Q41821：
龔sir，近年黃金不斷升，如果我本身沒有貨，現在入是否仍可以呢？
龔成老師：
你買少少可以，但這刻不宜大手，因為黃金近年上好多，現時不是最好的入貨位，不過，現金只會永遠貶值，所以價長遠仍是向上的，所以可考慮小注。
長遠來說，我地可以在整個財富組合上，持有一小部分貴金屬，如黃金、白銀。
因為現時用的紙幣不斷發行令其永遠貶值，金銀就會不斷升值，投資者只要投資紙黃金、黃金ETF等，已能簡單地享受到當中的升幅。
同時，當環球出現一些重大事件，如發生一些極罕見但影響極大的不利事件時，就會對全球財富定義造成極大震盪，如大型戰爭、超級天災、大型人為災難等，我們現時所認知的貨幣系統就有可能崩潰，甚至連法律也沒有作用。而人們唯一仍視為有價值的，除了糧食外，就是金銀了。
不過，這類極端事情發生的機會率極低，大量持有金銀令財富組合變得無效率，由於沒有現金流，會損失了當中的機會成本。
因此，投資者只需在財富組合中持有少量已可以，作用就是平衡組合，基本上佔組合的2%-5%已足夠。
Q41822：
成哥 你有冇試過好憎屋企人？
我純粹想搵人呻下 希望唔好煩到你
話說我同呀媽同住，佢唔小心，整死左我的小動物。
呢件事我永遠放唔低 我而家好仇恨我呀媽
我平時都算係一個理性冷靜的人 但今次我真係放不下呢種悲痛
你有冇咩建議比我😞
龔成老師：
我年輕的時候，都有因為各種事情，而同家人有不和的地方，例如家中較細，又有人睇電視，有時想靜靜地都得，而我又無自己的房。
所以有一段時間，都有少少不和，但之後再大D，想法成熟D，就會明白，家人已經盡力，比很好的東西我，只是有時大環境是這樣，佢地都唔想，我之後就開始想通。
我相信你要時間處理自己的心情，但過一段時間，你就明白，每個人都有做錯事的時候，如果佢是無心，你站在佢的角度，你都會好無奈。
如果一個人，有99件事對你好，只有1件事對唔好，你就不用該事情太過放大。呢個世界上，只有兩個人，永遠無條件對你好，就是你父母。
你這刻不用急於原諒，你可以先處理自己的情緒。
這段文字，你可以過一個月，再睇翻，可能有不同的想法。
Q41823：
龔老師美團最近大跌，如何報署，京動同美團鬥爭越嚟越厲害.
龔成老師：
你預短期仍會較波動，始終行業競爭加大，但行業並不是長期無錢賺的狀態，而美團也有一定的優勢，因此，只要持貨不過多就無問題。
美團（3690）受中國經濟因素影響，以及行業競爭，之前較一般，但長遠仍有發展，不過都要留意短期股價波動。
佢是中國領先的生活服務電子商務平台，利用科技連接消費者和商家，提供服務以滿足人們日常有關食的需求，並進一步擴展至多種生活和旅遊服務。可以將美團的業務，簡單分為三類：
--外賣平台
--旅遊相關
--其他新業務
三大業務是有關連的，因為美團利用外賣平台去建立客戶群，再延伸銷售到旅遊相關及新業務類別。
外賣業務，相信仍有中速增長，雖然不是很賺錢的業務，但隨著進一步擴展市場，增加規模效益，提高賺錢能力，盈利情況將進一步改善，同時，將為另外其他業務提供客源。
酒店旅遊業務，隨著外賣業務進一步發展，加上美團進一步發展整個生活平台服務，再配合長遠中國的旅遊行業發展及人民消費力提高，這部分的賺錢能力會更加明顯。
新業務方面，美團不斷加大這方面的投入，想進一步強化「生活圈平台」的定位。
整體來說，美團有一定質素。美團現時建立的生活化平台，仍要時間等其發展得更好，長遠發展力仍在。
Q41824：
你好，成老師。
