

（２）投資及資產管理：自有資金投資、資產管理（私募股權基金）、資產及項目評估、財務顧問及諮詢、房地產及實業投資。

（３）金融服務：對外投資；證券及期貨買賣、信託、融資租賃、基金管理、保險。

由於資產質素較弱，除非中國經濟較強勁，否則，業務有一定的風險。

現價唔貴是賣點之一，但唔建議投資太多。可以投資收息，但要控制注碼。

佳兆業集團（1638）主要從事物業發展、物業投資、物業管理、酒店及餐飲業務、戲院、百貨店及文化中心業務，以及水路客貨運業務等。

業務發展不差，不過盈利就較為波動。

另外，由於負債較高，再加上內地樓市放緩和政策影響，投資佢風險都唔細。現價合理的，但唔建議太大注。

Q23760：

您好 龔Sir, 本人在現時財務前路上遇到決擇困難，不知該如何決定才是最佳的安排，希望大師你可以指點下迷津。

本人居於香港，年屆40，有2歲BB ，太太及工人姐姐共4人同居於一個400實尺自置物業。主力一人番工，太太為全職媽媽。收入為年薪70萬左右。

資產方面流動資金約100萬（70萬現金，30萬股票）（股票以美股占80%），固定資產只有以太太個人名義持有自住物業（估價600萬，按揭300萬）。

希望在資產上有增值，有考慮過3年後為了小朋友教育而資產變賣移居英國。希望在這幾年時間好好利用增值機會及還有自己首置既名額。

希望請教下您的觀點及建議，謝謝！

龔成老師︰

首先，你要明白3年唔係一個長時間，就算投資再優質資產，都會有機會出現波動，影響最終回報。

由於你3年後你要變賣資產移民，物業這類流動性較低的投資，我就唔建議，而且無人知中短期個樓市點走。

而你手上流動資金，可以投資一些較平穏增值的優質股，去盡量把握這3年，做一個較穏妥的增值。

策略上，除了現有資金，你可以用每月5成儲蓄做月供。其餘先儲起，用一邊月供一邊儲蓄的策略。

若你想進取些，可集中「平穩增值股」，相反你想保守少少，可以集中在「收息股」上。

平穩增值股，例如指數基金，港股盈富（2800）、有投資美股可投資VOO。長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

現時大市只是合理區，你現有70萬資金可以再投入多20-30萬，用"分注"形式，慢慢買貨。餘下資金和每月的一半儲蓄，就等大市出現一定程度的下跌，才大力度掃貨，然後長線投資。

之後，到你要移民前半年左右，就開始慢慢分段沽貨套現。唔好等到用才一次過沽，因為無人知當時個市況係點樣。所以，你要分段沽貨，去平衡價值波動的風險。