Q41341：
老師，其實止蝕適宜用在價值投資上？
龔成老師：
當然適用！
止蝕是好重要的一步，價值投資法，都會止蝕的。
只要，我地並不會著重「跌了多少」而決定止蝕，而是建基於「企業本身」。
如果企業的質素，明顯轉差，由優質變成不優質，而這個改變並不是短期，而是核心性，就要止蝕。
另外，如果企業質素有下跌情況，但又未到好差，就有機會減持。
Q41342：
請問地平線機器人如何，有望上翻9元以上嗎？謝謝
龔成老師：
短期好難講，至於長遠，就好睇佢業務發展情況，你預佢業務風險較大，可以成功，但失敗了也可以好差。因此，投資這股就預高風險，但博就不博少少。
地平線機器人（9660）從事為乘用車提供汽車解決方案，亦提供非車解決方案，使設備製造商能夠設計及製造具有更高智能水平的設備及器具。
是乘用車高級輔助駕駛「ADAS」和高階自動駕駛「AD」解決方案供應商，擁有專有的軟硬件技術。
企業有長遠發展力的。雖然業務發展快速，但企業仍處於虧損狀態，因此，可理解這股為風險類潛力股，如果睇好，都只建議小注投資，相信佢股價上落會好大，如果風險承受能力不高，就不宜投資這股。
Q41343：
你好sir，我一直月供緊騰訊同港交所，每月各$5000。騰訊平均買入價$367，佔整個組合10%; 港交所$284佔組合8%。而家兩隻都升左唔少，應該停供甚至減持嗎？謝謝
龔成老師：
兩隻雖然上升了不少，但仍未貴，現時仍在合理區，考慮到持股佔你比重未算多，你仍可以月供。
如果你供到15%，可以停。如果股價再升多2成，你就停供。
又或者，你這刻可考慮減少少金額去供。
至於持貨，暫時不用減持，可以長線持有。
騰訊（0700）業務正好轉中，佢過往受中國政策規管影響，令企業之前的賺錢能力略減，以及企業估值都會略減，不過，政策影響又未到核心性，無令到企業無法賺錢，只是賺錢減少。
同時，見中國政府之後在政策上開始有放鬆，相信中國政府明白騰訊這類企業對經濟有一定的重要性，同時之前規管較嚴，開始調整翻。相信行業最差的時期有已過，之後會慢慢好轉。
這企業長遠仍有質素，有發展力的。佢最有價值的，就是「平台」，這亦是現世代好有發展的資產。
佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。
港交所（0388）有質素，獨市生意，加上香港的金融中心角色，這企業有長線投資價值。多年來的生意與盈利都有理想增長，派息不差。
但要留意，由於這股的盈利會受股市成交影響，因此股價都會有影響。
近年的成交弱，令這股近年股價較一般。到最近，港股成交好轉，這股股價向上。所以，你會見到佢股價十分波動。
投資者分析港股較長的年期，都會發現，成交有一段時間會較多，又有一段時間會較少，同樣，公司上市會睇市況，當市況較旺時上市公司數目較多，市況靜時上市公司數目較少，投資者一定要明白週期性的特點。
Q41344：
如果依家系學生，收入唔多。但系想買3110ETF，咁應該一次性買好d定好似你講嘅，每個月買小小買小小咁好d？
龔成老師︰
其實一次性買，定少少注定(分段咁慢慢儲)，主要睇2點︰
1) 估值︰如果佢係好平，一次過入較理想。若只係合理區，就最好分注。
2) 投資能力︰如果你自問投資能力一般，就唔好自己一次過大手。
我見好多投資者，本身買中優質股，但長線都要輸錢，原因就係"買貴左"。所以，係你無投資知識前提下，每月分注慢慢入，會係最穏當的做法。
Q41345：
我想問下兩隻1405和9987，未有貨，想買哪隻好啲，想聽下你分析
龔成老師︰
達勢股份(1405)以獨家總特許經營商身份在中國大陸、香港及澳門經營達美樂比薩連鎖快餐店。
佢業務係有，收入都有增長，但盈利仲係較波動，近期才有盈利出現，故有一定不確定性。
加上近期股價升唔少，故最多只宜小注。
百勝中國（9987）有質素，不過由於本身已好大隻，並不是快速增長的類別。
佢主要係中國大陸經營餐廳業務，旗艦餐廳品牌包括快餐品牌肯德基與休閒餐飲品牌必勝客（都係利用獨家經
營和授權經營權）。
佢另外仲有其他品牌代理，包括小肥羊（專營火鍋）、黃記煌（燜鍋品牌）、東方既白（中式快餐品牌）、ＣＯＦＦｉｉ ＆ ＪＯＹ（咖啡店品牌）、Ｌａｖａｚｚａ（授權咖啡店品牌）等。
睇翻佢的資料，佢係中國的1400多個城市，共有約1萬間家餐廳，當中約85%餐廳由集團擁有及自營。
可見有一定的規模與經營網絡，過往的業務都不差，增長力都有。相信長遠能利用當中的優勢保持發展。
不過，本身已有一定的規模，所以預期佢只是平穩增長類，如果投資，要分注入，適合長線的。
總括而言，2隻現價都唔平，故不宜太進取。從質素計，會係9987較高。
Q41346：
龔老師，請問你阿里巴巴現價股價合理嗎？長線值博率高嗎？
龔成老師︰
阿里（9988）係業務層面，不是無優勢，不少業務處於都有一定的規模，但數年前因監管因素，令企業增長慢左，加上近年競爭大左，影響佢賺錢能力。到近年，業務有好轉情況。
企業長遠仍有增長力，有發展延伸業務，這都會成為企業增長點。