想問一下。 因為我都在 21年尾樓是高峰期買入樓。 買入咗沙田 已補地價居屋。 而家2025年佢已經係43年樓。470呎。 買入價已經係去到520萬到，但都要行一層樓梯。 而家已經經歷緊大維修 不過到依家都未維修完。 而且樓價跌到去 330幾至360幾萬。
因為本人都已經 同女朋友準備結婚。係2026年年頭。
本人 薪金大概四萬， 還有事同朋友合作經營生意。 大概每月都有六萬蚊分行紅。 不過都係分咗 一年多啲。 唔肯定呢個收入會唔會可以一直持續。 女朋友薪金大概三萬一個月。我哋 借咗八成。 每月大概17600供款。 但係我哋仲要供26年。
但係而家仲有一個機會就係未結婚前我仲可以將 自己個名加回去我父母嘅舊公屋。因為結婚後就已經唔可以加名。因為好似而家嘅情況 好似賣咗佢，再買10年至20年內嘅 選擇。 不過當年嘅首期就完全化為烏有。 呢幾年嘅供款都係等於冇供過。 因為而家 賣出去都可能要抬錢補50萬以上。
唔計結婚，大約手頭上現有40萬現金。同30萬股票。
所以想你解答一下我應唔應該賣樓加名，之後租樓，等遲少少再有錢先換新居屋。 定係而家呢一刻不變應萬變會比較好呢？ 或者應該點樣做或者可以有咩目標方向？但租樓又變相儲唔到錢。
股票都唔係收一d收息股。都係2025年同位入左貨。
所以呢一刻都比較迷惘🙏🏻🙏🏻🙏🏻希望成老師可以幫我解答一下🙏🏻🙏🏻
因為2021年嘅時候我哋兩關嘅人工加埋都唔過五萬蚊。 加上當時五百幾萬只係可以買到啲新界區30至40年嘅樓。 不過當然我哋都係想要大概400呎到啦。
我哋而家基本上每一個月都係用緊我哋嘅薪金， 仲可以儲到 每個月大概兩個加埋有一萬蚊。 因為分紅嗰度就冇計算落去嘅。 分紅嗰度基本上都係想每個月可能有 兩萬蚊去股票。 其他可能係做定期， 同埋而家結婚留咗30萬。 所以我都想知道我哋而家呢一刻兩個應該點樣做會比較好。
因為我哋如果繼續工呢一齊我供完之後 已經69年有 我都已經67歲 而我女朋友都已經去到 62歲。 之後想靠層樓樣返我哋都好似唔太可能 因為做唔到逆按
龔成老師︰
其實你們現時物業樓齡都有少少高，相信住到百年歸老架可能性較細，同時又存在不能逆按揭架問題，故長線都要換屋架需要。
由於現時已經有43年樓齡，投資價值會開始慢慢跌，建議就算唔係即時，都要規劃定未來幾年沽出。
至於新物業，是租定買? 如果你能力可以支持到自己供樓(講緊係有信心長線供得起)，建議係買。因為我預未來香港自住物業市場，會係平穏發展，唔大升，又唔大跌。所以，唔太值得你再等佢有明顯進一步回調機會。
最後係加名，建議都進行，保留未來購屋資格，比自己多個選擇。
Q41825：
本人有個難題困擾咗我幾個月。。。想請教應該點做？
疫情2020買咗商舖基金已經滿足贖回期，二月份申請咗贖回要等到6月30號出個NAV可以confirm贖回定係繼續？一個商舖基金幾年一直都有派息又賺錢，直至到2024年嘅第三季AV開始跌跌咗三季，啱啱一月份得返82.5，差唔多跌咗20%基金開始嗰陣係100 NAV , 到6月30號有機會再跌低過82.5亦有機會升返未知。
我想問吓應唔應該贖回？
如果長遠睇，有兩種睇法：
睇好，一簽多行， 旅客增加， 舖位就會 回穩。 彈返幾多冇人知，但係需要好長時間。 如果長期持有，就要等佢回升。長線三丶五丶七年，可能打平，可能有賺，冇人知。
睇差，因已通關，北上消費， 都未必抵消得返 本地消費力。 而且財赤，隨時加稅，令消費力更加疲弱，彈唔返以前個位，只能收吓息。
就好似匯豐銀行， 如果再出現多次同樣情況。嗰陣我都堅持蝕放。。唯有轉馬。。長期唔派息唔掂。要搵返啲穩健嘅收息股
