Q24321：
SIR，多謝你的解答。
另想，請問美股︰
1.INCY
2.MMM
3.JNJ
4.CO
可長線或月供嗎，現價合理嗎？
十分感謝
龔成老師︰
3M公司 (MMM)、強生公司 (JNJ)是平穏增長型，現價合理，可長線月供。
國際臍帶血庫 (CO)都有質素，見佢過住增長都唔錯，但始終公司規模細，加上行業較新，有一定風險。長線投資係可以，但唔建議月供，同時要控制注碼。
我未仔細研究Incyte Corp (INCY)，初步睇唔係無質素，但佢本身盈利都不太穏定，未來發展存在較多不確定性，唔建議用作月供。
Q24322：
龔 sir, 你說想達到三年後有600萬，每月要額外投資25,000~30,000, 想問
-
是不是每月用25,000~30,000月供平穩增值股
-
或是每月用約25,000～30,000. 買1手平穩增值股(買股價底的)
-
非常多謝感激，自從跟你學習後，得益良多，尤其心態上冇以前咁衝動去做買賣股票，要先睇睇股票本質, 雖然怎樣分折股票本身仲有排學。 龔 sir, 想問美股C 股票是甚麼 ?
-
早還龔 sir, 現在強積金有約 100 萬，因己65 歲，想問可否提出耒去買收息股例如媒氣，或香港電訊或中銀香港 龔成老師︰
-
正確，但你要留意，3年唔算係一個長時間，有機會出現波動，影響最終回報，你要明白這個風險。如果時間可以拉長到5年，就會較理想。
-
我建議用月供，因為可以做到平衡價格風險。但如果大市跌好多，你都可以考慮一手手咁入平宜的平穏增長股。
-
【潛力美股C的分析報告】
各位股票班舊生，之前應承左大家，我會寫一份分析報告，關於我自己都有持有的「美股C」，終於完成了，8000字分析報告。
這是屬高風險高回報類，要承受風險才可投資，小心控制注碼，買入後就要長線持有5年以上，等企業成長，目標是5倍、10倍的回報。
舊生請電郵：[email protected]
打「我是XXX，讀XX期的學生，想要美股C報告」
例如：
「我是Kung Shing，讀42期的學生，想要美股C報告」
或
「我是Kung Shing，在2020年6月上堂，想要美股C報告」
同事會核對當時的課堂資料，如果有疑問，同事會要求大家再出示一些證明，以證明你上過股票班。
（如果你自己都唔記得幾時上過堂，就直接在電郵，提供上堂的證明，例如：當時學費入數紙、上堂的確認電郵whatsapp、股票班證書等。）
由於舊生人數超過4000人，同事回覆大家需時，相信要10天才能全部回覆，謝大家耐心等候。
- 你可以睇翻你MPF組合，如果係保守基金為主，現時提出換成收息股就可以。
若你係增長股較多，由於現時市況一般，你可以用分段模式。分開多次提取，再換成收息股。
Q24323：
老師，一般分注投資是以什麼作為分注的基準？
龔成老師：
分注有好多種方法，要睇你自己及市況等，最簡單是時間平均法，例如月供。
其實，分注的目的，就是將一筆資金，分成多次去買，以減少一次過在高位買入的風險，將買入價平均。
Q24324：
您好！我現在32歲，每月大概有3萬人工，每月留起$5000儲蓄。現有$5萬儲蓄在銀行。計劃2年內儲到20萬，想加快增值。
未試過買股票，請問應該投資邊幾款股票？國泰合適嗎？
龔成老師︰
假設投資回報有10%（連股息再投資），你每月投資$5000 + 本金5萬，2年後大約會增值至180-190萬。計算上，都大機會達至你目標。
但你要明白我地投資股票，就係等同投資在一間企業，希望佢未來自然成長，以達至財富增值的目的。
因此，投資係一個長線計劃，講緊最少未來3-5年，甚至更長時間。中短期可能會有波動，但長線企業價值，一定會反映在股價上。
而2年這個時間偏短，出現波動機會都較大，較易影響最終回報，你要明白這點風險。可以的話，建議拉長至3-5年會較理想。
策略上，你可以用「平穏增長股」 + 「潛力股」作組合，去創造一個增值平台。
現在你每月先用5成儲蓄，即$2500做月供。其餘先儲起，用一邊月供一邊儲蓄的策略。
由於「潛力股」係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。
現時大市只是合理區，你現有5萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。
但國泰(0293)，我就唔太建議投資。睇翻由價佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。
另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。
就算比佢「捱過疫情這一關」，但相信賺錢能力都唔會有太大改善。
