業績期來到尾聲，戰友近日應該都發現，唔少股份，尤其是大市值嗰堆，遜預期的佔多數，大部分都係見光死，就以昨天為例，中石油(0857)、中海油(0883)、騰訊(0700)、長實(1113)及中移動(0941)，全部都遜預期，中移動午後插到開花，其餘那幾隻都係收市後公佈，今天開市或有沽壓，但執筆之時的星期四晚，夜期並沒有太大反應，最差時也是跌百零點，騰訊在歐洲或ADR的表現，都比不上期指可靠，而其他股份的ADR成交唔大，指標性極有限，最信得過的只有港股這主場。

近月比較少寫一些藍籌的業績評析，主因係自覺寫不到有獨特的見解，藍籌股份，普遍透明度高，有季績或者每月出數據，跟住仲有百幾個分析員睇實，要遠超或遠遜預期，難度極高。長和及騰訊，業務超多，每個板塊只能濃縮講幾句，難道睇幾粒去年的數字，就可以知來年走勢咩，別傻了，反而屈臣氏單嘢會點呀，騰訊新game幾時交到成績呀，雲收入今年仲會不會倍增，這些都是業績冇嘅，但肯定會影響中短期走勢。

反而中小型股份，業績就值得細看，尤其是那些平時曝光率不高的股份，又或者業務走出谷底嗰啲，份業績隨時推升佢一兩成，雖然都偶有見光死，但通常都係績前炒得太高，大量獲利盤所致，不過那些離開谷底的股，一個像樣的回吐就是給予大家入場機會，唔少戰友見到這類股份，望吓個圖，嘩乜從低位升了四五成，仲點買得落手呀，但如果落注時永遠望住個低位來比較，相信戰友只會買到思捷(0330)、富智康(2038)或者利豐(0494)，青冰不是睇死佢哋不會反底，只係換個角度睇，持續尋底或者在低位徘徊，證明資金仲未入市，你要醒過叻過那些資金去撈底，只能說句祝君好運。

業績期每日有幾十間公司公佈，要每份都刨，再從中搵一些今年的主力，的確唔易，所以還是留返周末慢慢睇，當然第一浸的快餐就食唔到架喇，但如果係睇一個中期升浪的話，有資金有耐性，永遠都會有入市機會的。

Fb個人專頁 http://www.fb.com/chingbing888