香港嘅內在問題：
性價比低
人口少，市場細
傳統產業正在衰退
政府財赤入不敷支
香港如果香港交稅更加冇競爭力
原本香港係一個低稅城市
人哋美國都話減減稅，假設香港仲話加稅更加冇競爭力
市場唔好啲人信住就唱衰香港，我身邊都好多人問我點解唔返外國或香港冇得玩,已經唔係以前嘅香港全部都係負面嘢冇一句正面。
係，市場唔好悲觀嘅情緒係好易影響決策，好容易受人影響，亦做錯決定。
現在未有方向，只係響贖回期deadline二月尾嗰日前申請咗贖回。
就算一簽多行12月開始發生，唔會即時見到結果，同樣地起碼第三第四季先會出第一第二季嘅反映嘅數據。但係贖回係6月30號，即是睇贖回價位就係六月尾。
數據永遠都係behind 咗，所以所以我估計短期內半年唔會好得去邊。只希望唔好太差，個跌價喺預期之內。
如果要睇1簽多行嘅反應數據要去到第三第四季，即是要keep住佢繼續收息直至下一個申請贖回日係8月31號，但係個價位一樣睇贖回日期係12月31日
冒險 or not? 我唔識答。。我都想香港好同其他人一樣不停唱衰香港，但係而家情後轉變嘅狀況嘅事實，除非大陸有一啲勁嘢嘅政策例如QE 走出嚟? 否則一般小小嘅政策news 係救唔到香港現在個經濟。
依家仲要港車北上, 大陸同香港接位，但係同世界國際都市脫軌。。對唔係好事。。
通咗關放咗港車北上，香港消費力更弱。。。
個投資商舖基金嘅理念係正確。當時每個舖位轉手仍然有賺。 佢通關之後，就。。。呢個係大家始料所不及。
如果政府唔開關,，唔通關，唔搞港車北上，d朋友係唔會响上面走水貨落嚟， 或者向上面買餸。 到時最多只係北區嘅居民會受影響。估唔到一通關，成個香港都好大鑊。
樓價係咁跌，專才只係過路濕水，所以租金升樓價跌。
由於有最低工資 和通脹，人工及原材料不斷上升，仲有運輸丶水電煤，租金到抵消唔到。
本來疫情嘅時候，民生舖一路升。街市暢旺。
通咗關連街市都少咗生意。 北邊地區生意死曬， 東涌地區，唔使諗，走咗上去。黑暴令大陸同香港接軌，但同國際脫軌。失咗優勢。。。
大陸餐廳開到落來，有咩好？一啲都唔似香港。 中西文化冇曬。。。
係我所有發生什麼事情都要只能自己解決沒有人幫，又唔去同屋企講，更加唔可以同我老竇老母講又幫唔到手有冇意思！所以屈住自己好大壓力好抑鬱。
原本個基金理念係真係work, 佢淨係買地舖，唔會買商場或樓上舖，基本上唔死得人
疫情嗰陣個基金都好賺錢，冇一個舖位蝕錢，個個賺因為嗰陣民生區ok. 冇人估到通關後香港會搞成咁。。
我喺屋企無論發生乜嘢事都要扮冇嘢唔可以俾屋企嗰個見到我有異樣，所以我好抑鬱好抑壓好有壓力。。
我相信你都需要時間去消化我寫俾你的訊息。。
因為你是局外人，唔會被低落嘅情緒影響決定，頭腦會比我清晰，所以才找你分析
龔成老師︰
商舖基金是否贖回，要睇佢長線投資價值，而唔係而一刻個價格架升跌。
由於香港人消費模式係變左，加上人民幣弱，都係一個北上消費架誘因。而內地都較難中短期完全復常，所以商舖類投資整體發展預計會較一般。
其實，無論投資定係而個世界，都不停係度變緊。
你唔需要自責投資錯誤，因為好多事情係被動地發生。而我地要做，係要學識如何客觀地審時度勢，之後再做出理性架投資決定。
同埋，建議你將你心中架感受，到你家人或者朋友分享。除左有利於情緒疏導，有時都可以係討論度拿到新的想法，未必是壞事。
最後，建議你唔好太過將精力，全部放晒係投資方面。抽點時間運動、經營下自己興趣，對你個人發展和維持思考清晰度，都係有正面作用。
加油!!!