你可以睇翻係疫情之前，其實佢賺錢能力已經係弱左。就算回到正常環境，佢投資價值都只係好一般。
Q24325：
我想問下你XX搞生意有冇得做，做曰本料理龔Sir，
因為我之前有問過你和其他朋友。我問左十個朋友有2個朋友住XX邨有八個朋友話冇得做死城來。
XX個邊好靜，如果XX那一邊就旺近地鐵站，請大哥比下意見，你熱不熱果邊，你識不識果邊。
個地鋪十幾年轉左4搜人
你可以給我意見，假如我做第五搜人
龔成老師︰
我對這地區的情況，唔係太清楚。
不過，如果住個邊住開的大部份朋友，都係話死城，咁你就要好小心。因為你係做地舖，相信會係做堂食，無人流會好大問題。
而且，10多年轉左手4次，話多唔多，話少唔少。如果佢地都係做食市，你就要更加小心，點解無一間做得長。
其實，我建議你最好抽時間，親身去了解下個度情況。要有閒日返工日子，要有假期唔返工日子。
再睇下，附近和經過的人，是不是你客戶群，才慢慢做決定和定策略。唔好因為平，就去租一間舖。最重要係配唔配合到你生意，否則再平都無用。
Q24326：
成哥，1799最低不斷下跌，請問我應否繼續持有？
龔成老師：
新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。
佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。
其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。如果你持貨過多，宜減。
Q24327：
内房股仲有長綫價值嗎
如813
龔成老師：
世茂集團（0813）業務質素中等，現時最擔心佢負債。
佢係中國優質房地產項目的大型發展商，於中國優越地段發展高端房地產。業務包括發展住宅物業、零售物業、辦公樓及酒店。
項目位於上海、北京、哈爾濱、南京、福州及中國其他快速發展城市等，其實過往又不算好差，不過負債較高，令企業風險存在，這是現時最大的問題。
現價雖然已反映相關風險，令股價勉強定為合理，但這股又唔值得太大注，如果投資要注意風險。
Q24328：
龔sir你好，873丶288、1177丶3323丶241呢幾個股你點睇？現時算低價嗎？
龔成老師︰
世茂服務（0873）不是無質素，但擔心被母公司影響。佢由世茂集團（0813）分拆上市，業務有（１）物業管理服務（２）社區增值服務（３）非業主增值服務。
睇翻佢過往的財務數據，基本上都正面，業務不差同時有增長力，不過上市年期不算耐，因此參考價值會減。
股價上落較大，要注意風險。
這股都有質素，有長線投資價值，不過就要留意風險，因為母公司對佢可能或負面因素，所以如投資，要明白風險，同時小心控制注碼，我現時只建議小注，現價合理區中間至中下位置。
萬洲國際(0288)增長力一般，你預主要係收下息。
中生(1177)有質素，現價算合理區中間，可以長線持有。
中國建材（3323）質素較中等，你預佢係平穏增長型，現價合理，但未算平。
阿里健康（0241）這是潛力股，佢營運醫藥電商、互聯網醫療等業務。此股風險不少，因為成個盈利模式都未算成熟。雖然可投資，但不宜持有過多。
Q24329：
老師，我是你學生，想請教關於大行評級
大行評級
最好＞增持
買入
跑贏大市
中性
最差＞沽售
我理解有錯嗎？重有冇其他字眼？謝謝老師請教，thx
龔成老師︰
大致上是這樣，但你要明白大行估值，好多時係著眼中短期因素。
而作為價值投資者，我地應以企業長線發展能力，去作為考慮。
因此，這些大行資訊，你可以用來參考，但不要視為作決定的原因。
Q24330：
阿sir,我5蚊小注左信義儲電，佢而家話供股，即係咩意思，想請教下
龔成老師︰
其實供股，就係而家發一些新股票，向現有股東再集資。
我地是否去供一隻股票，重點係先要睇佢有無「質素」，是否一隻值得我地長線的股票。若果係有質素，你才進一步考慮是否供股。
由於供股這個動作，會發行新股，令每股盈利被攤薄，股價會因此而下跌。
但個原因唔係個企業質素，出左問題。而係每一股的價值，被這些新股分薄左，所以才出現下跌。
因此，我地係唔會因為出現供股，而去沽一隻股票。當然，佢進行得太多，例如5年內出現2次，我地就要對這些股票較為保守。
另外，如果你選擇不供股，你可以考慮將供股權賣出套現。但若你決定要賣出供股權，最好盡快做，因為越後會越難沽。
信義儲電（8328）由信義玻璃（0868）分拆上市，主要在香港從事汽車玻璃的銷售、安裝及維修。
佢於中國內地生產及銷售鋰電池產品、電池包、儲能系統，以及提供合約加工服務。
這企業長遠發展正面，由於此股都有潛力和和質素，你考慮去供都可以。但要留意業務較波動，要控制注碼。
如果你持貨不算多，可考慮供的。