Q35341：
龔sir好，AI相關的，如果綜合考慮（便貴度，風險度，值博率等），ASML，NVDA，AMD，TSM，買邊間會好少少？
龔成老師︰
其實3間係AI發展中，都擔當不同角色，都有投資價值。由於發展需要大量算力，GPU需求都直接和間接帶動佢地架增長。
不過，邊間值得投資D，真係睇你自己覺得邊個範疇未來會較為受惠。
NVDA和AMD係晶片設計和銷售，前者明顯會係較有優勢(AI層面)，但現價在合理區頂部，甚少開始少少貴，等佢回翻先好投資，同時要分注，又或如果好想買，現價小小注，等回落先正式買。。
TSM是代工，主要係接單生產，佢代工技術高，基本上而家下游架企業都係找佢生產。但因為佢唔係只做GPU，佢有其他生活、汽車、手機之類架晶片。所以，個增長潛力未必有NVDA和AMD佢地咁高(因為個別範疇生意增長力較弱)。現價算係合理區中上，比其他幾間叫到好少少，無咁貴，但都係高位，不宜太大注。
ASML是光刻機生產商，有好高技術含量，要整到好架晶片，無佢架機係唔得。所以，佢都有好強架壟斷性優勢，但同樣現價唔平，等佢回翻先好小注。
整體潛力度，相信NVDA會係略高，但價值水平都係它們中最貴。而TSM和ASML都有技術方面壟斷性，但始終係代工和上游企業，長線增長潛力未必有晶片設計咁高，但受惠於技術壟斷性，長線增長會較穏定。
Q35342：
龔成老師，個人背景, 現金有$80000
目前持有1600股申洲國際（2313），買入價係$107，請問仲可以持有嗎？ 還是應該將$80000加注溝淡2313？ 已經持貨兩三年一值只係想平手離場😔謝謝
龔成老師︰
申洲國際（2313）有質素，佢可以話係中國最大的縱向一體化針織製造商，主要以代工（ＯＥＭ）及委託設計（ＯＤＭ）相結合方式為客戶製造針織品。
佢的的布料生產基地位於中國寧波市和越南西寧省，並策略性地在中國寧波市、衢州市及安慶市、越南胡志明市及西寧省和柬埔寨金邊市設有製衣工廠。
佢主要生產針織運動類用品、休閒服裝及內衣服裝，主要客戶包括ＮＩＫＥ、ＵＮＩＱＬＯ、ＡＤＩＤＡＳ及ＰＵＭＡ等品牌客戶。產品市場遍佈中國內地、日本、亞太區及歐美市場。
過往發展不差，企業有質素，有長線投資價值。
不過，現時全球經濟轉弱，同時佢主要客戶NIKE都表明未來產品需求預期較負面，所以你預佢中短期表現都會較弱。現價算合理區底部，此股有長線投資價值。
如果佢只佔你組合小部份，可以守。但如果佔比很高，建議減持。唔係因為佢質素唔得，而係我地投資講求平衡配置，就算你幾睇好一隻股票，都唔會集中晒係佢度(個股最多佔組合15%)。
另外，你有個投資概念好錯，好多散戶都係因為而個想法，輸好多錢。
我想你明白"溝貨"與"分注"的分別。溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。
而你架做法，就係"溝貨"。
表面上，你好似拉低左個平衡買入價，感覺會令佢易D回到成本價格水平。
但你只要拉闊個畫面，其實你係將更多資金，投入單一股票，去拉高晒成個組合架風險。
而好多時，而隻股票本身就質素弱，或者風險高(雖然2313唔算係而2類)，最終令到散戶輸得更深。而個就係好多散戶架盲點，記得要避免。
我建議你要多讀投資相關書本、年報，新聞和報讀相關課程。因為長線投資回報，必然會同知識成正比。
書本上，你可以睇我寫架《圖解股票小百科》、《80後千萬富翁》和《財務自由行》，都適合初學者。
我Youtube Channel都會不時分享一些投資技巧和知識，你都可以睇下。
https://www.youtube.com/@user-rw4st4yg5v
另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。
Q35343：
老師， 1211 相對 9866？ 邊間公司有實力D？ 同現價值博率邊間高D？
龔成老師：
比亞迪（1211）會較有實力，1211業務發展理想，研發不斷進行，汽車賣得好好，電池技術發展得很好，行業前景良好，企業長遠發展正面。
現時已經成為中國電動車市場的一哥，同時品牌及銷售網絡理想，長遠仍有發展，不過，唯一擔心是股價波動。
現價約在合理區中間，由於一手入場費較高，可考慮小注月供可以。如果想一手手買，就要睇你資金情況，如果你只得一注資金，建議等佢回翻多少少先。
如果本身有貨，可長線，雖然企業最爆炸性增長已過，但長遠仍有發展，但就預佢股價波動，因此，只要持貨不過量，就可以長線持有。
當然，9866都有潛力的，但風險就會較高。
Q35344：
想問下01818依家價位買唔買得？
龔成老師：
招金礦業（1818）不過不失，佢主要從事勘探、開採及銷售黃金。
本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。