以企業的長期發展計，這股仍有質素，但股價都有一定的波動，現價合理。
始終之前面對內地監管收緊，影響過往的賺錢能力，不過，相信最差的時期已過，同時見到中國政策開始講話重視平台經濟，業務持續好轉。
再加上佢在人工智能行業發展上，會有利好的，因此，長遠都有發展力。
現時合理，分注投資可以，企業都有基本增長力，不過就未必是高增長，控制注碼都可投資。
我都出左阿里的分析影片，你可以睇下︰
https://www.youtube.com/watch?v=1tAb08TITkM
Q41347：
你好👋老師想請教1508中國再保險前景如何？現價買得過？
龔成老師︰
中國再保險（1508）主要經營以下四個業務分部：
（１）財產再保險
（２）人身再保險
（３）財產險直保
（４）資產管理
其實佢不是無生意的，見佢生意保持增長，但賺錢能力就唔算強，盈利有點波動，反映成本等因素對佢影響，整體的質素有下跌情況。
由於獨特性並非好強，相信之後的發展都只是一般，預佢增長力不強。現價合理的，主力是收息。
Q41348：
係嘅，過去買股我都係憑感覺，有賺嘅，但係阿里巴巴就係好例子，好似⋯2020年250 高位入，去到後尾70幾，為左買加密幣可以賺快錢就賣哂⋯⋯
最近至買番兩隻股，
1810一手 $54入；
00085 四手$1.47入
想長線放住
仲有4 股 Nvidia $144入
龔成老師︰
首先，投資一定唔可以憑感覺。就算幸運地短期賺到錢，長線也一定會輸翻晒出黎。
要做好投資，一定要有知識和策略。
睇翻你發問的資訊，會發現你投資存在很大問題。
首先，你係見邊到升，就衝去買邊度。完全係唔會理估值，同埋個風險。
以你沽出阿里(9988)為例，佢當時個價係低，但唔代表佢無質素。當刻$7X個陣，其實個值搏率係好高。係有質素和估值唔高情況下，係入貨時機，而唔係沽貨時機。
同理，你小米(1810)係升左咁多，已經唔平架時候先入貨，明顯都係見佢升好多，就去追，咁係好錯。
同埋，你本身已到中年，投資做增值係可以，但已經不宜過份進取。所以，1810、9988、NVDA而類潛力股，長線不宜持有太多。加密貨幣風險更高，更加只宜小小注。
未來時間，建議集中儲平穏增長股，會對你更有利。儲架模式，係用分注咁慢慢儲，因為你估值能力太弱，自行睇股價去買，風險極高。
總括而言，你持有股票，大部份都具有長線投資價值，但你跟很多坊間投資者一樣，都係犯左一些共同錯誤，就係買左貴貨。令到自己長線持有優質股，但長線組合依然係輸錢。
其實投資，唔係單單買入隻優質股，之後長線持有，就會出現理想回報。
投資知識(分析股票性質和優質度)、估值能力(定平貴能力)、組合配置/平衡性、年紀/風險承受力等因素，都會影響到長線組合回報效益。
所以，你要努力提升自己投資知識，特別係"估值"和"選股分析"能力。因為長線投資回報，係必然同你架知識水平成正比。
我建議你要多讀投資相關書本、年報，新聞和報讀相關課程。書本上，你可以睇我寫架《圖解股票小百科》、《圖解美股小百科》、《80後千萬富翁》和《財務自由行》，都適合初學者。
Q41349：
老師你好，我從來沒有買過美股，但見近日美股持續跌，有啲想買入1-2隻，老師請問有冇啲平隱收息推介
龔成老師︰
美股不建議買入收息，因爲香港人買會有股息稅(稅率︰30%)，這會將影響你的回報。
如果想買入「潛力股」或者「平穩增值股」，美股會係一個好的選擇，但同時都要注意相關的風險。
當我地進行投資增值時，係會因應自已的財政狀況、風險承受能力、年齡、負擔、要求回報等，從而確認那一類股票較適合自已。
美股有些股票的波幅會比港股大，你要因應自己的情況去建立組合，你可以考慮以下美股，最好以月供的形式投資，會避免一次過在高位買入的風險。
平穩增值股，指數基金由於是一個組合，因此在平衡風險方面較好，例如美股追蹤標普500指數的（VOO）、追蹤富時全球股市指數（VT）。
另外再加其他個股：美股如巴郡（BRK.B）、蘋果公司（AAPL）、迪士尼（DIS）、Costco好市多（COST）、麥當勞（MCD）、可樂（KO）、等，你可以了解下，並從中選股。
如果想增長力高少少，可考慮潛力股，例如指數基金，美股可投資納指基金（QQQ），或在港上市追納指基金（2834）。另外再加：美股如微軟（MSFT）、Visa（V）、ASML Holding（ASML）、Tesla（TSLA）、Amazon（AMZN）等，你可以了解下，並從中選股，但佢地波動性和風險會較高，要自己平衡。
同時，我鼓勵大家用平衡配置的策略，港股和美股都應該佔一定的比例，唔好太偏重某一個地區。
Q41350：
老師，請問美股及美債現時適合入市嗎？
龔成老師︰
美股現時處於合理區的較上位置，可以買入，但只能分注和小注。
債券能夠產生穩定的現金流，但增長力有限。
如果你本身已經接近退休，為退休做計劃的話，可以考慮將部分資金分配到美債上。但如果你年青，就唔太建議投資債券。
建議你長遠建立一個平衡組合，唔好太著重某一地區的股票，美股港股都要有，重點是平衡。