Q41826：
早晨龔sir, 請問而家小米在合理區咩位置？謝謝！
龔成老師：
大約在合理區中上部。小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。
近年的業務發展理想，無論手機、ＩｏＴ、智能車，各類業務部分，都有相當的增長，除了反映不同類別的業務都發展理想外，相信小米的品牌及產品性價比高等因素，能帶動整間企業發展。
近年的賺錢能力也持續向好，多個業務類別的毛利率都有持續向上，反映企業並不是透過減價去推銷量，而是提高產品的吸引力，不止吸引更多消費者，更提高每件產品的賺錢能力。
近年企業發展智能車，由零開始到成功銷售，只用了3年時間，反映這企業的研發能力、執行力都好強，更重要是銷售理想。
雖然這刻智能車業務處虧損狀態，但只要發展理想，當產量進一步上升能產生規模效益，同時只要建立好品牌，慢慢提高汽車的賺錢能力，這部分將慢慢創造盈利。
整體來說，企業長遠發展正面，現價處合理區中上，可分注投資，但短期股價可能有點波動，投資者要平常心，以長線角度去投資這股，耐心等企業發展。
Q41827：
龔成 我也想月供，打算供3隻，但月供一隻股。每個月要付每隻股$50手續費。即係$150。
比較緊不同銀行。
龔成老師：
如果手續費較貴，建議集中供一隻，供一段時間（例如1年，再轉供其他）。又或者，供指數基金，例如2800、3067，因為這些基金是一個組合，就算集中也會比個股有分散風險的作用。
Q41828：
老師想了解下0012恒基地產可以入嗎？
想收下息
想入3千股左右、宜家入合適嗎？
龔成老師：
恒基地產（0012）近年的表現較一般，主要受香港地產市道、租務市場，以及外圍高息因素影響，雖然企業的增長力比過往年代的確有減少，但企業的質素仍在。但預佢長遠不是高增長類。
你預短期仍一般，回勇要時間，但長遠又不是無價值。企業仍持有好多有價值資產，例如恆基用$500億投得中環海濱商業地，從長遠計中環獨特性強，長遠始終有一定質素。加上佢是全港最多農地的發展商，都是長遠有價值的資產。
香港地產行業，最好賺的年代已經過去。恆基整體的質素仍在，但不是高增長類，只是收息及平穩增長型。現水平合理，有收息及平穩增長的作用。
至於3000股，要睇下佔你組合%是否多，如果太多就不建議，可以減少買入數目。
Q41829：
你好，老師
百度（9888） 可以買嗎？可升至$120 元，如果和小米比潛力哪個好D？多謝🙏🏻！
龔成老師：
兩隻都有質素的，但增長力方面，小米（1810）會較好，但股價上落都會D，如果不怕波動，並以長期投資作方向，可以考慮小米先。
小米（1810）以手機、智能硬件，以及物聯網為平台的公司，小米專注於互聯網直接銷售產品，近年發展電動車。
近年的業務發展理想，無論手機、ＩｏＴ、智能車，各類業務部分，都有相當的增長，除了反映不同類別的業務都發展理想外，相信小米的品牌及產品性價比高等因素，能帶動整間企業發展。
近年的賺錢能力也持續向好，多個業務類別的毛利率都有持續向上，反映企業並不是透過減價去推銷量，而是提高產品的吸引力，不止吸引更多消費者，更提高每件產品的賺錢能力。
近年企業發展智能車，由零開始到成功銷售，只用了3年時間，反映這企業的研發能力、執行力都好強，更重要是銷售理想。
雖然這刻智能車業務處虧損狀態，但只要發展理想，當產量進一步上升能產生規模效益，同時只要建立好品牌，慢慢提高汽車的賺錢能力，這部分將慢慢創造盈利。
整體來說，企業長遠發展正面，現價處合理區中上，可分注投資，但短期股價可能有點波動，投資者要平常心，以長線角度去投資這股，耐心等企業發展。
至於百度（9888），都有基本質素的。
長遠發展不差。回勇要時陳，長線仍有增長力，小注投資都可，股價較波動。
佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。
業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。
百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。
並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。
現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。
現價未到平，合理區較下部，但長線有增長力，小注投資都可，股價較波動。
Q41830：
龔sir, 請問陽光房地產435，息率應該睇LFY，定TTM，差咁多嘅？
龔成老師：
因為短期變化大，所以兩者差較多，你可以睇TTM。
但坦白講，無論是LFY定TTM，在分析股息時，都只佔好少部分，較核心是分析過往5年數據，並分析現時最新環境作推算。