股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。
近期受惠於金價上升，此股升了不少，市盈率去較高水平，唔平。
此股唔係無質素，但只屬中等，不建議持有太多。
Q35345：
老師想請問預期息率比現時息率為佳，可否粗略理解為預期來年財政數據會更佳，從而派息率會比現況更佳？
龔成老師：
當預期息率比現時息率為佳，反映分析認為，這企業之後的派息，會比今年好。
然後，你就要拆解背後的原因（這就是我上堂經常講的，我地要解讀數據背後的意思）。
下年股息好，比今年息好，原因是甚麼？
是今年股息較少，還是分析見到這企業開始持續向好，預期下年派息會增？這就是投資者分析。
Q35346：
新手
微盟 美團 邊隻好丫？
龔成老師：
對新手來說，美團（3690）會較穩陣，不過都要留意，佢股價上落都大，因此，都要小心控制注碼。其實新手投資業務較穩健股票，如港鐵（0066）、領展（0823）會較好。
當然，美團都可選，但風險會較高，你要明白這點。
美團受中國經濟因素影響，以及行業競爭，短期可能較一般，但長遠仍有發展，不過都要留意短期股價波動。
佢是中國領先的生活服務電子商務平台，利用科技連接消費者和商家，提供服務以滿足人們日常有關食的需求，並進一步擴展至多種生活和旅遊服務。可以將美團的業務，簡單分為三類：
--外賣平台
--旅遊相關
--其他新業務
三大業務是有關連的，因為美團利用外賣平台去建立客戶群，再延伸銷售到旅遊相關及新業務類別。
外賣業務，相信仍有中速增長，雖然不是很賺錢的業務，但隨著進一步擴展市場，增加規模效益，提高賺錢能力，盈利情況將進一步改善，同時，將為另外其他業務提供客源。
酒店旅遊業務，隨著外賣業務進一步發展，加上美團進一步發展整個生活平台服務，再配合長遠中國的旅遊行業發展及人民消費力提高，這部分的賺錢能力會更加明顯。
新業務方面，美團不斷加大這方面的投入，想進一步強化「生活圈平台」的定位。
整體來說，美團有一定質素。美團現時建立的生活化平台，仍要時間等其發展得更好，長遠發展力仍在。
但由於業務較波動，財務數據也未完全穩定，以及面對政策風險，投資者較好的策略，就是控制注碼，不建議一次過大注投資。
Q35347：
老師！已看你有關巴郡的片段，咁係咪買VT / VWRA 會較好？看似沒有BRK.B的缺點。
龔成老師：
其實各有利弊，巴郡的優點，是利用「價值投資法」作選股，就算巴菲特離開巴郡，之後都會這樣做，而我相信這套方法會有一定的回報，同時能跑贏不少基金或指數。所以我個人都會長線持有。
Q35348：
龔老師，如果想入手碳中和板塊，華潤電力836 ，龍源電力916 你嘅書中都有介紹過，如二揀一，那個比較優質有潛力？
龔成老師：
兩隻都是新能源股票，有一定的風險，當然有一定的潛力。
916風險會高少少而潛力會高少少，但如果你想穩陣，會建議836。
華潤電力（0836）有質素的，企業過往的投資開始見到回報，開始見到成績。
這企業業務有火電，以及有可再生能源，算是中國裡的傳統電力龍頭。火電部分較多；而風電、水電及光伏發電佔比一半以下。近年新能源的比例正不斷提高。
由於佢的多類發電運營模式，加上政府背景，令佢係現時受惠新能源政策，同時見到佢之前的投資，開始有基本收成，業績開始反映。
簡單來說，就是火電不太好賺，而可再生能源技術開始成熟，令供電成本持續下跌，當這企業的可再生能源比例持續增加，就帶動企業賺錢能力向上，相信這情況會持續。
企業表示仍會持續發展可再生能源部分，因此，相信這企業的賺錢能力可進一步提升。
加上企業本身有質素，例如這企業近年可利用小時數數據，不論風電、光電，或火電，都高於同業平均水平，反映企業整體的營運能力不差，企業有優勢。
這股長遠正面的，可長線持有，現價都算合理中下，但股價上落都大，投資都要注意風險，控制注碼。
Q35349：
請問可以講少少關於PDI嗎？
龔成老師：
PIMCO Dynamic Income Fund（PDI）是一家總部位於美國的封閉式管理投資公司。
該基金的投資目標是尋求當期收入。 其次要目標是尋求資本增值。
該基金在全球範圍內投資於債務和其他具有不同到期日的創收證券和相關衍生工具的投資組合。 其投資包括抵押貸款支持證券、投資級別和高收益公司、公司和主權債券、其他創收證券和相關衍生工具。
佢過往的表現較一般，2020年後價格有較大回落，之後一直處較弱水平，整體的投資價值只是一般。
Q35350：
在股市低迷時，股值已貶值，複息效應的力量是否仍能維持?
龔成老師：
的確會弱左，但投資者最重要從長期角度分析，該經濟體及企業，長遠情況如何，如果只是短期股市或經濟週期，就不會放棄，甚至應該把握機會。